២៣២. អដ្ឋចីវរមាតិកា

៣៧៩. អដ្ឋិមា, ភិក្ខវេ, មាតិកា ចីវរស្ស ឧប្បាទាយ – សីមាយ ទេតិ, កតិកាយ ទេតិ, ភិក្ខាបញ្ញត្តិយា ទេតិ, សង្ឃស្ស ទេតិ, ឧភតោសង្ឃស្ស ទេតិ, វស្សំវុដ្ឋសង្ឃស្ស ទេតិ, អាទិស្ស ទេតិ, បុគ្គលស្ស ទេតិ.

សីមាយ ទេតិ – យាវតិកា ភិក្ខូ អន្តោសីមគតា តេហិ ភាជេតព្ពំ. កតិកាយ ទេតិ – សម្ពហុលា អាវាសា សមានលាភា ហោន្តិ ឯកស្មិំ អាវាសេ ទិន្នេ សព្ពត្ថ ទិន្នំ ហោតិ. ភិក្ខាបញ្ញត្តិយា ទេតិ, យត្ថ សង្ឃស្ស ធុវការា ករិយ្យន្តិ, តត្ថ ទេតិ. សង្ឃស្ស ទេតិ, សម្មុខីភូតេន សង្ឃេន ភាជេតព្ពំ. ឧភតោសង្ឃស្ស ទេតិ, ពហុកាបិ ភិក្ខូ ហោន្តិ, ឯកា ភិក្ខុនី ហោតិ, ឧបឌ្ឍំ ទាតព្ពំ, ពហុកាបិ ភិក្ខុនិយោ ហោន្តិ, ឯកោ ភិក្ខុ ហោតិ, ឧបឌ្ឍំ ទាតព្ពំ. វស្សំវុដ្ឋសង្ឃស្ស ទេតិ, យាវតិកា ភិក្ខូ តស្មិំ អាវាសេ វស្សំវុដ្ឋា, តេហិ ភាជេតព្ពំ. អាទិស្ស ទេតិ, យាគុយា វា ភត្តេ វា ខាទនីយេ វា ចីវរេ វា សេនាសនេ វា ភេសជ្ជេ វា. បុគ្គលស្ស ទេតិ, ‘‘ឥមំ ចីវរំ ឥត្ថន្នាមស្ស ទម្មី’’តិ.

អដ្ឋចីវរមាតិកា និដ្ឋិតា.

ចីវរក្ខន្ធកោ អដ្ឋមោ.