១៤១. បវារណាឋបនំ

២៣៥. តេន ខោ បន សមយេន ឆព្ពគ្គិយា ភិក្ខូ សាបត្តិកា បវារេន្តិ. ភគវតោ ឯតមត្ថំ អារោចេសុំ. ន, ភិក្ខវេ, សាបត្តិកេន បវារេតព្ពំ. យោ បវារេយ្យ, អាបត្តិ ទុក្កដស្ស. អនុជានាមិ, ភិក្ខវេ, យោ សាបត្តិកោ បវារេតិ, តស្ស ឱកាសំ ការាបេត្វា អាបត្តិយា ចោទេតុន្តិ.

តេន ខោ បន សមយេន ឆព្ពគ្គិយា ភិក្ខូ ឱកាសំ ការាបិយមានា ន ឥច្ឆន្តិ ឱកាសំ កាតុំ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ឱកាសំ អករោន្តស្ស បវារណំ ឋបេតុំ. ឯវញ្ច បន, ភិក្ខវេ, ឋបេតព្ពា. តទហុ បវារណាយ ចាតុទ្ទសេ វា បន្នរសេ វា តស្មិំ បុគ្គលេ សម្មុខីភូតេ សង្ឃមជ្ឈេ ឧទាហរិតព្ពំ – ‘‘សុណាតុ មេ, ភន្តេ, សង្ឃោ. ឥត្ថន្នាមោ បុគ្គលោ សាបត្តិកោ. តស្ស បវារណំ ឋបេមិ. ន តស្មិំ សម្មុខីភូតេ បវារេតព្ព’’ន្តិ. ឋបិតា ហោតិ បវារណាតិ.

តេន ខោ បន សមយេន ឆព្ពគ្គិយា ភិក្ខូ – បុរម្ហាកំ បេសលា ភិក្ខូ បវារណំ ឋបេន្តីតិ – បដិកច្ចេវ សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បវារណំ ឋបេន្តិ, បវារិតានម្បិ បវារណំ ឋបេន្តិ. ភគវតោ ឯតមត្ថំ អារោចេសុំ. ន, ភិក្ខវេ, សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បវារណា ឋបេតព្ពា. យោ ឋបេយ្យ, អាបត្តិ ទុក្កដស្ស. ន, ភិក្ខវេ, បវារិតានម្បិ បវារណា ឋបេតព្ពា. យោ ឋបេយ្យ, អាបត្តិ ទុក្កដស្ស.

២៣៦. ឯវំ ខោ, ភិក្ខវេ, ឋបិតា ហោតិ បវារណា, ឯវំ អដ្ឋបិតា. កថញ្ច, ភិក្ខវេ, អដ្ឋបិតា ហោតិ បវារណា? តេវាចិកាយ ចេ, ភិក្ខវេ, បវារណាយ ភាសិតាយ លបិតាយ បរិយោសិតាយ បវារណំ ឋបេតិ, អដ្ឋបិតា ហោតិ បវារណា. ទ្វេវាចិកាយ ចេ, ភិក្ខវេ,… ឯកវាចិកាយ ចេ, ភិក្ខវេ,… សមានវស្សិកាយ ចេ, ភិក្ខវេ, បវារណាយ ភាសិតាយ លបិតាយ បរិយោសិតាយ បវារណំ ឋបេតិ, អដ្ឋបិតា ហោតិ បវារណា. ឯវំ ខោ, ភិក្ខវេ, អដ្ឋបិតា ហោតិ បវារណា.

កថញ្ច, ភិក្ខវេ, ឋបិតា ហោតិ បវារណា? តេវាចិកាយ, ចេ, ភិក្ខវេ, បវារណាយ ភាសិតាយ លបិតាយ អបរិយោសិតាយ បវារណំ ឋបេតិ, ឋបិតា ហោតិ បវារណា. ទ្វេវាចិកាយ ចេ, ភិក្ខវេ,… ឯកវាចិកាយ ចេ, ភិក្ខវេ,… សមានវស្សិកាយ ចេ, ភិក្ខវេ, បវារណាយ ភាសិតាយ លបិតាយ អបរិយោសិតាយ បវារណំ ឋបេតិ, ឋបិតា ហោតិ បវារណា. ឯវំ ខោ, ភិក្ខវេ, ឋបិតា ហោតិ បវារណា.

២៣៧. ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ. តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា អបរិសុទ្ធកាយសមាចារោ, អបរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ.

