១៤៨. ទិគុណាទិឧបាហនបដិក្ខេបោ

២៤៥. អថ ខោ ភគវា ភិក្ខូ អាមន្តេសិ – ‘‘ឯវំ ខោ, ភិក្ខវេ, កុលបុត្តា អញ្ញំ ព្យាករោន្តិ, អត្ថោ ច វុត្តោ, អត្តា ច អនុបនីតោ. អថ ច, បនិធេកច្ចេ មោឃបុរិសា ហសមានកំ, មញ្ញេ, អញ្ញំ ព្យាករោន្តិ, តេ បច្ឆា វិឃាតំ អាបជ្ជន្តី’’តិ. អថ ខោ ភគវា អាយស្មន្តំ សោណំ អាមន្តេសិ – ‘‘ត្វំ ខោសិ, សោណ, សុខុមាលោ. អនុជានាមិ តេ, សោណ, ឯកបលាសិកំ ឧបាហន’’ន្តិ. ‘‘អហំ ខោ, ភន្តេ, អសីតិសកដវាហេ ហិរញ្ញំ ឱហាយ អគារស្មា អនគារិយំ បព្ពជិតោ, សត្តហត្ថិកញ្ច អនីកំ. អថាហំ ភន្តេ ឯកបលាសិកំ ចេ ឧបាហនំ បរិហរិស្សាមិ, តស្ស មេ ភវិស្សន្តិ វត្តារោ ‘សោណោ កោឡិវិសោ អសីតិសកដវាហេ ហិរញ្ញំ ឱហាយ អគារស្មា អនគារិយំ បព្ពជិតោ, សត្តហត្ថិកញ្ច អនីកំ. សោ ទានាយំ ឯកបលាសិកាសុ ឧបាហនាសុ សត្តោ’តិ. សចេ ភគវា ភិក្ខុសង្ឃស្ស អនុជានិស្សតិ អហម្បិ បរិភុញ្ជិស្សាមិ; នោ ចេ ភគវា ភិក្ខុសង្ឃស្ស អនុជានិស្សតិ, អហម្បិ ន បរិភុញ្ជិស្សាមី’’តិ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, ឯកបលាសិកំ ឧបាហនំ. ន, ភិក្ខវេ, ទិគុណា ឧបាហនា ធារេតព្ពា. ន តិគុណា ឧបាហនា ធារេតព្ពា. ន គុណង្គុណូបាហនា [គណង្គណូបាហនា (ពហូសុ)] ធារេតព្ពា. យោ ធារេយ្យ, អាបត្តិ ទុក្កដស្សា’’តិ.

ទិគុណាទិឧបាហនបដិក្ខេបោ និដ្ឋិតោ.