១៤៣. វត្ថុឋបនាទិ

២៣៩. ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ. ឥទំ វត្ថុ បញ្ញាយតិ, ន បុគ្គលោ. យទិ សង្ឃស្ស បត្តកល្លំ, វត្ថុំ ឋបេត្វា សង្ឃោ បវារេយ្យា’’តិ. សោ ឯវមស្ស វចនីយោ – ‘‘ភគវតា ខោ, អាវុសោ, វិសុទ្ធានំ បវារណា បញ្ញត្តា. សចេ វត្ថុ បញ្ញាយតិ, ន បុគ្គលោ, ឥទានេវ នំ វទេហី’’តិ.

ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ. អយំ បុគ្គលោ បញ្ញាយតិ, ន វត្ថុ. យទិ សង្ឃស្ស បត្តកល្លំ, បុគ្គលំ ឋបេត្វា សង្ឃោ បវារេយ្យា’’តិ. សោ ឯវមស្ស វចនីយោ – ‘‘ភគវតា ខោ, អាវុសោ, សមគ្គានំ បវារណា បញ្ញត្តា. សចេ បុគ្គលោ បញ្ញាយតិ, ន វត្ថុ, ឥទានេវ នំ វទេហី’’តិ.

ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ. ឥទំ វត្ថុ ច បុគ្គលោ ច បញ្ញាយតិ. យទិ សង្ឃស្ស បត្តកល្លំ, វត្ថុញ្ច បុគ្គលញ្ច ឋបេត្វា សង្ឃោ បវារេយ្យា’’តិ. សោ ឯវមស្ស វចនីយោ – ‘‘ភគវតា ខោ, អាវុសោ, វិសុទ្ធានញ្ច សមគ្គានញ្ច បវារណា បញ្ញត្តា. សចេ វត្ថុ ច បុគ្គលោ ច បញ្ញាយតិ, ឥទានេវ នំ វទេហី’’តិ.

បុព្ពេ ចេ, ភិក្ខវេ, បវារណាយ វត្ថុ បញ្ញាយតិ, បច្ឆា បុគ្គលោ, កល្លំ វចនាយ. បុព្ពេ ចេ, ភិក្ខវេ, បវារណាយ បុគ្គលោ បញ្ញាយតិ, បច្ឆា វត្ថុ, កល្លំ វចនាយ. បុព្ពេ ចេ, ភិក្ខវេ, បវារណាយ វត្ថុ ច បុគ្គលោ ច បញ្ញាយតិ, តំ ចេ កតាយ បវារណាយ ឧក្កោដេតិ, ឧក្កោដនកំ បាចិត្តិយន្តិ.

វត្ថុឋបនាទិ និដ្ឋិតា.