៩៤. សភាគាបត្តិបដិកម្មវិធិ

១៧១. តេន ខោ បន សមយេន អញ្ញតរស្មិំ អាវាសេ តទហុបោសថេ សព្ពោ សង្ឃោ សភាគំ អាបត្តិំ អាបន្នោ ហោតិ. អថ ខោ តេសំ ភិក្ខូនំ ឯតទហោសិ – ‘‘ភគវតា បញ្ញត្តំ ‘ន សភាគា អាបត្តិ ទេសេតព្ពា, ន សភាគា អាបត្តិ បដិគ្គហេតព្ពា’តិ. អយញ្ច សព្ពោ សង្ឃោ សភាគំ អាបត្តិំ អាបន្នោ. កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ.

ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សព្ពោ សង្ឃោ សភាគំ អាបត្តិំ អាបន្នោ ហោតិ. តេហិ, ភិក្ខវេ, ភិក្ខូហិ ឯកោ ភិក្ខុ សាមន្តា អាវាសា សជ្ជុកំ បាហេតព្ពោ – គច្ឆាវុសោ, តំ អាបត្តិំ បដិករិត្វា អាគច្ឆ; មយំ តេ សន្តិកេ អាបត្តិំ បដិករិស្សាមាតិ. ឯវញ្ចេតំ លភេថ, ឥច្ចេតំ កុសលំ. នោ ចេ លភេថ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ សព្ពោ សង្ឃោ សភាគំ អាបត្តិំ អាបន្នោ. យទា អញ្ញំ ភិក្ខុំ សុទ្ធំ អនាបត្តិកំ បស្សិស្សតិ, តទា តស្ស សន្តិកេ តំ អាបត្តិំ បដិករិស្សតី’’តិ វត្វា ឧបោសថោ កាតព្ពោ, បាតិមោក្ខំ ឧទ្ទិសិតព្ពំ, ន ត្វេវ តប្បច្ចយា ឧបោសថស្ស អន្តរាយោ កាតព្ពោ.

ឥធ បន, ភិក្ខវេ, អញ្ញតរស្មិំ អាវាសេ តទហុបោសថេ សព្ពោ សង្ឃោ សភាគាយ អាបត្តិយា វេមតិកោ ហោតិ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ សព្ពោ សង្ឃោ សភាគាយ អាបត្តិយា វេមតិកោ. យទា និព្ពេមតិកោ ភវិស្សតិ, តទា តំ អាបត្តិំ បដិករិស្សតី’’តិ វត្វា ឧបោសថោ កាតព្ពោ, បាតិមោក្ខំ ឧទ្ទិសិតព្ពំ; ន ត្វេវ តប្បច្ចយា ឧបោសថស្ស អន្តរាយោ កាតព្ពោ.

ឥធ បន, ភិក្ខវេ, អញ្ញតរស្មិំ អាវាសេ វស្សូបគតោ សង្ឃោ សភាគំ អាបត្តិំ អាបន្នោ ហោតិ. តេហិ, ភិក្ខវេ, ភិក្ខូហិ ឯកោ ភិក្ខុ សាមន្តា អាវាសា សជ្ជុកំ បាហេតព្ពោ – គច្ឆាវុសោ, តំ អាបត្តិំ បដិករិត្វា អាគច្ឆ; មយំ តេ សន្តិកេ តំ អាបត្តិំ បដិករិស្សាមាតិ. ឯវញ្ចេតំ លភេថ, ឥច្ចេតំ កុសលំ. នោ ចេ លភេថ, ឯកោ ភិក្ខុ សត្តាហកាលិកំ បាហេតព្ពោ – គច្ឆាវុសោ, តំ អាបត្តិំ បដិករិត្វា អាគច្ឆ; មយំ តេ សន្តិកេ តំ អាបត្តិំ បដិករិស្សាមាតិ.

