៩. បព្ពជ្ជូបសម្បទាកថា

៣៤. តេន ខោ បន សមយេន ភិក្ខូ នានាទិសា នានាជនបទា បព្ពជ្ជាបេក្ខេ ច ឧបសម្បទាបេក្ខេ ច អានេន្តិ – ភគវា នេ បព្ពាជេស្សតិ ឧបសម្បាទេស្សតីតិ. តត្ថ ភិក្ខូ ចេវ កិលមន្តិ បព្ពជ្ជាបេក្ខា ច ឧបសម្បទាបេក្ខា ច. អថ ខោ ភគវតោ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘‘ឯតរហិ ខោ ភិក្ខូ នានាទិសា នានាជនបទា បព្ពជ្ជាបេក្ខេ ច ឧបសម្បទាបេក្ខេ ច អានេន្តិ – ភគវា នេ បព្ពាជេស្សតិ ឧបសម្បាទេស្សតីតិ. តត្ថ ភិក្ខូ ចេវ កិលមន្តិ បព្ពជ្ជាបេក្ខា ច ឧបសម្បទាបេក្ខា ច. យំនូនាហំ ភិក្ខូនំ អនុជានេយ្យំ – តុម្ហេវ ទានិ, ភិក្ខវេ, តាសុ តាសុ ទិសាសុ តេសុ តេសុ ជនបទេសុ បព្ពាជេថ ឧបសម្បាទេថា’’តិ. អថ ខោ ភគវា សាយន្ហសមយំ បដិសល្លានា វុដ្ឋិតោ ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘ឥធ មយ្ហំ, ភិក្ខវេ, រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘ឯតរហិ ខោ ភិក្ខូ នានាទិសា នានាជនបទា បព្ពជ្ជាបេក្ខេ ច ឧបសម្បទាបេក្ខេ ច អានេន្តិ ភគវា នេ បព្ពាជេស្សតិ ឧបសម្បាទេស្សតីតិ, តត្ថ ភិក្ខូ ចេវ កិលមន្តិ បព្ពជ្ជាបេក្ខា ច ឧបសម្បទាបេក្ខា ច, យំនូនាហំ ភិក្ខូនំ អនុជានេយ្យំ តុម្ហេវ ទានិ, ភិក្ខវេ, តាសុ តាសុ ទិសាសុ តេសុ តេសុ ជនបទេសុ បព្ពាជេថ ឧបសម្បាទេថា’’’តិ, អនុជានាមិ, ភិក្ខវេ, តុម្ហេវ ទានិ តាសុ តាសុ ទិសាសុ តេសុ តេសុ ជនបទេសុ បព្ពាជេថ ឧបសម្បាទេថ. ឯវញ្ច បន, ភិក្ខវេ, បព្ពាជេតព្ពោ ឧបសម្បាទេតព្ពោ –

បឋមំ កេសមស្សុំ ឱហារាបេត្វា [ឱហារេត្វា (ក.)], កាសាយានិ វត្ថានិ អច្ឆាទាបេត្វា, ឯកំសំ ឧត្តរាសង្គំ ការាបេត្វា, ភិក្ខូនំ បាទេ វន្ទាបេត្វា, ឧក្កុដិកំ និសីទាបេត្វា, អញ្ជលិំ បគ្គណ្ហាបេត្វា, ឯវំ វទេហីតិ វត្តព្ពោ – ពុទ្ធំ សរណំ គច្ឆាមិ, ធម្មំ សរណំ គច្ឆាមិ, សង្ឃំ សរណំ គច្ឆាមិ; ទុតិយម្បិ ពុទ្ធំ សរណំ គច្ឆាមិ, ទុតិយម្បិ ធម្មំ សរណំ គច្ឆាមិ, ទុតិយម្បិ សង្ឃំ សរណំ គច្ឆាមិ; តតិយម្បិ ពុទ្ធំ សរណំ គច្ឆាមិ, តតិយម្បិ ធម្មំ សរណំ គច្ឆាមិ, តតិយម្បិ សង្ឃំ សរណំ គច្ឆាមី’’តិ. ‘‘អនុជានាមិ, ភិក្ខវេ, ឥមេហិ តីហិ សរណគមនេហិ បព្ពជ្ជំ ឧបសម្បទ’’ន្តិ.

តីហិ សរណគមនេហិ ឧបសម្បទាកថា និដ្ឋិតា.