១៤០. ទ្វេវាចិកាទិបវារណា

២៣៤. តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ តទហុ បវារណាយ សវរភយំ អហោសិ. ភិក្ខូ នាសក្ខិំសុ តេវាចិកំ បវារេតុំ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ទ្វេវាចិកំ បវារេតុន្តិ.

ពាឡ្ហតរំ សវរភយំ អហោសិ. ភិក្ខូ នាសក្ខិំសុ ទ្វេវាចិកំ បវារេតុំ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ឯកវាចិកំ បវារេតុន្តិ.

ពាឡ្ហតរំ សវរភយំ អហោសិ. ភិក្ខូ នាសក្ខិំសុ ឯកវាចិកំ បវារេតុំ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, សមានវស្សិកំ បវារេតុន្តិ.

តេន ខោ បន សមយេន អញ្ញតរស្មិំ អាវាសេ តទហុ បវារណាយ មនុស្សេហិ ទានំ ទេន្តេហិ យេភុយ្យេន រត្តិ ខេបិតា ហោតិ. អថ ខោ តេសំ ភិក្ខូនំ ឯតទហោសិ – ‘‘មនុស្សេហិ ទានំ ទេន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ. កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ មនុស្សេហិ ទានំ ទេន្តេហិ យេភុយ្យេន រត្តិ ខេបិតា ហោតិ. តត្រ ចេ, ភិក្ខវេ, ភិក្ខូនំ ឯវំ ហោតិ – ‘‘មនុស្សេហិ ទានំ ទេន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. មនុស្សេហិ ទានំ ទេន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ. យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ.

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ ភិក្ខូហិ ធម្មំ ភណន្តេហិ…បេ… សុត្តន្តិកេហិ សុត្តន្តំ សង្គាយន្តេហិ… វិនយធរេហិ វិនយំ វិនិច្ឆិនន្តេហិ… ធម្មកថិកេហិ ធម្មំ សាកច្ឆន្តេហិ… ភិក្ខូហិ កលហំ ករោន្តេហិ យេភុយ្យេន រត្តិ ខេបិតា ហោតិ. តត្រ ចេ ភិក្ខូនំ ឯវំ ហោតិ – ‘‘ភិក្ខូហិ កលហំ ករោន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. ភិក្ខូហិ កលហំ ករោន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ. យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ.

តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ តទហុ បវារណាយ មហាភិក្ខុសង្ឃោ សន្និបតិតោ ហោតិ, បរិត្តញ្ច អនោវស្សិកំ [អនោវស្សកំ (ក.)] ហោតិ, មហា ច មេឃោ ឧគ្គតោ ហោតិ. អថ ខោ តេសំ ភិក្ខូនំ ឯតទហោសិ – ‘‘អយំ ខោ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតិ. កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ មហាភិក្ខុសង្ឃោ សន្និបតិតោ ហោតិ, បរិត្តញ្ច អនោវស្សិកំ ហោតិ, មហា ច មេឃោ ឧគ្គតោ ហោតិ. តត្រ ចេ ភិក្ខូនំ ឯវំ ហោតិ – ‘‘អយំ ខោ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតី’’តិ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតិ. យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ.

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ រាជន្តរាយោ ហោតិ…បេ… ចោរន្តរាយោ ហោតិ… អគ្យន្តរាយោ ហោតិ… ឧទកន្តរាយោ ហោតិ… មនុស្សន្តរាយោ ហោតិ… អមនុស្សន្តរាយោ ហោតិ… វាឡន្តរាយោ ហោតិ… សរីសបន្តរាយោ ហោតិ… ជីវិតន្តរាយោ ហោតិ… ព្រហ្មចរិយន្តរាយោ ហោតិ. តត្រ ចេ ភិក្ខូនំ ឯវំ ហោតិ – ‘‘អយំ ខោ, ព្រហ្មចរិយន្តរាយោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ ព្រហ្មចរិយន្តរាយោ ភវិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ ព្រហ្មចរិយន្តរាយោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ ព្រហ្មចរិយន្តរាយោ ភវិស្សតិ. យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ.

ទ្វេវាចិកាទិបវារណា និដ្ឋិតា.