២២៧. កុសចីរាទិបដិក្ខេបកថា

៣៧១. តេន ខោ បន សមយេន អញ្ញតរោ ភិក្ខុ កុសចីរំ និវាសេត្វា…បេ… វាកចីរំ និវាសេត្វា…បេ… ផលកចីរំ និវាសេត្វា…បេ… កេសកម្ពលំ និវាសេត្វា…បេ… វាឡកម្ពលំ និវាសេត្វា…បេ… ឧលូកបក្ខំ និវាសេត្វា…បេ… អជិនក្ខិបំ និវាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ ឯតទវោច – ‘‘ភគវា, ភន្តេ, អនេកបរិយាយេន អប្បិច្ឆស្ស សន្តុដ្ឋស្ស សល្លេខស្ស ធុតស្ស បាសាទិកស្ស អបចយស្ស វីរិយារម្ភស្ស វណ្ណវាទី. ឥទំ, ភន្តេ, អជិនក្ខិបំ អនេកបរិយាយេន អប្បិច្ឆតាយ សន្តុដ្ឋិតាយ សល្លេខាយ ធុតតាយ បាសាទិកតាយ អបចយាយ វីរិយារម្ភាយ សំវត្តតិ. សាធុ, ភន្តេ, ភគវា ភិក្ខូនំ អជិនក្ខិបំ អនុជានាតូ’’តិ. វិគរហិ ពុទ្ធោ ភគវា – ‘‘អននុច្ឆវិកំ, មោឃបុរិស, អននុលោមិកំ អប្បតិរូបំ អស្សាមណកំ អកប្បិយំ អករណីយំ. កថញ្ហិ នាម ត្វំ, មោឃបុរិស, អជិនក្ខិបំ តិត្ថិយធជំ ធារេស្សសិ. នេតំ, មោឃបុរិស, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, អជិនក្ខិបំ តិត្ថិយធជំ ធារេតព្ពំ. យោ ធារេយ្យ, អាបត្តិ ថុល្លច្ចយស្សា’’តិ.

តេន ខោ បន សមយេន អញ្ញតរោ ភិក្ខុ អក្កនាឡំ និវាសេត្វា…បេ… បោត្ថកំ និវាសេត្វា យេន ភគវា តេនុបសង្កមិ, ឧបសង្កមិត្វា ភគវន្តំ ឯតទវោច – ‘‘ភគវា, ភន្តេ, អនេកបរិយាយេន អប្បិច្ឆស្ស សន្តុដ្ឋស្ស សល្លេខស្ស ធុតស្ស បាសាទិកស្ស អបចយស្ស វីរិយារម្ភស្ស, វណ្ណវាទី. អយំ, ភន្តេ, បោត្ថកោ អនេកបរិយាយេន អប្បិច្ឆតាយ សន្តុដ្ឋិតាយ សល្លេខាយ ធុតតាយ បាសាទិកតាយ អបចយាយ វីរិយារម្ភាយ សំវត្តតិ. សាធុ, ភន្តេ, ភគវា ភិក្ខូនំ បោត្ថកំ អនុជានាតូ’’តិ. វិគរហិ ពុទ្ធោ ភគវា – ‘‘អននុច្ឆវិកំ, មោឃបុរិស, អននុលោមិកំ អប្បតិរូបំ អស្សាមណកំ អកប្បិយំ អករណីយំ. កថញ្ហិ នាម ត្វំ, មោឃបុរិស, បោត្ថកំ និវាសេស្សសិ. នេតំ, មោឃបុរិស, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, បោត្ថកោ និវាសេតព្ពោ. យោ និវាសេយ្យ, អាបត្តិ ទុក្កដស្សា’’តិ.

កុសចីរាទិបដិក្ខេបកថា និដ្ឋិតា.