២៣៦. ញត្តិវិបន្នកម្មាទិកថា

៣៨៥. តេន ខោ បន សមយេន ឆព្ពគ្គិយា ភិក្ខូ ឯវរូបានិ កម្មានិ ករោន្តិ – អធម្មេន វគ្គកម្មំ ករោន្តិ, អធម្មេន សមគ្គកម្មំ ករោន្តិ; ធម្មេន វគ្គកម្មំ ករោន្តិ, ធម្មបតិរូបកេន វគ្គកម្មំ ករោន្តិ, ធម្មបតិរូបកេន សមគ្គកម្មំ ករោន្តិ; ញត្តិវិបន្នម្បិ កម្មំ ករោន្តិ អនុស្សាវនសម្បន្នំ, អនុស្សាវនវិបន្នម្បិ កម្មំ ករោន្តិ ញត្តិសម្បន្នំ, ញត្តិវិបន្នម្បិ អនុស្សាវនវិបន្នម្បិ កម្មំ ករោន្តិ; អញ្ញត្រាបិ ធម្មា កម្មំ ករោន្តិ, អញ្ញត្រាបិ វិនយា កម្មំ ករោន្តិ, អញ្ញត្រាបិ សត្ថុសាសនា កម្មំ ករោន្តិ; បដិកុដ្ឋកតម្បិ កម្មំ ករោន្តិ អធម្មិកំ កុប្បំ អដ្ឋានារហំ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ ឯវរូបានិ កម្មានិ ករិស្សន្តិ – អធម្មេន វគ្គកម្មំ ករិស្សន្តិ, អធម្មេន សមគ្គកម្មំ ករិស្សន្តិ; ធម្មេន វគ្គកម្មំ ករិស្សន្តិ, ធម្មបតិរូបកេន វគ្គកម្មំ ករិស្សន្តិ, ធម្មបតិរូបកេន សមគ្គកម្មំ ករិស្សន្តិ; ញត្តិវិបន្នម្បិ កម្មំ ករិស្សន្តិ អនុស្សាវនសម្បន្នំ, អនុស្សាវនវិបន្នម្បិ កម្មំ ករិស្សន្តិ ញត្តិសម្បន្នំ, ញត្តិវិបន្នម្បិ អនុស្សាវនវិបន្នម្បិ កម្មំ ករិស្សន្តិ; អញ្ញត្រាបិ ធម្មា កម្មំ ករិស្សន្តិ, អញ្ញត្រាបិ វិនយា កម្មំ ករិស្សន្តិ, អញ្ញត្រាបិ សត្ថុសាសនា កម្មំ ករិស្សន្តិ; បដិកុដ្ឋកតម្បិ កម្មំ ករិស្សន្តិ អធម្មិកំ កុប្បំ អដ្ឋានារហ’’ន្តិ. អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… ‘‘សច្ចំ កិរ, ភិក្ខវេ, ឆព្ពគ្គិយា ភិក្ខូ ឯវរូបានិ កម្មានិ ករោន្តិ – អធម្មេន វគ្គកម្មំ ករោន្តិ…បេ… បដិកុដ្ឋកតម្បិ កម្មំ ករោន្តិ អធម្មិកំ កុប្បំ អដ្ឋានារហ’’ន្តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… វិគរហិត្វា ធម្មិំ កថំ កត្វា ភិក្ខូ អាមន្តេសិ –

៣៨៦. ‘‘អធម្មេន ចេ, ភិក្ខវេ, វគ្គកម្មំ អកម្មំ ន ច ករណីយំ; អធម្មេន សមគ្គកម្មំ អកម្មំ ន ច ករណីយំ; ធម្មេន វគ្គកម្មំ អកម្មំ ន ច ករណីយំ; ធម្មបតិរូបកេន វគ្គកម្មំ អកម្មំ ន ច ករណីយំ; ធម្មបតិរូបកេន សមគ្គកម្មំ អកម្មំ ន ច ករណីយំ. ញត្តិវិបន្នញ្ចេ, ភិក្ខវេ, កម្មំ អនុស្សាវនសម្បន្នំ អកម្មំ ន ច ករណីយំ; អនុស្សាវនវិបន្នញ្ចេ, ភិក្ខវេ, កម្មំ ញត្តិសម្បន្នំ អកម្មំ ន ច ករណីយំ; ញត្តិវិបន្នញ្ចេ, ភិក្ខវេ, កម្មំ អនុស្សាវនវិបន្នំ អកម្មំ ន ច ករណីយំ; អញ្ញត្រាបិ ធម្មា កម្មំ អកម្មំ ន ច ករណីយំ; អញ្ញត្រាបិ វិនយា កម្មំ អកម្មំ ន ច ករណីយំ; អញ្ញត្រាបិ សត្ថុសាសនា កម្មំ អកម្មំ ន ច ករណីយំ; បដិកុដ្ឋកតញ្ចេ, ភិក្ខវេ, កម្មំ អធម្មិកំ កុប្បំ អដ្ឋានារហំ អកម្មំ ន ច ករណីយំ.

៣៨៧. ឆយិមានិ, ភិក្ខវេ, កម្មានិ – អធម្មកម្មំ, វគ្គកម្មំ, សមគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, ធម្មេន សមគ្គកម្មំ.

