១៤៩. សព្ពនីលិកាទិបដិក្ខេបោ

២៤៦. តេន ខោ បន សមយេន ឆព្ពគ្គិយា ភិក្ខូ សព្ពនីលិកា ឧបាហនាយោ ធារេន្តិ…បេ… សព្ពបីតិកា ឧបាហនាយោ ធារេន្តិ… សព្ពលោហិតិកា ឧបាហនាយោ ធារេន្តិ… សព្ពមញ្ជិដ្ឋិកា [សព្ពមញ្ជេដ្ឋិកា (ក.)] ឧបាហនាយោ ធារេន្តិ … សព្ពកណ្ហា ឧបាហនាយោ ធារេន្តិ… សព្ពមហារង្គរត្តា ឧបាហនាយោ ធារេន្តិ… សព្ពមហានាមរត្តា ឧបាហនាយោ ធារេន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ, ‘‘សេយ្យថាបិ គិហី កាមភោគិនោ’’តិ. ភគវតោ ឯតមត្ថំ អារោចេសុំ. ន, ភិក្ខវេ, សព្ពនីលិកា ឧបាហនា ធារេតព្ពា…បេ… ន សព្ពបីតិកា ឧបាហនា ធារេតព្ពា, ន សព្ពលោហិតិកា ឧបាហនា ធារេតព្ពា, ន សព្ពមញ្ជិដ្ឋិកា ឧបាហនា ធារេតព្ពា, ន សព្ពកណ្ហា ឧបាហនា ធារេតព្ពា, ន សព្ពមហារង្គរត្តា ឧបាហនា ធារេតព្ពា, ន សព្ពមហានាមរត្តា ឧបាហនា ធារេតព្ពា. យោ ធារេយ្យ, អាបត្តិ ទុក្កដស្សាតិ.

តេន ខោ បន សមយេន ឆព្ពគ្គិយា ភិក្ខូ នីលកវទ្ធិកា [វដ្ដិកា (សី.)] ឧបាហនាយោ ធារេន្តិ, បីតកវទ្ធិកា ឧបាហនាយោ ធារេន្តិ, លោហិតកវទ្ធិកា ឧបាហនាយោ ធារេន្តិ, មញ្ជិដ្ឋិកវទ្ធិកា ឧបាហនាយោ ធារេន្តិ, កណ្ហវទ្ធិកា ឧបាហនាយោ ធារេន្តិ, មហារង្គរត្តវទ្ធិកា ឧបាហនាយោ ធារេន្តិ, មហានាមរត្តវទ្ធិកា ឧបាហនាយោ ធារេន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ, ‘‘សេយ្យថាបិ គិហី កាមភោគិនោ’’តិ. ភគវតោ ឯតមត្ថំ អារោចេសុំ. ន, ភិក្ខវេ, នីលកវទ្ធិកា ឧបាហនា ធារេតព្ពា…បេ… ន បីតកវទ្ធិកា ឧបាហនា ធារេតព្ពា, ន លោហិតកវទ្ធិកា ឧបាហនា ធារេតព្ពា, ន មញ្ជិដ្ឋិកវទ្ធិកា ឧបាហនា ធារេតព្ពា, ន កណ្ហវទ្ធិកា ឧបាហនា ធារេតព្ពា, ន មហារង្គរត្តវទ្ធិកា ឧបាហនា ធារេតព្ពា, ន មហានាមរត្តវទ្ធិកា ឧបាហនា ធារេតព្ពា. យោ ធារេយ្យ, អាបត្តិ ទុក្កដស្សាតិ.

