១៥១. អជ្ឈារាមេ ឧបាហនបដិក្ខេបោ

២៤៨. តេន ខោ បន សមយេន ភគវា អជ្ឈោកាសេ អនុបាហនោ ចង្កមតិ. សត្ថា អនុបាហនោ ចង្កមតីតិ, ថេរាបិ ភិក្ខូ អនុបាហនា ចង្កមន្តិ. ឆព្ពគ្គិយា ភិក្ខូ, សត្ថរិ អនុបាហនេ ចង្កមមានេ, ថេរេសុបិ ភិក្ខូសុ អនុបាហនេសុ ចង្កមមានេសុ, សឧបាហនា ចង្កមន្តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ, សត្ថរិ អនុបាហនេ ចង្កមមានេ, ថេរេសុបិ ភិក្ខូសុ អនុបាហនេសុ ចង្កមមានេសុ, សឧបាហនា ចង្កមិស្សន្តី’’តិ. អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… ‘‘សច្ចំ កិរ, ភិក្ខវេ, ឆព្ពគ្គិយា ភិក្ខូ, សត្ថរិ អនុបាហនេ ចង្កមមានេ, ថេរេសុបិ ភិក្ខូសុ អនុបាហនេសុ ចង្កមមានេសុ, សឧបាហនា ចង្កមន្តី’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… ‘‘កថញ្ហិ នាម តេ, ភិក្ខវេ, មោឃបុរិសា, សត្ថរិ អនុបាហនេ ចង្កមមានេ, ថេរេសុបិ ភិក្ខូសុ អនុបាហនេសុ ចង្កមមានេសុ, សឧបាហនា ចង្កមិស្សន្តិ. ឥមេ ហិ នាម, ភិក្ខវេ, គិហី ឱទាតវត្ថវសនកា អភិជីវនិកស្ស សិប្បស្ស ការណា អាចរិយេសុ សគារវា សប្បតិស្សា សភាគវុត្តិកា វិហរិស្សន្តិ. ឥធ ខោ តំ, ភិក្ខវេ, សោភេថ, យំ តុម្ហេ ឯវំ ស្វាក្ខាតេ ធម្មវិនយេ បព្ពជិតា សមានា អាចរិយេសុ អាចរិយមត្តេសុ ឧបជ្ឈាយេសុ ឧបជ្ឈាយមត្តេសុ អគារវា អប្បតិស្សា អសភាគវុត្តិកា [សគារវា សគ្គតិស្សា សភាគវុត្តិកា (ក.)] វិហរេយ្យាថ. នេតំ, ភិក្ខវេ, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, អាចរិយេសុ អាចរិយមត្តេសុ ឧបជ្ឈាយេសុ ឧបជ្ឈាយមត្តេសុ អនុបាហនេសុ ចង្កមមានេសុ សឧបាហនេន ចង្កមិតព្ពំ. យោ ចង្កមេយ្យ, អាបត្តិ ទុក្កដស្ស. ន ច, ភិក្ខវេ, អជ្ឈារាមេ ឧបាហនា ធារេតព្ពា. យោ ធារេយ្យ, អាបត្តិ ទុក្កដស្សា’’តិ.

២៤៩. តេន ខោ បន សមយេន អញ្ញតរស្ស ភិក្ខុនោ បាទខិលាពាធោ ហោតិ. តំ ភិក្ខូ បរិគ្គហេត្វា ឧច្ចារម្បិ បស្សាវម្បិ និក្ខាមេន្តិ. អទ្ទសា ខោ ភគវា សេនាសនចារិកំ អាហិណ្ឌន្តោ តេ ភិក្ខូ តំ ភិក្ខុំ បរិគ្គហេត្វា ឧច្ចារម្បិ បស្សាវម្បិ និក្ខាមេន្តេ, ទិស្វាន យេន តេ ភិក្ខូ តេនុបសង្កមិ, ឧបសង្កមិត្វា តេ ភិក្ខូ ឯតទវោច – ‘‘កិំ ឥមស្ស, ភិក្ខវេ, ភិក្ខុនោ អាពាធោ’’តិ? ‘‘ឥមស្ស, ភន្តេ, អាយស្មតោ បាទខិលាពាធោ; ឥមំ មយំ បរិគ្គហេត្វា ឧច្ចារម្បិ បស្សាវម្បិ និក្ខាមេមា’’តិ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, យស្ស បាទា វា ទុក្ខា, បាទា វា ផលិតា, បាទខិលោ វា អាពាធោ [បាទខិលាពាធោ វា (ស្យា.)] ឧបាហនំ ធារេតុ’’ន្តិ.

តេន ខោ បន សមយេន ភិក្ខូ អធោតេហិ បាទេហិ មញ្ចម្បិ បីឋម្បិ អភិរុហន្តិ; ចីវរម្បិ សេនាសនម្បិ ទុស្សតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ‘ឥទានិ មញ្ចំ វា បីឋំ វា អភិរុហិស្សាមី’’តិ ឧបាហនំ ធារេតុន្តិ.

តេន ខោ បន សមយេន ភិក្ខូ រត្តិយា ឧបោសថគ្គម្បិ សន្និសជ្ជម្បិ គច្ឆន្តា អន្ធការេ ខាណុម្បិ កណ្ដកម្បិ អក្កមន្តិ; បាទា ទុក្ខា ហោន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អជ្ឈារាមេ ឧបាហនំ ធារេតុំ, ឧក្កំ, បទីបំ, កត្តរទណ្ឌន្តិ.

អជ្ឈារាមេ ឧបាហនបដិក្ខេបោ និដ្ឋិតោ.