២៤៤. បព្ពាជនីយកម្មកថា

៤១៣. ឥធ បន, ភិក្ខវេ, ភិក្ខុ កុលទូសកោ ហោតិ បាបសមាចារោ. តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ កុលទូសកោ បាបសមាចារោ. ហន្ទស្ស មយំ បព្ពាជនីយកម្មំ ករោមា’’តិ. តេ តស្ស បព្ពាជនីយកម្មំ ករោន្តិ – អធម្មេន វគ្គា. សោ តម្ហា អាវាសា អញ្ញំ អាវាសំ គច្ឆតិ. តត្ថបិ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន បព្ពាជនីយកម្មកតោ អធម្មេន វគ្គេហិ. ហន្ទស្ស មយំ បព្ពាជនីយកម្មំ ករោមា’’តិ. តេ តស្ស បព្ពាជនីយកម្មំ ករោន្តិ – អធម្មេន សមគ្គា…បេ… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា…បេ….

ចក្កំ កាតព្ពំ.

បព្ពាជនីយកម្មកតា និដ្ឋិតា.