តេន ខោ បន សមយេន អញ្ញតរស្មិំ អាវាសេ សព្ពោ សង្ឃោ សភាគំ អាបត្តិំ អាបន្នោ ហោតិ. សោ ន ជានាតិ តស្សា អាបត្តិយា នាមគោត្តំ. តត្ថ អញ្ញោ ភិក្ខុ អាគច្ឆតិ ពហុស្សុតោ អាគតាគមោ ធម្មធរោ វិនយធរោ មាតិកាធរោ បណ្ឌិតោ ព្យត្តោ មេធាវី លជ្ជី កុក្កុច្ចកោ សិក្ខាកាមោ. តមេនំ អញ្ញតរោ ភិក្ខុ យេន សោ ភិក្ខុ តេនុបសង្កមិ, ឧបសង្កមិត្វា តំ ភិក្ខុំ ឯតទវោច – ‘‘យោ នុ ខោ, អាវុសោ, ឯវញ្ចេវញ្ច ករោតិ, កិំ នាម សោ អាបត្តិំ អាបជ្ជតី’’តិ? សោ ឯវមាហ – ‘‘យោ ខោ, អាវុសោ, ឯវញ្ចេវញ្ច ករោតិ, ឥមំ នាម សោ អាបត្តិំ អាបជ្ជតិ. ឥមំ នាម ត្វំ, អាវុសោ, អាបត្តិំ អាបន្នោ; បដិករោហិ តំ អាបត្តិ’’ន្តិ. សោ ឯវមាហ – ‘‘ន ខោ អហំ, អាវុសោ, ឯកោវ ឥមំ អាបត្តិំ អាបន្នោ; អយំ សព្ពោ សង្ឃោ ឥមំ អាបត្តិំ អាបន្នោ’’តិ. សោ ឯវមាហ – ‘‘កិំ តេ, អាវុសោ, ករិស្សតិ បរោ អាបន្នោ វា អនាបន្នោ វា. ឥង្ឃ, ត្វំ, អាវុសោ, សកាយ អាបត្តិយា វុដ្ឋាហី’’តិ. អថ ខោ សោ ភិក្ខុ តស្ស ភិក្ខុនោ វចនេន តំ អាបត្តិំ បដិករិត្វា យេន តេ ភិក្ខូ តេនុបសង្កមិ, ឧបសង្កមិត្វា តេ ភិក្ខូ ឯតទវោច – ‘‘យោ កិរ, អាវុសោ, ឯវញ្ចេវញ្ច ករោតិ, ឥមំ នាម សោ អាបត្តិំ អាបជ្ជតិ. ឥមំ នាម តុម្ហេ, អាវុសោ, អាបត្តិំ អាបន្នា; បដិករោថ តំ អាបត្តិ’’ន្តិ. អថ ខោ តេ ភិក្ខូ ន ឥច្ឆិំសុ តស្ស ភិក្ខុនោ វចនេន តំ អាបត្តិំ បដិកាតុំ. ភគវតោ ឯតមត្ថំ អារោចេសុំ.

ឥធ បន, ភិក្ខវេ, អញ្ញតរស្មិំ អាវាសេ សព្ពោ សង្ឃោ សភាគំ អាបត្តិំ អាបន្នោ ហោតិ. សោ ន ជានាតិ តស្សា អាបត្តិយា នាមគោត្តំ. តត្ថ អញ្ញោ ភិក្ខុ អាគច្ឆតិ ពហុស្សុតោ អាគតាគមោ ធម្មធរោ វិនយធរោ មាតិកាធរោ បណ្ឌិតោ ព្យត្តោ មេធាវី លជ្ជី កុក្កុច្ចកោ សិក្ខាកាមោ. តមេនំ អញ្ញតរោ ភិក្ខុ យេន សោ ភិក្ខុ តេនុបសង្កមិ, ឧបសង្កមិត្វា តំ ភិក្ខុំ ឯវំ វទេតិ – ‘‘យោ នុ ខោ, អាវុសោ, ឯវញ្ចេវញ្ច ករោតិ, កិំ នាម សោ អាបត្តិំ អាបជ្ជតី’’តិ? សោ ឯវំ វទេតិ – ‘‘យោ ខោ, អាវុសោ, ឯវញ្ចេវញ្ច ករោតិ, ឥមំ នាម សោ អាបត្តិំ អាបជ្ជតិ. ឥមំ នាម ត្វំ, អាវុសោ, អាបត្តិំ អាបន្នោ; បដិករោហិ តំ អាបត្តិ’’ន្តិ. សោ ឯវំ វទេតិ – ‘‘ន ខោ អហំ, អាវុសោ, ឯកោវ ឥមំ អាបត្តិំ អាបន្នោ. អយំ សព្ពោ សង្ឃោ ឥមំ អាបត្តិំ អាបន្នោ’’តិ. សោ ឯវំ វទេតិ – ‘‘កិំ តេ, អាវុសោ, ករិស្សតិ បរោ អាបន្នោ វា អនាបន្នោ វា. ឥង្ឃ, ត្វំ, អាវុសោ, សកាយ អាបត្តិយា វុដ្ឋាហី’’តិ. សោ ចេ, ភិក្ខវេ, ភិក្ខុ តស្ស ភិក្ខុនោ វចនេន តំ អាបត្តិំ បដិករិត្វា យេន តេ ភិក្ខូ តេនុបសង្កមិ, ឧបសង្កមិត្វា តេ ភិក្ខូ ឯវំ វទេតិ – ‘‘យោ កិរ, អាវុសោ, ឯវញ្ចេវញ្ច ករោតិ ឥមំ នាម សោ អាបត្តិំ អាបជ្ជតិ, ឥមំ នាម តុម្ហេ អាវុសោ អាបត្តិំ អាបន្នា, បដិករោថ តំ អាបត្តិ’’ន្តិ. តេ ចេ, ភិក្ខវេ, ភិក្ខូ តស្ស ភិក្ខុនោ វចនេន តំ អាបត្តិំ បដិករេយ្យុំ, ឥច្ចេតំ កុសលំ. នោ ចេ បដិករេយ្យុំ, ន តេ, ភិក្ខវេ, ភិក្ខូ តេន ភិក្ខុនា អកាមា វចនីយាតិ.

ចោទនាវត្ថុភាណវារោ និដ្ឋិតោ ទុតិយោ.