៩៧. វេមតិកបន្នរសកំ

១៧៤. ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សម្ពហុលា អាវាសិកា ភិក្ខូ សន្និបតន្តិ ចត្តារោ វា អតិរេកា វា. តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ. តេ, កប្បតិ នុ ខោ អម្ហាកំ ឧបោសថោ កាតុំ ន នុ ខោ កប្បតីតិ, វេមតិកា ឧបោសថំ ករោន្តិ, បាតិមោក្ខំ ឧទ្ទិសន្តិ. តេហិ ឧទ្ទិស្សមានេ បាតិមោក្ខេ, អថញ្ញេ អាវាសិកា ភិក្ខូ អាគច្ឆន្តិ ពហុតរា. តេហិ, ភិក្ខវេ, ភិក្ខូហិ បុន បាតិមោក្ខំ ឧទ្ទិសិតព្ពំ. ឧទ្ទេសកានំ អាបត្តិ ទុក្កដស្ស.

ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សម្ពហុលា អាវាសិកា ភិក្ខូ សន្និបតន្តិ ចត្តារោ វា អតិរេកា វា. តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ, តេ ‘‘កប្បតិ នុ ខោ អម្ហាកំ ឧបោសថោ កាតុំ, ន នុ ខោ កប្បតី’’តិ, វេមតិកា ឧបោសថំ ករោន្តិ, បាតិមោក្ខំ ឧទ្ទិសន្តិ. តេហិ ឧទ្ទិស្សមានេ បាតិមោក្ខេ, អថញ្ញេ អាវាសិកា ភិក្ខូ អាគច្ឆន្តិ សមសមា. ឧទ្ទិដ្ឋំ សុឧទ្ទិដ្ឋំ, អវសេសំ សោតព្ពំ. ឧទ្ទេសកានំ អាបត្តិ ទុក្កដស្ស.

ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សម្ពហុលា អាវាសិកា ភិក្ខូ សន្និបតន្តិ ចត្តារោ វា អតិរេកា វា. តេ ជានន្តិ អត្ថញ្ញេ អាវាសិកា ភិក្ខូ អនាគតាតិ, តេ កប្បតិ នុ ខោ អម្ហាកំ ឧបោសថោ កាតុំ, ន នុ ខោ កប្បតីតិ, វេមតិកា ឧបោសថំ ករោន្តិ, បាតិមោក្ខំ ឧទ្ទិសន្តិ. តេហិ ឧទ្ទិស្សមានេ បាតិមោក្ខេ អថញ្ញេ អាវាសិកា ភិក្ខូ អាគច្ឆន្តិ ថោកតរា. ឧទ្ទិដ្ឋំ សុឧទ្ទិដ្ឋំ, អវសេសំ សោតព្ពំ. ឧទ្ទេសកានំ អាបត្តិ ទុក្កដស្ស.

ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សម្ពហុលា អាវាសិកា ភិក្ខូ សន្និបតន្តិ ចត្តារោ វា អតិរេកា វា. តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ. តេ, ‘‘កប្បតិ នុ ខោ អម្ហាកំ ឧបោសថោ កាតុំ ន នុ ខោ កប្បតី’’តិ, វេមតិកា ឧបោសថំ ករោន្តិ, បាតិមោក្ខំ ឧទ្ទិសន្តិ. តេហិ ឧទ្ទិដ្ឋមត្តេ បាតិមោក្ខេ,…បេ… អវុដ្ឋិតាយ បរិសាយ…បេ… ឯកច្ចាយ វុដ្ឋិតាយ បរិសាយ…បេ… សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា…បេ… សមសមា…បេ… ថោកតរា. ឧទ្ទិដ្ឋំ សុឧទ្ទិដ្ឋំ, តេសំ សន្តិកេ បារិសុទ្ធិ អារោចេតព្ពា. ឧទ្ទេសកានំ អាបត្តិ ទុក្កដស្ស.

វេមតិកបន្នរសកំ និដ្ឋិតំ.