២៤០. អធម្មកម្មាទិកថា

៣៩៧. ឥធ បន, ភិក្ខវេ, ភិក្ខុស្ស ន ហោតិ អាបត្តិ ទដ្ឋព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិ’’ន្តិ? សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យ’’ន្តិ. តំ សង្ឃោ អាបត្តិយា អទស្សនេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ អាបត្តិ បដិកាតព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បដិករោហិ តំ អាបត្តិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមយំ បដិករេយ្យ’’ន្តិ. តំ សង្ឃោ អាបត្តិយា អប្បដិកម្មេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘បាបិកា តេ, អាវុសោ, ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ បាបិកាយ ទិដ្ឋិយា អប្បដិនិស្សគ្គេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ អាបត្តិ ទដ្ឋព្ពា, ន ហោតិ អាបត្តិ បដិកាតព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិ? បដិករោហិ តំ អាបត្តិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យំ. នត្ថិ មេ, អាវុសោ, អាបត្តិ, យមហំ បដិករេយ្យ’’ន្តិ. តំ សង្ឃោ អទស្សនេ វា អប្បដិកម្មេ វា ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ អាបត្តិ ទដ្ឋព្ពា, ន ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិំ? បាបិកា តេ ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យំ; នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ អទស្សនេ វា អប្បដិនិស្សគ្គេ វា ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ អាបត្តិ បដិកាតព្ពា, ន ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បដិករោហិ តំ អាបត្តិំ; បាបិកា តេ ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បដិករេយ្យំ. នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ អប្បដិកម្មេ វា អប្បដិនិស្សគ្គេ វា ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ន ហោតិ អាបត្តិ ទដ្ឋព្ពា, ន ហោតិ អាបត្តិ បដិកាតព្ពា, ន ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិំ? បដិករោហិ តំ អាបត្តិំ; បាបិកា តេ ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យំ. នត្ថិ មេ, អាវុសោ, អាបត្តិ, យមហំ បដិករេយ្យំ. នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ អទស្សនេ វា អប្បដិកម្មេ វា អប្បដិនិស្សគ្គេ វា ឧក្ខិបតិ – អធម្មកម្មំ.

៣៩៨. ឥធ បន, ភិក្ខវេ, ភិក្ខុស្ស ហោតិ អាបត្តិ ទដ្ឋព្ពា. តមេនំ ចោទេតិ. សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិ’’ន្តិ? សោ ឯវំ វទេតិ – ‘‘អាមាវុសោ, បស្សាមី’’តិ. តំ សង្ឃោ អាបត្តិយា អទស្សនេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ហោតិ អាបត្តិ បដិកាតព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បដិករោហិ តំ អាបត្តិ’’ន្តិ. សោ ឯវំ វទេតិ – ‘‘អាមាវុសោ, បដិករិស្សាមី’’តិ. តំ សង្ឃោ អាបត្តិយា អប្បដិកម្មេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘បាបិកា តេ, អាវុសោ, ទិដ្ឋិ; បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘អាមាវុសោ, បដិនិស្សជ្ជិស្សាមី’’តិ. តំ សង្ឃោ បាបិកាយ ទិដ្ឋិយា អប្បដិនិស្សគ្គេ ឧក្ខិបតិ – អធម្មកម្មំ.

ឥធ បន, ភិក្ខវេ, ភិក្ខុស្ស ហោតិ អាបត្តិ ទដ្ឋព្ពា, ហោតិ អាបត្តិ បដិកាតព្ពា…បេ… ហោតិ អាបត្តិ ទដ្ឋព្ពា, ហោតិ បាបិកា ទិដ្ឋិ បដិនិស្សជ្ជេតា…បេ… ហោតិ អាបត្តិ បដិកាតព្ពា, ហោតិ បាបិកា ទិដ្ឋិ បដិនិស្សជ្ជេតា…បេ… ហោតិ អាបត្តិ ទដ្ឋព្ពា, ហោតិ អាបត្តិ បដិកាតព្ពា, ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិំ? បដិករោហិ តំ អាបត្តិំ; បាបិកា តេ ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘អាមាវុសោ, បស្សាមិ, អាម បដិករិស្សាមិ, អាម បដិនិស្សជ្ជិស្សាមី’’តិ. តំ សង្ឃោ អទស្សនេ វា អប្បដិកម្មេ វា អប្បដិនិស្សគ្គេ វា ឧក្ខិបតិ – អធម្មកម្មំ.

៣៩៩. ឥធ បន, ភិក្ខវេ, ភិក្ខុស្ស ហោតិ អាបត្តិ ទដ្ឋព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិ’’ន្តិ? សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យ’’ន្តិ. តំ សង្ឃោ អាបត្តិយា អទស្សនេ ឧក្ខិបតិ – ធម្មកម្មំ.

ឥធ បន, ភិក្ខវេ, ភិក្ខុស្ស ហោតិ អាបត្តិ បដិកាតព្ពា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បដិករោហិ តំ អាបត្តិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បដិករេយ្យ’’ន្តិ. តំ សង្ឃោ អាបត្តិយា អប្បដិកម្មេ ឧក្ខិបតិ – ធម្មកម្មំ.

ឥធ បន, ភិក្ខវេ, ភិក្ខុស្ស ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘បាបិកា តេ, អាវុសោ, ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ បាបិកាយ ទិដ្ឋិយា អប្បដិនិស្សគ្គេ ឧក្ខិបតិ – ធម្មកម្មំ.

ឥធ បន, ភិក្ខវេ, ភិក្ខុស្ស ហោតិ អាបត្តិ ទដ្ឋព្ពា, ហោតិ អាបត្តិ បដិកាតព្ពា…បេ…

ហោតិ អាបត្តិ ទដ្ឋព្ពា, ហោតិ បាបិកា ទិដ្ឋិ បដិនិស្សជ្ជេតា…បេ… ហោតិ អាបត្តិ បដិកាតព្ពា, ហោតិ បាបិកា ទិដ្ឋិ បដិនិស្សជ្ជេតា …បេ… ហោតិ អាបត្តិ ទដ្ឋព្ពា, ហោតិ អាបត្តិ បដិកាតព្ពា, ហោតិ បាបិកា ទិដ្ឋិ បដិនិស្សជ្ជេតា. តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា – ‘‘អាបត្តិំ ត្វំ, អាវុសោ, អាបន្នោ, បស្សសេតំ អាបត្តិំ? បដិករោហិ តំ អាបត្តិំ. បាបិកា តេ ទិដ្ឋិ, បដិនិស្សជ្ជេតំ បាបិកំ ទិដ្ឋិ’’ន្តិ. សោ ឯវំ វទេតិ – ‘‘នត្ថិ មេ, អាវុសោ, អាបត្តិ, យមហំ បស្សេយ្យំ. នត្ថិ មេ, អាវុសោ, អាបត្តិ យមហំ បដិករេយ្យំ. នត្ថិ មេ, អាវុសោ, បាបិកា ទិដ្ឋិ, យមហំ បដិនិស្សជ្ជេយ្យ’’ន្តិ. តំ សង្ឃោ អទស្សនេ វា អប្បដិកម្មេ វា អប្បដិនិស្សគ្គេ វា ឧក្ខិបតិ – ធម្មកម្មន្តិ.

អធម្មកម្មាទិកថា និដ្ឋិតា.