កតមញ្ច, ភិក្ខវេ, អធម្មកម្មំ? ញត្តិទុតិយេ ចេ, ភិក្ខវេ, កម្មេ ឯកាយ ញត្តិយា កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិទុតិយេ ចេ, ភិក្ខវេ, កម្មេ ទ្វីហិ ញត្តីហិ កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិទុតិយេ ចេ, ភិក្ខវេ, កម្មេ ឯកាយ កម្មវាចាយ កម្មំ ករោតិ, ន ច ញត្តិំ ឋបេតិ – អធម្មកម្មំ. ញត្តិទុតិយេ ចេ, ភិក្ខវេ, កម្មេ ទ្វីហិ កម្មវាចាហិ កម្មំ ករោតិ, ន ច ញត្តិំ ឋបេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ឯកាយ ញត្តិយា កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ទ្វីហិ ញត្តីហិ កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ តីហិ ញត្តីហិ កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ចតូហិ ញត្តីហិ កម្មំ ករោតិ, ន ច កម្មវាចំ អនុស្សាវេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ឯកាយ កម្មវាចាយ កម្មំ ករោតិ, ន ច ញត្តិំ ឋបេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ទ្វីហិ កម្មវាចាហិ កម្មំ ករោតិ, ន ច ញត្តិំ ឋបេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ តីហិ កម្មវាចាហិ កម្មំ ករោតិ, ន ច ញត្តិំ ឋបេតិ – អធម្មកម្មំ. ញត្តិចតុត្ថេ ចេ, ភិក្ខវេ, កម្មេ ចតូហិ កម្មវាចាហិ កម្មំ ករោតិ, ន ច ញត្តិំ ឋបេតិ – អធម្មកម្មំ. ឥទំ វុច្ចតិ, ភិក្ខវេ, អធម្មកម្មំ.

កតមញ្ច, ភិក្ខវេ, វគ្គកម្មំ? ញត្តិទុតិយេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អនាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ញត្តិទុតិយេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ញត្តិទុតិយេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ញត្តិចតុត្ថេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អនាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ញត្តិចតុត្ថេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ញត្តិចតុត្ថេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា បដិក្កោសន្តិ – វគ្គកម្មំ. ឥទំ វុច្ចតិ, ភិក្ខវេ, វគ្គកម្មំ.

កតមញ្ច, ភិក្ខវេ, សមគ្គកម្មំ? ញត្តិទុតិយេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា, តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ – សមគ្គកម្មំ. ញត្តិចតុត្ថេ ចេ, ភិក្ខវេ, កម្មេ យាវតិកា ភិក្ខូ កម្មប្បត្តា, តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ – សមគ្គកម្មំ. ឥទំ វុច្ចតិ, ភិក្ខវេ, សមគ្គកម្មំ.

កតមញ្ច, ភិក្ខវេ, ធម្មបតិរូបកេន វគ្គកម្មំ? ញត្តិទុតិយេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អនាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ញត្តិទុតិយេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ញត្តិទុតិយេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ញត្តិចតុត្ថេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អនាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ញត្តិចតុត្ថេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អនាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ញត្តិចតុត្ថេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា បដិក្កោសន្តិ – ធម្មបតិរូបកេន វគ្គកម្មំ. ឥទំ វុច្ចតិ, ភិក្ខវេ, ធម្មបតិរូបកេន វគ្គកម្មំ.

កតមញ្ច, ភិក្ខវេ, ធម្មបតិរូបកេន សមគ្គកម្មំ? ញត្តិទុតិយេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា, តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ – ធម្មបតិរូបកេន សមគ្គកម្មំ. ញត្តិចតុត្ថេ ចេ, ភិក្ខវេ, កម្មេ បឋមំ កម្មវាចំ អនុស្សាវេតិ, បច្ឆា ញត្តិំ ឋបេតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ – ធម្មបតិរូបកេន សមគ្គកម្មំ. ឥទំ វុច្ចតិ, ភិក្ខវេ, ធម្មបតិរូបកេន សមគ្គកម្មំ.

កតមញ្ច, ភិក្ខវេ, ធម្មេន សមគ្គកម្មំ? ញត្តិទុតិយេ ចេ, ភិក្ខវេ, កម្មេ បឋមំ ញត្តិំ ឋបេតិ, បច្ឆា ឯកាយ កម្មវាចាយ កម្មំ ករោតិ, យាវតិកា ភិក្ខូ កម្មប្បត្តា តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ – ធម្មេន សមគ្គកម្មំ. ញត្តិចតុត្ថេ ចេ, ភិក្ខវេ, កម្មេ បឋមំ ញត្តិំ ឋបេតិ, បច្ឆា តីហិ កម្មវាចាហិ កម្មំ ករោតិ, យាវតិកា ភិក្ខូ កម្មប្បត្តា, តេ អាគតា ហោន្តិ, ឆន្ទារហានំ ឆន្ទោ អាហដោ ហោតិ, សម្មុខីភូតា ន បដិក្កោសន្តិ, ធម្មេន សមគ្គកម្មំ. ឥទំ វុច្ចតិ, ភិក្ខវេ, ធម្មេន សមគ្គកម្មំ.

ញត្តិវិបន្នកម្មាទិកថា និដ្ឋិតា.