១៣៩. វជ្ជនីយបុគ្គលសន្ទស្សនា

២៣៣. ន, ភិក្ខវេ, ភិក្ខុនិយា និសិន្នបរិសាយ បវារេតព្ពំ. យោ បវារេយ្យ, អាបត្តិ ទុក្កដស្ស. ន, ភិក្ខវេ, សិក្ខមានាយ…បេ… ន សាមណេរស្ស…បេ… ន សាមណេរិយា…បេ… ន សិក្ខំ បច្ចក្ខាតកស្ស…បេ… ន អន្តិមវត្ថុំ អជ្ឈាបន្នកស្ស និសិន្នបរិសាយ បវារេតព្ពំ. យោ បវារេយ្យ, អាបត្តិ ទុក្កដស្ស.

ន អាបត្តិយា អទស្សនេ ឧក្ខិត្តកស្ស និសិន្នបរិសាយ បវារេតព្ពំ. យោ បវារេយ្យ, យថាធម្មោ ការេតព្ពោ. ន អាបត្តិយា អប្បដិកម្មេ ឧក្ខិត្តកស្ស…បេ… ន បាបិកាយ ទិដ្ឋិយា អប្បដិនិស្សគ្គេ ឧក្ខិត្តកស្ស និសិន្នបរិសាយ បវារេតព្ពំ. យោ បវារេយ្យ, យថាធម្មោ ការេតព្ពោ.

ន បណ្ឌកស្ស និសិន្នបរិសាយ បវារេតព្ពំ. យោ បវារេយ្យ, អាបត្តិ ទុក្កដស្ស. ន ថេយ្យសំវាសកស្ស…បេ… ន តិត្ថិយបក្កន្តកស្ស…បេ… ន តិរច្ឆានគតស្ស…បេ… ន មាតុឃាតកស្ស…បេ… ន បិតុឃាតកស្ស…បេ… ន អរហន្តឃាតកស្ស…បេ… ន ភិក្ខុនិទូសកស្ស …បេ… ន សង្ឃភេទកស្ស…បេ… ន លោហិតុប្បាទកស្ស …បេ… ន ឧភតោព្យញ្ជនកស្ស និសិន្នបរិសាយ បវារេតព្ពំ. យោ បវារេយ្យ, អាបត្តិ ទុក្កដស្ស.

ន, ភិក្ខវេ, បារិវាសិកបវារណាទានេន បវារេតព្ពំ, អញ្ញត្រ អវុដ្ឋិតាយ បរិសាយ. ន ច, ភិក្ខវេ, អប្បវារណាយ បវារេតព្ពំ, អញ្ញត្រ សង្ឃសាមគ្គិយាតិ.

វជ្ជនីយបុគ្គលសន្ទស្សនា និដ្ឋិតា.

ទុតិយភាណវារោ និដ្ឋិតោ.