២៣៥. អធម្មេន វគ្គាទិកម្មកថា

៣៨២. តេន ខោ បន សមយេន ចម្បាយំ ភិក្ខូ ឯវរូបានិ កម្មានិ ករោន្តិ – អធម្មេន វគ្គកម្មំ ករោន្តិ, អធម្មេន សមគ្គកម្មំ ករោន្តិ; ធម្មេន វគ្គកម្មំ ករោន្តិ, ធម្មបតិរូបកេន វគ្គកម្មំ ករោន្តិ; ធម្មបតិរូបកេន សមគ្គកម្មំ ករោន្តិ; ឯកោបិ ឯកំ ឧក្ខិបតិ, ឯកោបិ ទ្វេ ឧក្ខិបតិ, ឯកោបិ សម្ពហុលេ ឧក្ខិបតិ, ឯកោបិ សង្ឃំ ឧក្ខិបតិ; ទ្វេបិ ឯកំ ឧក្ខិបន្តិ, ទ្វេបិ ទ្វេ ឧក្ខិបន្តិ, ទ្វេបិ សម្ពហុលេ ឧក្ខិបន្តិ, ទ្វេបិ សង្ឃំ ឧក្ខិបន្តិ; សម្ពហុលាបិ ឯកំ ឧក្ខិបន្តិ; សម្ពហុលាបិ ទ្វេ ឧក្ខិបន្តិ, សម្ពហុលាបិ សម្ពហុលេ ឧក្ខិបន្តិ, សម្ពហុលាបិ សង្ឃំ ឧក្ខិបន្តិ; សង្ឃោបិ សង្ឃំ ឧក្ខិបតិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ចម្បាយំ ភិក្ខូ ឯវរូបានិ កម្មានិ ករិស្សន្តិ – អធម្មេន វគ្គកម្មំ ករិស្សន្តិ, អធម្មេន សមគ្គកម្មំ ករិស្សន្តិ, ធម្មេន វគ្គកម្មំ ករិស្សន្តិ, ធម្មបតិរូបកេន វគ្គកម្មំ ករិស្សន្តិ, ធម្មបតិរូបកេន សមគ្គកម្មំ ករិស្សន្តិ, ឯកោបិ ឯកំ ឧក្ខិបិស្សតិ, ឯកោបិ ទ្វេ ឧក្ខិបិស្សតិ, ឯកោបិ សម្ពហុលេ ឧក្ខិបិស្សតិ, ឯកោបិ សង្ឃំ ឧក្ខិបិស្សតិ, ទ្វេបិ ឯកំ ឧក្ខិបិស្សន្តិ, ទ្វេបិ ទ្វេ ឧក្ខិបិស្សន្តិ, ទ្វេបិ សម្ពហុលេ ឧក្ខិបិស្សន្តិ, ទ្វេបិ សង្ឃំ ឧក្ខិបិស្សន្តិ, សម្ពហុលាបិ ឯកំ ឧក្ខិបិស្សន្តិ, សម្ពហុលាបិ ទ្វេ ឧក្ខិបិស្សន្តិ, សម្ពហុលាបិ សម្ពហុលេ ឧក្ខិបិស្សន្តិ, សម្ពហុលាបិ សង្ឃំ ឧក្ខិបិស្សន្តិ, សង្ឃោបិ សង្ឃំ ឧក្ខិបិស្សតី’’តិ. អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… ‘‘សច្ចំ កិរ, ភិក្ខវេ, ចម្បាយំ ភិក្ខូ ឯវរូបានិ កម្មានិ ករោន្តិ – អធម្មេន វគ្គកម្មំ ករោន្តិ…បេ… សង្ឃោបិ សង្ឃំ ឧក្ខិបតី’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា – ‘‘អននុច្ឆវិកំ, ភិក្ខវេ, តេសំ មោឃបុរិសានំ អននុលោមិកំ អប្បតិរូបំ អស្សាមណកំ អកប្បិយំ អករណីយំ. កថញ្ហិ នាម តេ, ភិក្ខវេ, មោឃបុរិសា ឯវរូបានិ កម្មានិ ករិស្សន្តិ – អធម្មេន វគ្គកម្មំ ករិស្សន្តិ…បេ… សង្ឃោបិ សង្ឃំ ឧក្ខិបិស្សតិ. នេតំ, ភិក្ខវេ, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ –

