១៦៧. សត្ថកម្មបដិក្ខេបកថា

២៧៩. អថ ខោ ភគវា សាវត្ថិយំ យថាភិរន្តំ វិហរិត្វា យេន រាជគហំ តេន ចារិកំ បក្កាមិ. អនុបុព្ពេន ចារិកំ ចរមានោ យេន រាជគហំ តទវសរិ. តត្រ សុទំ ភគវា រាជគហេ វិហរតិ វេឡុវនេ កលន្ទកនិវាបេ. តេន ខោ បន សមយេន អញ្ញតរស្ស ភិក្ខុនោ ភគន្ទលាពាធោ ហោតិ. អាកាសគោត្តោ វេជ្ជោ សត្ថកម្មំ ករោតិ. អថ ខោ ភគវា សេនាសនចារិកំ អាហិណ្ឌន្តោ យេន តស្ស ភិក្ខុនោ វិហារោ តេនុបសង្កមិ. អទ្ទសា ខោ អាកាសគោត្តោ វេជ្ជោ ភគវន្តំ ទូរតោវ អាគច្ឆន្តំ, ទិស្វាន ភគវន្តំ ឯតទវោច – ‘‘អាគច្ឆតុ ភវំ គោតមោ, ឥមស្ស ភិក្ខុនោ វច្ចមគ្គំ បស្សតុ, សេយ្យថាបិ គោធាមុខ’’ន្តិ. អថ ខោ ភគវា – ‘‘សោ មំ ខ្វាយំ មោឃបុរិសោ ឧប្បណ្ឌេតី’’តិ – តតោវ បដិនិវត្តិត្វា, ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា, ភិក្ខូ បដិបុច្ឆិ – ‘‘អត្ថិ កិរ, ភិក្ខវេ, អមុកស្មិំ វិហារេ ភិក្ខុ គិលានោ’’តិ? ‘‘អត្ថិ ភគវា’’តិ. ‘‘កិំ តស្ស, ភិក្ខវេ, ភិក្ខុនោ អាពាធោ’’តិ? ‘‘តស្ស, ភន្តេ, អាយស្មតោ ភគន្ទលាពាធោ, អាកាសគោត្តោ វេជ្ជោ សត្ថកម្មំ ករោតី’’តិ. វិគរហិ ពុទ្ធោ ភគវា – ‘‘អននុច្ឆវិកំ, ភិក្ខវេ, តស្ស មោឃបុរិសស្ស, អននុលោមិកំ, អប្បតិរូបំ, អស្សាមណកំ, អកប្បិយំ, អករណីយំ. កថញ្ហិ នាម សោ, ភិក្ខវេ, មោឃបុរិសោ សម្ពាធេ សត្ថកម្មំ ការាបេស្សតិ. សម្ពាធេ, ភិក្ខវេ, សុខុមា ឆវិ, ទុរោបយោ វណោ, ទុប្បរិហារំ សត្ថំ. នេតំ, ភិក្ខវេ, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, សម្ពាធេ សត្ថកម្មំ ការាបេតព្ពំ. យោ ការាបេយ្យ, អាបត្តិ ថុល្លច្ចយស្សា’’តិ.

តេន ខោ បន សមយេន ឆព្ពគ្គិយា ភិក្ខូ – ភគវតា សត្ថកម្មំ បដិក្ខិត្តន្តិ – វត្ថិកម្មំ ការាបេន្តិ. យេ តេ ភិក្ខូ អប្បិច្ឆា, តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ វត្ថិកម្មំ ការាបេស្សន្តី’’តិ. អថ ខោ តេ ភិក្ខូ ភគវតោ ឯតមត្ថំ អារោចេសុំ. ‘‘សច្ចំ កិរ, ភិក្ខវេ, ឆព្ពគ្គិយា ភិក្ខូ វត្ថិកម្មំ ការាបេន្តី’’តិ? ‘‘សច្ចំ ភគវា’’តិ…បេ… វិគរហិត្វា ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, សម្ពាធស្ស សាមន្តា ទ្វង្គុលា សត្ថកម្មំ វា វត្ថិកម្មំ វា ការាបេតព្ពំ. យោ ការាបេយ្យ, អាបត្តិ ថុល្លច្ចយស្សា’’តិ.

សត្ថកម្មបដិក្ខេបកថា និដ្ឋិតា.