២៣៨. បារិវាសិកាទិកថា

៣៩៣. បារិវាសិកចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ. មូលាយ បដិកស្សនារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ. មានត្តារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ. មានត្តចារិកចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ. អព្ភានារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ.

៣៩៤. ឯកច្ចស្ស, ភិក្ខវេ, សង្ឃមជ្ឈេ បដិក្កោសនា រុហតិ, ឯកច្ចស្ស ន រុហតិ. កស្ស ច, ភិក្ខវេ, សង្ឃមជ្ឈេ បដិក្កោសនា ន រុហតិ? ភិក្ខុនិយា, ភិក្ខវេ, សង្ឃមជ្ឈេ បដិក្កោសនា ន រុហតិ. សិក្ខមានាយ, ភិក្ខវេ…បេ… សាមណេរស្ស, ភិក្ខវេ… សាមណេរិយា, ភិក្ខវេ… សិក្ខាបច្ចក្ខាតកស្ស ភិក្ខវេ… អន្តិមវត្ថុំ អជ្ឈាបន្នកស្ស, ភិក្ខវេ … ឧម្មត្តកស្ស, ភិក្ខវេ… ខិត្តចិត្តស្ស, ភិក្ខវេ… វេទនាដ្ដស្ស, ភិក្ខវេ… អាបត្តិយា អទស្សនេ ឧក្ខិត្តកស្ស, ភិក្ខវេ… អាបត្តិយា អប្បដិកម្មេ ឧក្ខិត្តកស្ស, ភិក្ខវេ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកស្ស, ភិក្ខវេ… បណ្ឌកស្ស, ភិក្ខវេ… ថេយ្យសំវាសកស្ស, ភិក្ខវេ… តិត្ថិយបក្កន្តកស្ស, ភិក្ខវេ … តិរច្ឆានគតស្ស ភិក្ខវេ… មាតុឃាតកស្ស, ភិក្ខវេ… បិតុឃាតកស្ស, ភិក្ខវេ… អរហន្តឃាតកស្ស, ភិក្ខវេ… ភិក្ខុនិទូសកស្ស, ភិក្ខវេ… សង្ឃភេទកស្ស, ភិក្ខវេ… លោហិតុប្បាទកស្ស, ភិក្ខវេ… ឧភតោព្យញ្ជនកស្ស, ភិក្ខវេ… នានាសំវាសកស្ស, ភិក្ខវេ… នានាសីមាយ ឋិតស្ស, ភិក្ខវេ… ឥទ្ធិយា វេហាសេ ឋិតស្ស, ភិក្ខវេ, យស្ស សង្ឃោ កម្មំ ករោតិ, តស្ស ច [តស្ស (ស្យា.)], ភិក្ខវេ, សង្ឃមជ្ឈេ បដិក្កោសនា ន រុហតិ. ឥមេសំ ខោ, ភិក្ខវេ, សង្ឃមជ្ឈេ បដិក្កោសនា ន រុហតិ.

កស្ស ច, ភិក្ខវេ, សង្ឃមជ្ឈេ បដិក្កោសនា រុហតិ? ភិក្ខុស្ស, ភិក្ខវេ, បកតត្តស្ស

សមានសំវាសកស្ស សមានសីមាយ ឋិតស្ស អន្តមសោ អានន្តរិកស្សាបិ [អនន្តរិកស្សាបិ (ស្យា.)] ភិក្ខុនោ វិញ្ញាបេន្តស្ស សង្ឃមជ្ឈេ បដិក្កោសនា រុហតិ. ឥមស្ស ខោ, ភិក្ខវេ, សង្ឃមជ្ឈេ បដិក្កោសនា រុហតិ.

បារិវាសិកាទិកថា និដ្ឋិតា.