២១០. វរយាចនាកថា

៣៣៧. អថ ខោ ភគវតោ កាយោ នចិរស្សេវ បកតត្តោ អហោសិ. អថ ខោ ជីវកោ កោមារភច្ចោ តំ សិវេយ្យកំ ទុស្សយុគំ អាទាយ យេន ភគវា តេនុបសង្កមិ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ ជីវកោ កោមារភច្ចោ ភគវន្តំ ឯតទវោច – ‘‘ឯកាហំ, ភន្តេ, ភគវន្តំ វរំ យាចាមី’’តិ. ‘‘អតិក្កន្តវរា ខោ, ជីវក, តថាគតា’’តិ. ‘‘យញ្ច, ភន្តេ, កប្បតិ យញ្ច អនវជ្ជ’’ន្តិ. ‘‘វទេហិ, ជីវកា’’តិ. ‘‘ភគវា, ភន្តេ, បំសុកូលិកោ, ភិក្ខុសង្ឃោ ច. ឥទំ មេ, ភន្តេ, សិវេយ្យកំ ទុស្សយុគំ រញ្ញា បជ្ជោតេន បហិតំ – ពហូនំ ទុស្សានំ ពហូនំ ទុស្សយុគានំ ពហូនំ ទុស្សយុគសតានំ ពហូនំ ទុស្សយុគសហស្សានំ ពហូនំ ទុស្សយុគសតសហស្សានំ អគ្គញ្ច សេដ្ឋញ្ច មោក្ខញ្ច ឧត្តមញ្ច បវរញ្ច. បដិគ្គណ្ហាតុ មេ, ភន្តេ, ភគវា សិវេយ្យកំ ទុស្សយុគំ; ភិក្ខុសង្ឃស្ស ច គហបតិចីវរំ អនុជានាតូ’’តិ. បដិគ្គហេសិ ភគវា សិវេយ្យកំ ទុស្សយុគំ. អថ ខោ ភគវា ជីវកំ កោមារភច្ចំ ធម្មិយា កថាយ សន្ទស្សេសិ សមាទបេសិ សមុត្តេជេសិ សម្បហំសេសិ. អថ ខោ ជីវកោ កោមារភច្ចោ ភគវតា ធម្មិយា កថាយ សន្ទស្សិតោ សមាទបិតោ សមុត្តេជិតោ សម្បហំសិតោ ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, គហបតិចីវរំ. យោ ឥច្ឆតិ, បំសុកូលិកោ ហោតុ. យោ ឥច្ឆតិ, គហបតិចីវរំ សាទិយតុ. ឥតរីតរេនបាហំ [បហំ (សី.), ចាហំ (ស្យា.)], ភិក្ខវេ, សន្តុដ្ឋិំ វណ្ណេមី’’តិ.

អស្សោសុំ ខោ រាជគហេ មនុស្សា – ‘‘ភគវតា កិរ ភិក្ខូនំ គហបតិចីវរំ អនុញ្ញាត’’ន្តិ. តេ ច មនុស្សា ហដ្ឋា អហេសុំ ឧទគ្គា ‘‘ឥទានិ ខោ មយំ ទានានិ ទស្សាម បុញ្ញានិ ករិស្សាម, យតោ ភគវតា ភិក្ខូនំ គហបតិចីវរំ អនុញ្ញាត’’ន្តិ. ឯកាហេនេវ រាជគហេ ពហូនិ ចីវរសហស្សានិ ឧប្បជ្ជិំសុ.

អស្សោសុំ ខោ ជានបទា មនុស្សា – ‘‘ភគវតា កិរ ភិក្ខូនំ គហបតិចីវរំ អនុញ្ញាត’’ន្តិ. តេ ច មនុស្សា ហដ្ឋា អហេសុំ ឧទគ្គា – ‘‘ឥទានិ ខោ មយំ ទានានិ ទស្សាម បុញ្ញានិ ករិស្សាម, យតោ ភគវតា ភិក្ខូនំ គហបតិចីវរំ អនុញ្ញាត’’ន្តិ. ជនបទេបិ ឯកាហេនេវ ពហូនិ ចីវរសហស្សានិ ឧប្បជ្ជិំសុ.

តេន ខោ បន សមយេន សង្ឃស្ស បាវារោ ឧប្បន្នោ ហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, បាវារន្តិ.

កោសេយ្យបាវារោ ឧប្បន្នោ ហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, កោសេយ្យបាវារន្តិ.

កោជវំ ឧប្បន្នំ ហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, កោជវន្តិ.

វរយាចនាកថា និដ្ឋិតា.

បឋមភាណវារោ និដ្ឋិតោ.