តេន ខោ បន សមយេន ឆព្ពគ្គិយា ភិក្ខូ ខល្លកពទ្ធា […ពន្ធា (ក.)] ឧបាហនាយោ ធារេន្តិ…បេ… បុដពទ្ធា ឧបាហនាយោ ធារេន្តិ, បាលិគុណ្ឋិមា ឧបាហនាយោ ធារេន្តិ, តូលបុណ្ណិកា ឧបាហនាយោ ធារេន្តិ, តិត្តិរបត្តិកា ឧបាហនាយោ ធារេន្តិ, មេណ្ឌវិសាណវទ្ធិកា ឧបាហនាយោ ធារេន្តិ, អជវិសាណវទ្ធិកា ឧបាហនាយោ ធារេន្តិ, វិច្ឆិកាឡិកា ឧបាហនាយោ ធារេន្តិ, មោរបិញ្ឆ [មោរបិញ្ជ (សី. ស្យា.)] បរិសិព្ពិតា ឧបាហនាយោ ធារេន្តិ, ចិត្រា ឧបាហនាយោ ធារេន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ, ‘‘សេយ្យថាបិ គិហី កាមភោគិនោ’’តិ. ភគវតោ ឯតមត្ថំ អារោចេសុំ. ន, ភិក្ខវេ, ខល្លកពទ្ធា ឧបាហនា ធារេតព្ពា…បេ… ន បុដពទ្ធា ឧបាហនា ធារេតព្ពា, ន បាលិគុណ្ឋិមា ឧបាហនា ធារេតព្ពា, ន តូលបុណ្ណិកា ឧបាហនា ធារេតព្ពា, ន តិត្តិរបត្តិកា ឧបាហនា ធារេតព្ពា, ន មេណ្ឌវិសាណវទ្ធិកា ឧបាហនា ធារេតព្ពា, ន អជវិសាណវទ្ធិកា ឧបាហនា ធារេតព្ពា, ន វិច្ឆិកាឡិកា ឧបាហនា ធារេតព្ពា, ន មោរបិញ្ឆបរិសិព្ពិតា ឧបាហនា ធារេតព្ពា, ន ចិត្រា ឧបាហនា ធារេតព្ពា. យោ ធារេយ្យ, អាបត្តិ ទុក្កដស្សាតិ.

តេន ខោ បន សមយេន ឆព្ពគ្គិយា ភិក្ខូ សីហចម្មបរិក្ខដា ឧបាហនាយោ ធារេន្តិ…បេ… ព្យគ្ឃចម្មបរិក្ខដា ឧបាហនាយោ ធារេន្តិ, ទីបិចម្មបរិក្ខដា ឧបាហនាយោ ធារេន្តិ, អជិនចម្មបរិក្ខដា ឧបាហនាយោ ធារេន្តិ, ឧទ្ទចម្មបរិក្ខដា ឧបាហនាយោ ធារេន្តិ, មជ្ជារចម្មបរិក្ខដា ឧបាហនាយោ ធារេន្តិ, កាឡកចម្មបរិក្ខដា ឧបាហនាយោ ធារេន្តិ, លុវកចម្មបរិក្ខដា [ឧលូកចម្មបរិក្ខដា (យោជនា)] ឧបាហនាយោ ធារេន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ, ‘‘សេយ្យថាបិ គិហី កាមភោគិនោ’’តិ. ភគវតោ ឯតមត្ថំ អារោចេសុំ. ន, ភិក្ខវេ, សីហចម្មបរិក្ខដា ឧបាហនា ធារេតព្ពា…បេ… ន ព្យគ្ឃចម្មបរិក្ខដា ឧបាហនា ធារេតព្ពា, ន ទីបិចម្មបរិក្ខដា ឧបាហនា ធារេតព្ពា, ន អជិនចម្មបរិក្ខដា ឧបាហនា ធារេតព្ពា, ន ឧទ្ទចម្មបរិក្ខដា ឧបាហនា ធារេតព្ពា, ន មជ្ជារចម្មបរិក្ខដា ឧបាហនា ធារេតព្ពា, ន កាឡកចម្មបរិក្ខដា ឧបាហនា ធារេតព្ពា, ន លុវកចម្មបរិក្ខដា ឧបាហនា ធារេតព្ពា. យោ ធារេយ្យ, អាបត្តិ ទុក្កដស្សាតិ.

សព្ពនីលិកាទិបដិក្ខេបោ និដ្ឋិតោ.