២២៥. មតសន្តកកថា

៣៦៧. តេន ខោ បន សមយេន ទ្វេ ភិក្ខូ កោសលេសុ ជនបទេ អទ្ធានមគ្គប្បដិបន្នា ហោន្តិ. តេ អញ្ញតរំ អាវាសំ ឧបគច្ឆិំសុ. តត្ថ អញ្ញតរោ ភិក្ខុ គិលានោ ហោតិ. អថ ខោ តេសំ ភិក្ខូនំ ឯតទហោសិ – ‘‘ភគវតា ខោ, អាវុសោ, គិលានុបដ្ឋានំ វណ្ណិតំ. ហន្ទ, មយំ, អាវុសោ, ឥមំ ភិក្ខុំ ឧបដ្ឋហេមា’’តិ. តេ តំ ឧបដ្ឋហិំសុ. សោ តេហិ ឧបដ្ឋហិយមានោ កាលមកាសិ. អថ ខោ តេ ភិក្ខូ តស្ស ភិក្ខុនោ បត្តចីវរមាទាយ សាវត្ថិំ គន្ត្វា ភគវតោ ឯតមត្ថំ អារោចេសុំ. ‘‘ភិក្ខុស្ស, ភិក្ខវេ, កាលង្កតេ សង្ឃោ សាមី បត្តចីវរេ, អបិច គិលានុបដ្ឋាកា ពហូបការា. អនុជានាមិ, ភិក្ខវេ, សង្ឃេន តិចីវរញ្ច បត្តញ្ច គិលានុបដ្ឋាកានំ ទាតុំ. ឯវញ្ច បន, ភិក្ខវេ, ទាតព្ពំ. តេន គិលានុបដ្ឋាកេន ភិក្ខុនា សង្ឃំ ឧបសង្កមិត្វា ឯវមស្ស វចនីយោ – ‘ឥត្ថន្នាមោ, ភន្តេ, ភិក្ខុ កាលង្កតោ. ឥទំ តស្ស តិចីវរញ្ច បត្តោ ចា’’’តិ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. ឥត្ថន្នាមោ ភិក្ខុ កាលង្កតោ. ឥទំ តស្ស តិចីវរញ្ច បត្តោ ច. យទិ សង្ឃស្ស បត្តកល្លំ, សង្ឃោ ឥមំ តិចីវរញ្ច បត្តញ្ច គិលានុបដ្ឋាកានំ ទទេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. ឥត្ថន្នាមោ ភិក្ខុ កាលង្កតោ. ឥទំ តស្ស តិចីវរញ្ច បត្តោ ច. សង្ឃោ ឥមំ តិចីវរញ្ច បត្តញ្ច គិលានុបដ្ឋាកានំ ទេតិ. យស្សាយស្មតោ ខមតិ ឥមស្ស តិចីវរស្ស ច បត្តស្ស ច គិលានុបដ្ឋាកានំ ទានំ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘ទិន្នំ ឥទំ សង្ឃេន តិចីវរញ្ច បត្តោ ច គិលានុបដ្ឋាកានំ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

៣៦៨. តេន ខោ បន សមយេន អញ្ញតរោ សាមណេរោ កាលង្កតោ ហោតិ. ភគវតោ ឯតមត្ថំ អារោចេសុំ. សាមណេរស្ស, ភិក្ខវេ, កាលង្កតេ សង្ឃោ សាមី បត្តចីវរេ, អបិ ច គិលានុបដ្ឋាកា ពហូបការា. អនុជានាមិ, ភិក្ខវេ, សង្ឃេន ចីវរញ្ច បត្តញ្ច គិលានុបដ្ឋាកានំ ទាតុំ. ឯវញ្ច បន, ភិក្ខវេ, ទាតព្ពំ. តេន គិលានុបដ្ឋាកេន ភិក្ខុនា សង្ឃំ ឧបសង្កមិត្វា ឯវមស្ស វចនីយោ – ‘‘ឥត្ថន្នាមោ, ភន្តេ, សាមណេរោ កាលង្កតោ, ឥទំ តស្ស ចីវរញ្ច បត្តោ ចា’’តិ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. ឥត្ថន្នាមោ សាមណេរោ កាលង្កតោ. ឥទំ តស្ស ចីវរញ្ច បត្តោ ច. យទិ សង្ឃស្ស បត្តកល្លំ, សង្ឃោ ឥមំ ចីវរញ្ច បត្តញ្ច គិលានុបដ្ឋាកានំ ទទេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. ឥត្ថន្នាមោ សាមណេរោ កាលង្កតោ. ឥទំ តស្ស ចីវរញ្ច បត្តោ ច. សង្ឃោ ឥមំ ចីវរញ្ច បត្តញ្ច គិលានុបដ្ឋាកានំ ទេតិ. យស្សាយស្មតោ ខមតិ ឥមស្ស ចីវរស្ស ច បត្តស្ស ច គិលានុបដ្ឋាកានំ ទានំ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘ទិន្នំ ឥទំ សង្ឃេន ចីវរញ្ច បត្តោ ច គិលានុបដ្ឋាកានំ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

៣៦៩. តេន ខោ បន សមយេន អញ្ញតរោ ភិក្ខុ ច សាមណេរោ ច គិលានំ ឧបដ្ឋហិំសុ. សោ តេហិ ឧបដ្ឋហិយមានោ កាលមកាសិ. អថ ខោ តស្ស គិលានុបដ្ឋាកស្ស ភិក្ខុនោ ឯតទហោសិ – ‘‘កថំ នុ ខោ គិលានុបដ្ឋាកស្ស សាមណេរស្ស ចីវរបដិវីសោ ទាតព្ពោ’’តិ? ភគវតោ ឯតមត្ថំ អារោចេសុំ. អនុជានាមិ, ភិក្ខវេ, គិលានុបដ្ឋាកស្ស សាមណេរស្ស សមកំ បដិវីសំ ទាតុន្តិ.

តេន ខោ បន សមយេន អញ្ញតរោ ភិក្ខុ ពហុភណ្ឌោ ពហុបរិក្ខារោ កាលង្កតោ ហោតិ. ភគវតោ ឯតមត្ថំ អារោចេសុំ. ភិក្ខុស្ស, ភិក្ខវេ, កាលង្កតេ សង្ឃោ សាមី បត្តចីវរេ, អបិ ច គិលានុបដ្ឋាកា ពហូបការា. អនុជានាមិ, ភិក្ខវេ, សង្ឃេន តិចីវរញ្ច បត្តញ្ច គិលានុបដ្ឋាកានំ ទាតុំ. យំ តត្ថ លហុភណ្ឌំ លហុបរិក្ខារំ តំ សម្មុខីភូតេន សង្ឃេន ភាជេតុំ. យំ តត្ថ គរុភណ្ឌំ គរុបរិក្ខារំ តំ អាគតានាគតស្ស ចាតុទ្ទិសស្ស សង្ឃស្ស អវិស្សជ្ជិកំ អវេភង្គិកន្តិ.

មតសន្តកកថា និដ្ឋិតា.