១៨៦. តស្សុទ្ទានំ

សារទិកេ វិកាលេបិ, វសំ មូលេ បិដ្ឋេហិ ច;

កសាវេហិ បណ្ណំ ផលំ, ជតុ លោណំ ឆកណញ្ច.

ចុណ្ណំ ចាលិនិ មំសញ្ច, អញ្ជនំ ឧបបិសនី [ឧបបិំ សនី (សី.), ឧបបិំ សនំ (ស្យា.)];

អញ្ជនី ឧច្ចាបារុតា, សលាកា សលាកឋានិំ [សលាកោធនី (សី. ស្យា.)].

ថវិកំសពទ្ធកំ សុត្តំ, មុទ្ធនិតេលនត្ថុ ច;

នត្ថុករណី ធូមញ្ច, នេត្តញ្ចាបិធនត្ថវិ.

តេលបាកេសុ មជ្ជញ្ច, អតិក្ខិត្តំ អព្ភញ្ជនំ;

តុម្ពំ សេទំ សម្ភារញ្ច, មហា ភង្គោទកំ តថា.

ទកកោដ្ឋំ លោហិតញ្ច, វិសាណំ បាទព្ភញ្ជនំ;

បជ្ជំ សត្ថំ កសាវញ្ច, តិលកក្កំ កពឡិកំ.

ចោឡំ សាសបកុដ្ដញ្ច, ធូម សក្ខរិកាយ ច;

វណតេលំ វិកាសិកំ, វិកដញ្ច បដិគ្គហំ.

គូថំ ករោន្តោ លោឡិញ្ច, ខារំ មុត្តហរីតកំ;

គន្ធា វិរេចនញ្ចេវ, អច្ឆាកដំ កដាកដំ.

បដិច្ឆាទនិ បព្ភារា, អារាម សត្តាហេន ច;

គុឡំ មុគ្គំ សោវីរញ្ច, សាមំបាកា បុនាបចេ.

បុនានុញ្ញាសិ ទុព្ភិក្ខេ, ផលញ្ច តិលខាទនី;

បុរេភត្តំ កាយឌាហោ, និព្ពត្តញ្ច ភគន្ទលំ.

វត្ថិកម្មញ្ច សុប្បិញ្ច, មនុស្សមំសមេវ ច;

ហត្ថិអស្សា សុនខោ ច, អហិ សីហញ្ច ទីបិកំ [ហត្ថិអស្សសុនខាហិ, សីហព្យគ្ឃញ្ច ទីបិកំ (សី.)].

អច្ឆតរច្ឆមំសញ្ច, បដិបាដិ ច យាគុ ច;

តរុណំ អញ្ញត្រ គុឡំ, សុនិធាវសថាគារំ.

គង្គា កោដិសច្ចកថា, អម្ពបាលី ច លិច្ឆវី;

ឧទ្ទិស្ស កតំ សុភិក្ខំ, បុនទេវ បដិក្ខិបិ.

មេឃោ យសោ មេណ្ឌកោ, ច គោរសំ បាថេយ្យកេន ច;

កេណិ អម្ពោ ជម្ពុ ចោច, មោចមធុមុទ្ទិកសាលុកំ.

ផារុសកា ឌាកបិដ្ឋំ, អាតុមាយំ នហាបិតោ;

សាវត្ថិយំ ផលំ ពីជំ, កិស្មិំ ឋានេ ច កាលិកេតិ.

ឥមម្ហិ ខន្ធកេ វត្ថូ ឯកសតំ ឆវត្ថុ.

ភេសជ្ជក្ខន្ធកោ និដ្ឋិតោ.