៣៨៣. ‘‘អធម្មេន ចេ, ភិក្ខវេ, វគ្គកម្មំ អកម្មំ ន ច ករណីយំ, អធម្មេន [អធម្មេន ចេ ភិក្ខវេ (ស្យា.)] សមគ្គកម្មំ អកម្មំ ន ច ករណីយំ, ធម្មេន វគ្គកម្មំ អកម្មំ ន ច ករណីយំ; ធម្មបតិរូបកេន វគ្គកម្មំ អកម្មំ ន ច ករណីយំ, ធម្មបតិរូបកេន សមគ្គកម្មំ អកម្មំ ន ច ករណីយំ; ឯកោបិ ឯកំ ឧក្ខិបតិ អកម្មំ ន ច ករណីយំ, ឯកោបិ ទ្វេ ឧក្ខិបតិ អកម្មំ ន ច ករណីយំ, ឯកោបិ សម្ពហុលេ ឧក្ខិបតិ អកម្មំ ន ច ករណីយំ, ឯកោបិ សង្ឃំ ឧក្ខិបតិ អកម្មំ ន ច ករណីយំ; ទ្វេបិ ឯកំ ឧក្ខិបន្តិ អកម្មំ ន ច ករណីយំ, ទ្វេបិ ទ្វេ ឧក្ខិបន្តិ អកម្មំ ន ច ករណីយំ, ទ្វេបិ សម្ពហុលេ ឧក្ខិបន្តិ អកម្មំ ន ច ករណីយំ, ទ្វេបិ សង្ឃំ ឧក្ខិបន្តិ អកម្មំ ន ច ករណីយំ; សម្ពហុលាបិ ឯកំ ឧក្ខិបន្តិ អកម្មំ ន ច ករណីយំ, សម្ពហុលាបិ ទ្វេ ឧក្ខិបន្តិ អកម្មំ ន ច ករណីយំ, សម្ពហុលាបិ សម្ពហុលេ ឧក្ខិបន្តិ អកម្មំ ន ច ករណីយំ, សម្ពហុលាបិ សង្ឃំ ឧក្ខិបន្តិ អកម្មំ ន ច ករណីយំ; សង្ឃោបិ សង្ឃំ ឧក្ខិបតិ អកម្មំ ន ច ករណីយំ.

៣៨៤. ‘‘ចត្តារិមានិ, ភិក្ខវេ, កម្មានិ – អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មេន សមគ្គកម្មំ. តត្រ, ភិក្ខវេ, យទិទំ អធម្មេន វគ្គកម្មំ, ឥទំ, ភិក្ខវេ, កម្មំ អធម្មត្តា វគ្គត្តា កុប្បំ អដ្ឋានារហំ; ន, ភិក្ខវេ, ឯវរូបំ កម្មំ កាតព្ពំ, ន ច មយា ឯវរូបំ កម្មំ អនុញ្ញាតំ. តត្រ, ភិក្ខវេ, យទិទំ អធម្មេន សមគ្គកម្មំ, ឥទំ, ភិក្ខវេ, កម្មំ អធម្មត្តា កុប្បំ អដ្ឋានារហំ; ន, ភិក្ខវេ, ឯវរូបំ កម្មំ កាតព្ពំ, ន ច មយា ឯវរូបំ កម្មំ អនុញ្ញាតំ. តត្រ, ភិក្ខវេ, យទិទំ ធម្មេន វគ្គកម្មំ, ឥទំ, ភិក្ខវេ, កម្មំ វគ្គត្តា កុប្បំ អដ្ឋានារហំ; ន, ភិក្ខវេ, ឯវរូបំ កម្មំ កាតព្ពំ, ន ច មយា ឯវរូបំ កម្មំ អនុញ្ញាតំ. តត្រ, ភិក្ខវេ, យទិទំ ធម្មេន សមគ្គកម្មំ, ឥទំ, ភិក្ខវេ, កម្មំ ធម្មត្តា សមគ្គត្តា អកុប្បំ ឋានារហំ; ឯវរូបំ, ភិក្ខវេ, កម្មំ កាតព្ពំ, ឯវរូបញ្ច មយា កម្មំ អនុញ្ញាតំ. តស្មាតិហ, ភិក្ខវេ, ឯវរូបំ កម្មំ ករិស្សាម យទិទំ ធម្មេន សមគ្គន្តិ – ឯវញ្ហិ វោ, ភិក្ខវេ, សិក្ខិតព្ព’’ន្តិ.

អធម្មេន វគ្គាទិកម្មកថា និដ្ឋិតា.