២៣៩. ទ្វេនិស្សារណាទិកថា

៣៩៥. ទ្វេមា, ភិក្ខវេ, និស្សារណា. អត្ថិ, ភិក្ខវេ, បុគ្គលោ អប្បត្តោ និស្សារណំ. តញ្ចេ សង្ឃោ និស្សារេតិ, ឯកច្ចោ សុនិស្សារិតោ, ឯកច្ចោ ទុន្និស្សារិតោ. កតមោ ច, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – ទុន្និស្សារិតោ? ឥធ បន, ភិក្ខវេ, ភិក្ខុ សុទ្ធោ ហោតិ អនាបត្តិកោ. តញ្ចេ សង្ឃោ និស្សារេតិ – ទុន្និស្សារិតោ. អយំ វុច្ចតិ, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – ទុន្និស្សារិតោ.

កតមោ ច, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – សុនិស្សារិតោ? ឥធ បន, ភិក្ខវេ, ភិក្ខុ ពាលោ ហោតិ អព្យត្តោ អាបត្តិពហុលោ អនបទានោ, គិហិសំសដ្ឋោ វិហរតិ អននុលោមិកេហិ គិហិសំសគ្គេហិ, តញ្ចេ សង្ឃោ និស្សារេតិ – សុនិស្សារិតោ. អយំ វុច្ចតិ, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – សុនិស្សារិតោ.

៣៩៦. ទ្វេមា, ភិក្ខវេ, ឱសារណា. អត្ថិ, ភិក្ខវេ, បុគ្គលោ អប្បត្តោ ឱសារណំ តញ្ចេ សង្ឃោ ឱសារេតិ, ឯកច្ចោ សោសារិតោ, ឯកច្ចោ ទោសារិតោ. កតមោ ច, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ? បណ្ឌកោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ. ថេយ្យសំវាសកោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ. តិត្ថិយបក្កន្តកោ, ភិក្ខវេ…បេ… តិរច្ឆានគតោ, ភិក្ខវេ… មាតុឃាតកោ, ភិក្ខវេ… បិតុឃាតកោ, ភិក្ខវេ… អរហន្តឃាតកោ, ភិក្ខវេ… ភិក្ខុនិទូសកោ, ភិក្ខវេ… សង្ឃភេទកោ, ភិក្ខវេ… លោហិតុប្បាទកោ, ភិក្ខវេ… ឧភតោព្យញ្ជនកោ, ភិក្ខវេ, អប្បត្តោ, ឱសារណំ, តញ្ចេ សង្ឃោ ឱសារេតិ – ទោសារិតោ. អយំ វុច្ចតិ, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ. ឥមេ វុច្ចន្តិ, ភិក្ខវេ, បុគ្គលា អប្បត្តា ឱសារណំ, តេ ចេ សង្ឃោ ឱសារេតិ – ទោសារិតា.

កតមោ ច, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ? ហត្ថច្ឆិន្នោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ, សោសារិតោ. បាទច្ឆិន្នោ, ភិក្ខវេ…បេ… ហត្ថបាទច្ឆិន្នោ, ភិក្ខវេ… កណ្ណច្ឆិន្នោ, ភិក្ខវេ… នាសច្ឆិន្នោ, ភិក្ខវេ… កណ្ណនាសច្ឆិន្នោ, ភិក្ខវេ… អង្គុលិច្ឆិន្នោ, ភិក្ខវេ… អឡច្ឆិន្នោ, ភិក្ខវេ… កណ្ឌរច្ឆិន្នោ, ភិក្ខវេ… ផណហត្ថកោ, ភិក្ខវេ… ខុជ្ជោ, ភិក្ខវេ… វាមនោ, ភិក្ខវេ… គលគណ្ឌី, ភិក្ខវេ… លក្ខណាហតោ, ភិក្ខវេ… កសាហតោ, ភិក្ខវេ… លិខិតកោ, ភិក្ខវេ… សីបទិកោ, ភិក្ខវេ… បាបរោគី, ភិក្ខវេ… បរិសទូសកោ, ភិក្ខវេ… កាណោ, ភិក្ខវេ… កុណី, ភិក្ខវេ… ខញ្ជោ, ភិក្ខវេ… បក្ខហតោ, ភិក្ខវេ… ឆិន្និរិយាបថោ, ភិក្ខវេ… ជរាទុព្ពលោ, ភិក្ខវេ… អន្ធោ, ភិក្ខវេ… មូគោ, ភិក្ខវេ… ពធិរោ, ភិក្ខវេ… អន្ធមូគោ, ភិក្ខវេ… អន្ធពធិរោ, ភិក្ខវេ… មូគពធិរោ, ភិក្ខវេ… អន្ធមូគពធិរោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ. អយំ វុច្ចតិ, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ. ឥមេ វុច្ចន្តិ, ភិក្ខវេ, បុគ្គលា អប្បត្តា ឱសារណំ, តេ ចេ សង្ឃោ ឱសារេតិ – សោសារិតា.

ទ្វេនិស្សារណាទិកថា និដ្ឋិតា.

វាសភគាមភាណវារោ និដ្ឋិតោ បឋមោ.