១៨៥. ចតុមហាបទេសកថា

៣០៥. តេន ខោ បន សមយេន ភិក្ខូនំ កិស្មិញ្ចិ កិស្មិញ្ចិ ឋានេ កុក្កុច្ចំ ឧប្បជ្ជតិ – ‘‘កិំ នុ ខោ ភគវតា អនុញ្ញាតំ, កិំ អននុញ្ញាត’’ន្តិ? ភគវតោ ឯតមត្ថំ អារោចេសុំ. ‘‘យំ, ភិក្ខវេ, មយា ‘ឥទំ ន កប្បតី’តិ អប្បដិក្ខិត្តំ តញ្ចេ អកប្បិយំ អនុលោមេតិ, កប្បិយំ បដិពាហតិ, តំ វោ ន កប្បតិ. យំ, ភិក្ខវេ, មយា ‘ឥទំ ន កប្បតី’តិ អប្បដិក្ខិត្តំ តញ្ចេ កប្បិយំ អនុលោមេតិ, អកប្បិយំ បដិពាហតិ, តំ វោ កប្បតិ. យំ, ភិក្ខវេ, មយា ‘ឥទំ កប្បតី’តិ អននុញ្ញាតំ តញ្ចេ អកប្បិយំ អនុលោមេតិ, កប្បិយំ បដិពាហតិ, តំ វោ ន កប្បតិ. យំ, ភិក្ខវេ, មយា ‘ឥទំ កប្បតី’តិ អននុញ្ញាតំ, តញ្ចេ កប្បិយំ អនុលោមេតិ, អកប្បិយំ បដិពាហតិ, តំ វោ កប្បតី’’តិ.

អថ ខោ ភិក្ខូនំ ឯតទហោសិ – ‘‘កប្បតិ នុ ខោ យាវកាលិកេន យាមកាលិកំ, ន នុ ខោ កប្បតិ? កប្បតិ នុ ខោ យាវកាលិកេន សត្តាហកាលិកំ, ន នុ ខោ កប្បតិ? កប្បតិ នុ ខោ យាវកាលិកេន យាវជីវិកំ, ន នុ ខោ កប្បតិ? កប្បតិ នុ ខោ យាមកាលិកេន សត្តាហកាលិកំ, ន នុ ខោ កប្បតិ? កប្បតិ នុ ខោ យាមកាលិកេន យាវជីវិកំ, ន នុ ខោ កប្បតិ? កប្បតិ នុ ខោ សត្តាហកាលិកេន យាវជីវិកំ, ន នុ ខោ កប្បតី’’តិ? ភគវតោ ឯតមត្ថំ អារោចេសុំ. ‘‘យាវកាលិកេន, ភិក្ខវេ, យាមកាលិកំ, តទហុ បដិគ្គហិតំ កាលេ កប្បតិ, វិកាលេ ន កប្បតិ. យាវកាលិកេន, ភិក្ខវេ, សត្តាហកាលិកំ, តទហុ បដិគ្គហិតំ កាលេ កប្បតិ, វិកាលេ ន កប្បតិ. យាវកាលិកេន, ភិក្ខវេ, យាវជីវិកំ, តទហុ បដិគ្គហិតំ កាលេ កប្បតិ, វិកាលេ ន កប្បតិ. យាមកាលិកេន, ភិក្ខវេ, សត្តាហកាលិកំ, តទហុ បដិគ្គហិតំ យាមេ កប្បតិ, យាមាតិក្កន្តេ ន កប្បតិ. យាមកាលិកេន, ភិក្ខវេ, យាវជីវិកំ, តទហុ បដិគ្គហិតំ យាមេ កប្បតិ, យាមាតិក្កន្តេ ន កប្បតិ. សត្តាហកាលិកេន, ភិក្ខវេ, យាវជីវិកំ បដិគ្គហិតំ, សត្តាហំ កប្បតិ, សត្តាហាតិក្កន្តេ ន កប្បតី’’តិ.

ចតុមហាបទេសកថា និដ្ឋិតា.

ភេសជ្ជក្ខន្ធកោ ឆដ្ឋោ.