១០. ទុតិយមារកថា

៣៥. អថ ខោ ភគវា វស្សំវុដ្ឋោ [វស្សំវុត្ថោ (សី.)] ភិក្ខូ អាមន្តេសិ [សំ. និ. ១.១៥៥] – ‘‘មយ្ហំ ខោ, ភិក្ខវេ, យោនិសោ មនសិការា យោនិសោ សម្មប្បធានា អនុត្តរា វិមុត្តិ អនុប្បត្តា, អនុត្តរា វិមុត្តិ សច្ឆិកតា. តុម្ហេបិ, ភិក្ខវេ, យោនិសោ មនសិការា យោនិសោ សម្មប្បធានា អនុត្តរំ វិមុត្តិំ អនុបាបុណាថ, អនុត្តរំ វិមុត្តិំ សច្ឆិករោថា’’តិ. អថ ខោ មារោ បាបិមា យេន ភគវា តេនុបសង្កមិ, ឧបសង្កមិត្វា ភគវន្តំ គាថាយ អជ្ឈភាសិ –

‘‘ពទ្ធោសិ មារបាសេហិ, យេ ទិព្ពា យេ ច មានុសា;

មហាពន្ធនពទ្ធោសិ [មារពន្ធនពទ្ធោសិ (សី. ស្យា.)], ន មេ សមណ មោក្ខសី’’តិ.

‘‘មុត្តាហំ មារបាសេហិ, យេ ទិព្ពា យេ ច មានុសា;

មហាពន្ធនមុត្តោម្ហិ [មារពន្ធនមុត្តោម្ហិ (សី. ស្យា.)], និហតោ ត្វមសិ អន្តកា’’តិ.

អថ ខោ មារោ បាបិមា – ជានាតិ មំ ភគវា, ជានាតិ មំ សុគតោតិ ទុក្ខី ទុម្មនោ

តត្ថេវន្តរធាយិ.

ទុតិយមារកថា និដ្ឋិតា.