២៧០. តស្សុទ្ទានំ

ចម្បាយំ ភគវា អាសិ, វត្ថុ វាសភគាមកេ;

អាគន្តុកានមុស្សុក្កំ, អកាសិ ឥច្ឆិតព្ពកេ [ឥច្ឆិតព្ពកោ (ក.)].

បកតញ្ញុនោតិ ញត្វា, ឧស្សុក្កំ ន ករី តទា;

ឧក្ខិត្តោ ន ករោតីតិ, សាគមា ជិនសន្តិកេ.

អធម្មេន វគ្គកម្មំ, សមគ្គំ អធម្មេន ច;

ធម្មេន វគ្គកម្មញ្ច, បតិរូបកេន វគ្គិកំ.

បតិរូបកេន សមគ្គំ, ឯកោ ឧក្ខិបតេកកំ;

ឯកោ ច ទ្វេ សម្ពហុលេ, សង្ឃំ ឧក្ខិបតេកកោ.

ទុវេបិ សម្ពហុលាបិ, សង្ឃោ សង្ឃញ្ច ឧក្ខិបិ;

សព្ពញ្ញុបវរោ សុត្វា, អធម្មន្តិ បដិក្ខិបិ.

ញត្តិវិបន្នំ យំ កម្មំ, សម្បន្នំ អនុសាវនំ;

អនុស្សាវនវិបន្នំ, សម្បន្នំ ញត្តិយា ច យំ.

ឧភយេន វិបន្នញ្ច, អញ្ញត្រ ធម្មមេវ ច;

វិនយា សត្ថុ បដិកុដ្ឋំ, កុប្បំ អដ្ឋានារហិកំ.

អធម្មវគ្គំ សមគ្គំ, ធម្ម បតិរូបានិ យេ ទុវេ;

ធម្មេនេវ ច សាមគ្គិំ, អនុញ្ញាសិ តថាគតោ.

ចតុវគ្គោ បញ្ចវគ្គោ, ទសវគ្គោ ច វីសតិ;

បរោវីសតិវគ្គោ ច [អតិរេកវីសតិវគ្គោ (ស្យា.)], សង្ឃោ បញ្ចវិធោ តថា.

ឋបេត្វា ឧបសម្បទំ, យញ្ច កម្មំ បវារណំ;

អព្ភានកម្មេន សហ, ចតុវគ្គេហិ កម្មិកោ.

ទុវេ កម្មេ ឋបេត្វាន, មជ្ឈទេសូបសម្បទំ;

អព្ភានំ បញ្ចវគ្គិកោ, សព្ពកម្មេសុ កម្មិកោ.

អព្ភានេកំ ឋបេត្វាន, យេ ភិក្ខូ ទសវគ្គិកា;

សព្ពកម្មករោ សង្ឃោ, វីសោ សព្ពត្ថ កម្មិកោ.

ភិក្ខុនី សិក្ខមានា, ច សាមណេរោ សាមណេរី;

បច្ចក្ខាតន្តិមវត្ថូ, ឧក្ខិត្តាបត្តិទស្សនេ.

អប្បដិកម្មេ ទិដ្ឋិយា, បណ្ឌកោ ថេយ្យសំវាសកំ;

តិត្ថិយា តិរច្ឆានគតំ, មាតុ បិតុ ច ឃាតកំ.

អរហំ ភិក្ខុនីទូសិ, ភេទកំ លោហិតុប្បាទំ;

ព្យញ្ជនំ នានាសំវាសំ, នានាសីមាយ ឥទ្ធិយា.

យស្ស សង្ឃោ ករេ កម្មំ, ហោន្តេតេ ចតុវីសតិ;

សម្ពុទ្ធេន បដិក្ខិត្តា, ន ហេតេ គណបូរកា.

បារិវាសិកចតុត្ថោ, បរិវាសំ ទទេយ្យ វា;

មូលា មានត្តមព្ភេយ្យ, អកម្មំ ន ច ករណំ.

មូលា អរហមានត្តា, អព្ភានារហមេវ ច;

ន កម្មការកា បញ្ច, សម្ពុទ្ធេន បកាសិតា.

ភិក្ខុនី សិក្ខមានា ច, សាមណេរោ សាមណេរិកា;

បច្ចក្ខន្តិមឧម្មត្តា, ខិត្តាវេទនទស្សនេ.

អប្បដិកម្មេ ទិដ្ឋិយា, បណ្ឌកាបិ ច ព្យញ្ជនា [ឥតោ បរំ ស្យាមមូលេ ទិយឌ្ឍគាថាហិ អភព្ពបុគ្គលា សមត្តំ ទស្សិតា];

នានាសំវាសកា សីមា, វេហាសំ យស្ស កម្ម ច.

អដ្ឋារសន្នមេតេសំ, បដិក្កោសំ ន រុហតិ;

ភិក្ខុស្ស បកតត្តស្ស, រុហតិ បដិក្កោសនា.

សុទ្ធស្ស ទុន្និសារិតោ, ពាលោ ហិ សុនិស្សារិតោ;

បណ្ឌកោ ថេយ្យសំវាសោ, បក្កន្តោ តិរច្ឆានគតោ.