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ. តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, អបរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ.

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ. តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, បរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ.

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ. តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, បរិសុទ្ធវចីសមាចារោ, បរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ.

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ. តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, បរិសុទ្ធវចីសមាចារោ, បរិសុទ្ធាជីវោ, បណ្ឌិតោ, ព្យត្តោ, បដិពលោ អនុយុញ្ជីយមានោ អនុយោគំ ទាតុ’’ន្តិ, សោ ឯវមស្ស វចនីយោ, ‘‘យំ ខោ ត្វំ, អាវុសោ, ឥមស្ស ភិក្ខុនោ បវារណំ ឋបេសិ, កិម្ហិ នំ ឋបេសិ, សីលវិបត្តិយា វា ឋបេសិ, អាចារវិបត្តិយា វា ឋបេសិ, ទិដ្ឋិវិបត្តិយា វា ឋបេសី’’តិ? សោ ចេ ឯវំ វទេយ្យ – ‘‘សីលវិបត្តិយា វា ឋបេមិ, អាចារវិបត្តិយា វា ឋបេមិ, ទិដ្ឋិវិបត្តិយា វា ឋបេមី’’តិ, សោ ឯវមស្ស វចនីយោ – ‘‘ជានាសិ បនាយស្មា សីលវិបត្តិំ, ជានាសិ អាចារវិបត្តិំ, ជានាសិ ទិដ្ឋិវិបត្តិ’’ន្តិ? សោ ចេ ឯវំ វទេយ្យ – ‘‘ជានាមិ ខោ អហំ, អាវុសោ, សីលវិបត្តិំ, ជានាមិ អាចារវិបត្តិំ, ជានាមិ ទិដ្ឋិវិបត្តិ’’ន្តិ, សោ ឯវមស្ស វចនីយោ – ‘‘កតមា បនាវុសោ, សីលវិបត្តិ, កតមា អាចារវិបត្តិ, កតមា ទិដ្ឋិវិបត្តី’’តិ? សោ ចេ ឯវំ វទេយ្យ – ‘‘ចត្តារិ បារាជិកានិ, តេរស សង្ឃាទិសេសា, អយំ សីលវិបត្តិ; ថុល្លច្ចយំ, បាចិត្តិយំ, បាដិទេសនីយំ, ទុក្កដំ, ទុព្ភាសិតំ, អយំ អាចារវិបត្តិ; មិច្ឆាទិដ្ឋិ, អន្តគ្គាហិកាទិដ្ឋិ, អយំ ទិដ្ឋិវិបត្តី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ បវារណំ ឋបេសិ, ទិដ្ឋេន វា ឋបេសិ, សុតេន វា ឋបេសិ, បរិសង្កាយ វា ឋបេសី’’តិ? សោ ចេ ឯវំ វទេយ្យ – ‘‘ទិដ្ឋេន វា ឋបេមិ, សុតេន វា ឋបេមិ, បរិសង្កាយ វា ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ ទិដ្ឋេន បវារណំ ឋបេសិ, កិំ តេ ទិដ្ឋំ, កិន្តិ តេ ទិដ្ឋំ, កទា តេ ទិដ្ឋំ, កត្ថ តេ ទិដ្ឋំ, បារាជិកំ អជ្ឈាបជ្ជន្តោ ទិដ្ឋោ, សង្ឃាទិសេសំ អជ្ឈាបជ្ជន្តោ ទិដ្ឋោ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបជ្ជន្តោ ទិដ្ឋោ, កត្ថ ច ត្វំ អហោសិ, កត្ថ ចាយំ ភិក្ខុ អហោសិ, កិញ្ច ត្វំ ករោសិ, កិញ្ចាយំ ភិក្ខុ ករោតី’’តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ ទិដ្ឋេន បវារណំ ឋបេមិ, អបិច សុតេន បវារណំ ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ សុតេន បវារណំ ឋបេសិ, កិំ តេ សុតំ, កិន្តិ តេ សុតំ, កទា តេ សុតំ, កត្ថ តេ សុតំ, បារាជិកំ អជ្ឈាបន្នោតិ សុតំ, សង្ឃាទិសេសំ អជ្ឈាបន្នោតិ សុតំ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ សុតំ, ភិក្ខុស្ស សុតំ, ភិក្ខុនិយា សុតំ, សិក្ខមានាយ សុតំ, សាមណេរស្ស សុតំ, សាមណេរិយា សុតំ, ឧបាសកស្ស សុតំ, ឧបាសិកាយ សុតំ, រាជូនំ សុតំ, រាជមហាមត្តានំ សុតំ, តិត្ថិយានំ សុតំ, តិត្ថិយសាវកានំ សុត’’ន្តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ សុតេន បវារណំ ឋបេមិ, អបិច បរិសង្កាយ បវារណំ ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ បរិសង្កាយ បវារណំ ឋបេសិ, កិំ បរិសង្កសិ, កិន្តិ បរិសង្កសិ, កទា បរិសង្កសិ, កត្ថ បរិសង្កសិ, បារាជិកំ អជ្ឈាបន្នោតិ បរិសង្កសិ, សង្ឃាទិសេសំ អជ្ឈាបន្នោតិ បរិសង្កសិ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ បរិសង្កសិ, ភិក្ខុស្ស សុត្វា បរិសង្កសិ, ភិក្ខុនិយា សុត្វា បរិសង្កសិ, សិក្ខមានាយ សុត្វា បរិសង្កសិ, សាមណេរស្ស សុត្វា បរិសង្កសិ, សាមណេរិយា សុត្វា បរិសង្កសិ, ឧបាសកស្ស សុត្វា បរិសង្កសិ, ឧបាសិកាយ សុត្វា បរិសង្កសិ, រាជូនំ សុត្វា បរិសង្កសិ, រាជមហាមត្តានំ សុត្វា បរិសង្កសិ, តិត្ថិយានំ សុត្វា បរិសង្កសិ, តិត្ថិយសាវកានំ សុត្វា បរិសង្កសី’’តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ បរិសង្កាយ បវារណំ ឋបេមិ, អបិ ច អហម្បិ ន ជានាមិ កេន បនាហំ ឥមស្ស ភិក្ខុនោ បវារណំ ឋបេមី’’តិ. សោ ចេ, ភិក្ខវេ, ចោទកោ ភិក្ខុ អនុយោគេន វិញ្ញូនំ សព្រហ្មចារីនំ ចិត្តំ ន អារាធេតិ, អននុវាទោ ចុទិតោ ភិក្ខូតិ អលំ វចនាយ. សោ ចេ, ភិក្ខវេ, ចោទកោ ភិក្ខុ អនុយោគេន វិញ្ញូនំ សព្រហ្មចារីនំ ចិត្តំ អារាធេតិ, សានុវាទោ ចុទិតោ ភិក្ខូតិ អលំ វចនាយ. សោ ចេ, ភិក្ខវេ, ចោទកោ ភិក្ខុ អមូលកេន បារាជិកេន អនុទ្ធំសិតំ បដិជានាតិ, សង្ឃាទិសេសំ អារោបេត្វា សង្ឃេន បវារេតព្ពំ. សោ ចេ, ភិក្ខវេ, ចោទកោ ភិក្ខុ អមូលកេន សង្ឃាទិសេសេន អនុទ្ធំសិតំ បដិជានាតិ, យថាធម្មំ ការាបេត្វា សង្ឃេន បវារេតព្ពំ. សោ ចេ, ភិក្ខវេ, ចោទកោ, ភិក្ខុ អមូលកេន ថុល្លច្ចយេន… បាចិត្តិយេន… បាដិទេសនីយេន… ទុក្កដេន… ទុព្ភាសិតេន អនុទ្ធំសិតំ បដិជានាតិ, យថាធម្មំ ការាបេត្វា សង្ឃេន បវារេតព្ពំ. សោ ចេ, ភិក្ខវេ, ចុទិតោ ភិក្ខុ បារាជិកំ អជ្ឈាបន្នោតិ បដិជានាតិ, នាសេត្វា សង្ឃេន បវារេតព្ពំ. សោ ចេ, ភិក្ខវេ, ចុទិតោ ភិក្ខុ សង្ឃាទិសេសំ អជ្ឈាបន្នោតិ បដិជានាតិ, សង្ឃាទិសេសំ អារោបេត្វា សង្ឃេន បវារេតព្ពំ. សោ ចេ, ភិក្ខវេ, ចុទិតោ ភិក្ខុ ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ បដិជានាតិ, យថាធម្មំ ការាបេត្វា សង្ឃេន បវារេតព្ពំ.

បវារណាឋបនំ និដ្ឋិតំ.