១០១. លិង្គាទិទស្សនំ

១៧៩. ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកានំ ភិក្ខូនំ អាវាសិកាការំ, អាវាសិកលិង្គំ, អាវាសិកនិមិត្តំ, អាវាសិកុទ្ទេសំ, សុបញ្ញត្តំ មញ្ចបីឋំ, ភិសិពិព្ពោហនំ, បានីយំ បរិភោជនីយំ សូបដ្ឋិតំ, បរិវេណំ សុសម្មដ្ឋំ; បស្សិត្វា វេមតិកា ហោន្តិ – ‘‘អត្ថិ នុ ខោ អាវាសិកា ភិក្ខូ នត្ថិ នុ ខោ’’តិ. តេ វេមតិកា ន វិចិនន្តិ; អវិចិនិត្វា ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា ន បស្សន្តិ; អបស្សិត្វា ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា ឯកតោ ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា បាដេក្កំ ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា – ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា ឧបោសថំ ករោន្តិ. អាបត្តិ ថុល្លច្ចយស្ស.

ឥធ បន, ភិក្ខវេ, អាគន្តុកា ភិក្ខូ សុណន្តិ អាវាសិកានំ ភិក្ខូនំ អាវាសិកាការំ, អាវាសិកលិង្គំ, អាវាសិកនិមិត្តំ, អាវាសិកុទ្ទេសំ, ចង្កមន្តានំ បទសទ្ទំ, សជ្ឈាយសទ្ទំ, ឧក្កាសិតសទ្ទំ, ខិបិតសទ្ទំ; សុត្វា វេមតិកា ហោន្តិ – ‘‘អត្ថិ នុ ខោ អាវាសិកា ភិក្ខូ នត្ថិ នុ ខោ’’តិ. តេ វេមតិកា ន វិចិនន្តិ; អវិចិនិត្វា ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា ន បស្សន្តិ; អបស្សិត្វា ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា ឯកតោ ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា បាដេក្កំ ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា – ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា ឧបោសថំ ករោន្តិ. អាបត្តិ ថុល្លច្ចយស្ស.

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកានំ ភិក្ខូនំ អាគន្តុកាការំ, អាគន្តុកលិង្គំ, អាគន្តុកនិមិត្តំ, អាគន្តុកុទ្ទេសំ, អញ្ញាតកំ បត្តំ, អញ្ញាតកំ ចីវរំ, អញ្ញាតកំ និសីទនំ, បាទានំ ធោតំ, ឧទកនិស្សេកំ; បស្សិត្វា វេមតិកា ហោន្តិ – ‘‘អត្ថិ នុ ខោ អាគន្តុកា ភិក្ខូ នត្ថិ នុ ខោ’’តិ. តេ វេមតិកា ន វិចិនន្តិ; អវិចិនិត្វា ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា ន បស្សន្តិ; អបស្សិត្វា ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា ឯកតោ ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា បាដេក្កំ ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា – ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា ឧបោសថំ ករោន្តិ. អាបត្តិ ថុល្លច្ចយស្ស.

ឥធ បន, ភិក្ខវេ, អាវាសិកា ភិក្ខូ សុណន្តិ អាគន្តុកានំ ភិក្ខូនំ អាគន្តុកាការំ, អាគន្តុកលិង្គំ, អាគន្តុកនិមិត្តំ, អាគន្តុកុទ្ទេសំ, អាគច្ឆន្តានំ បទសទ្ទំ, ឧបាហនបប្ផោដនសទ្ទំ, ឧក្កាសិតសទ្ទំ, ខិបិតសទ្ទំ; សុត្វា វេមតិកា ហោន្តិ – ‘‘អត្ថិ នុ ខោ អាគន្តុកា ភិក្ខូ នត្ថិ នុ ខោ’’តិ. តេ វេមតិកា ន វិចិនន្តិ; អវិចិនិត្វា ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា ន បស្សន្តិ; អបស្សិត្វា ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា ឯកតោ ឧបោសថំ ករោន្តិ. អនាបត្តិ. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា បាដេក្កំ ឧបោសថំ ករោន្តិ. អាបត្តិ ទុក្កដស្ស. តេ វេមតិកា វិចិនន្តិ; វិចិនិត្វា បស្សន្តិ; បស្សិត្វា – ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា ឧបោសថំ ករោន្តិ. អាបត្តិ ថុល្លច្ចយស្ស.

លិង្គាទិទស្សនំ និដ្ឋិតំ.