២៤៥. បដិសារណីយកម្មកថា

៤១៤. ឥធ បន, ភិក្ខវេ, ភិក្ខុ គិហី អក្កោសតិ បរិភាសតិ. តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ គិហី អក្កោសតិ បរិភាសតិ. ហន្ទស្ស មយំ បដិសារណីយកម្មំ ករោមា’’តិ. តេ តស្ស បដិសារណីយកម្មំ ករោន្តិ – អធម្មេន វគ្គា. សោ តម្ហា អាវាសា អញ្ញំ អាវាសំ គច្ឆតិ. តត្ថបិ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន បដិសារណីយកម្មកតោ អធម្មេន វគ្គេហិ. ហន្ទស្ស មយំ បដិសារណីយកម្មំ ករោមា’’តិ. តេ តស្ស បដិសារណីយកម្មំ ករោន្តិ – អធម្មេន សមគ្គា…បេ… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា…បេ….

ចក្កំ កាតព្ពំ.

បដិសារណីយកម្មកថា និដ្ឋិតា.