មាតុ បិតុ អរហន្ត, ទូសកោ សង្ឃភេទកោ;

លោហិតុប្បាទកោ ចេវ, ឧភតោព្យញ្ជនោ ច យោ.

ឯកាទសន្នំ ឯតេសំ, ឱសារណំ ន យុជ្ជតិ;

ហត្ថបាទំ តទុភយំ, កណ្ណនាសំ តទូភយំ.

អង្គុលិ អឡកណ្ឌរំ, ផណំ ខុជ្ជោ ច វាមនោ;

គណ្ឌី លក្ខណកសា, ច លិខិតកោ ច សីបទី.

បាបា បរិសកាណោ ច, កុណី ខញ្ជោ ហតោបិ ច;

ឥរិយាបថទុព្ពលោ, អន្ធោ មូគោ ច ពធិរោ.

អន្ធមូគន្ធពធិរោ មូគពធិរមេវ ច;

អន្ធមូគពធិរោ ច, ទ្វត្តិំសេតេ អនូនកា.

តេសំ ឱសារណំ ហោតិ, សម្ពុទ្ធេន បកាសិតំ;

ទដ្ឋព្ពា បដិកាតព្ពា, និស្សជ្ជេតា ន វិជ្ជតិ.

តស្ស ឧក្ខេបនា កម្មា, សត្ត ហោន្តិ អធម្មិកា;

អាបន្នំ អនុវត្តន្តំ, សត្ត តេបិ អធម្មិកា.

អាបន្នំ នានុវត្តន្តំ, សត្ត កម្មា សុធម្មិកា;

សម្មុខា បដិបុច្ឆា ច, បដិញ្ញាយ ច ការណា.

សតិ អមូឡ្ហបាបិកា, តជ្ជនីនិយស្សេន ច;

បព្ពាជនីយ បដិសារោ, ឧក្ខេបបរិវាស ច.

មូលា មានត្តអព្ភានា, តថេវ ឧបសម្បទា;

អញ្ញំ ករេយ្យ អញ្ញស្ស, សោឡសេតេ អធម្មិកា.

តំ តំ ករេយ្យ តំ តស្ស, សោឡសេតេ សុធម្មិកា;

បច្ចារោបេយ្យ អញ្ញញ្ញំ, សោឡសេតេ អធម្មិកា.

ទ្វេ ទ្វេ តម្មូលកំ តស្ស [ទ្វេ ទ្វេ មូលា កតា កស្ស (ស្យា.), ទោទោតមូលកន្តស្ស (ក.)], តេបិ សោឡស ធម្មិកា;

ឯកេកមូលកំ ចក្កំ, ‘‘អធម្ម’’ន្តិ ជិនោព្រវិ.

អកាសិ តជ្ជនីយំ កម្មំ, សង្ឃោ ភណ្ឌនការកោ;

អធម្មេន វគ្គកម្មំ, អញ្ញំ អាវាសំ គច្ឆិ សោ.

តត្ថាធម្មេន សមគ្គា, តស្ស តជ្ជនីយំ ករុំ;

អញ្ញត្ថ វគ្គាធម្មេន, តស្ស តជ្ជនីយំ ករុំ.

បតិរូបេន វគ្គាបិ, សមគ្គាបិ តថា ករុំ;

អធម្មេន សមគ្គា ច, ធម្មេន វគ្គមេវ ច.

បតិរូបកេន វគ្គា ច, សមគ្គា ច ឥមេ បទា;

ឯកេកមូលកំ កត្វា, ចក្កំ ពន្ធេ វិចក្ខណោ.

ពាលា ព្យត្តស្ស និយស្សំ, បព្ពាជេ កុលទូសកំ;

បដិសារណីយំ កម្មំ, ករេ អក្កោសកស្ស ច.

អទស្សនាប្បដិកម្មេ, យោ ច ទិដ្ឋិំ ន និស្សជ្ជេ;

តេសំ ឧក្ខេបនីយកម្មំ, សត្ថវាហេន ភាសិតំ.

ឧបរិ នយកម្មានំ [ឧបវិនយកម្មានំ (ស្យា.), ឧក្ខេបនីយកម្មានំ (ក.)] បញ្ញោ តជ្ជនីយំ នយេ;

តេសំយេវ អនុលោមំ, សម្មា វត្តតិ យាចិតេ [យាចតិ (ស្យា.), យាចិតោ (សី.)].

បស្សទ្ធិ តេសំ កម្មានំ, ហេដ្ឋា កម្មនយេន ច;

តស្មិំ តស្មិំ តុ កម្មេសុ, តត្រដ្ឋោ ច វិវទតិ.

អកតំ ទុក្កដញ្ចេវ, បុនកាតព្ពកន្តិ ច;

កម្មេ បស្សទ្ធិយា ចាបិ, តេ ភិក្ខូ ធម្មវាទិនោ.

វិបត្តិព្យាធិតេ ទិស្វា, កម្មប្បត្តេ មហាមុនិ;

បដិប្បស្សទ្ធិមក្ខាសិ, សល្លកត្តោវ ឱសធន្តិ.

ឥមម្ហិ ខន្ធកេ វត្ថូនិ ឆត្តិំសាតិ.

ចម្បេយ្យក្ខន្ធកោ និដ្ឋិតោ.