៦៧. តស្សុទ្ទានំ

១៣១. វិនយម្ហិ មហត្ថេសុ, បេសលានំ សុខាវហេ;

និគ្គហានញ្ច បាបិច្ឆេ, លជ្ជីនំ បគ្គហេសុ ច.

សាសនាធារណេ ចេវ, សព្ពញ្ញុជិនគោចរេ;

អនញ្ញវិសយេ ខេមេ, សុបញ្ញត្តេ អសំសយេ.

ខន្ធកេ វិនយេ ចេវ, បរិវារេ ច មាតិកេ;

យថាត្ថការី កុសលោ, បដិបជ្ជតិ យោនិសោ.

យោ គវំ ន វិជានាតិ, ន សោ រក្ខតិ គោគណំ;

ឯវំ សីលំ អជានន្តោ, កិំ សោ រក្ខេយ្យ សំវរំ.

បមុដ្ឋម្ហិ ច សុត្តន្តេ, អភិធម្មេ ច តាវទេ;

វិនយេ អវិនដ្ឋម្ហិ, បុន តិដ្ឋតិ សាសនំ.

តស្មា សង្គាហណាហេតុំ [សង្គាហនាហេតុំ (ក.)], ឧទ្ទានំ អនុបុព្ពសោ;

បវក្ខាមិ យថាញាយំ, សុណាថ មម ភាសតោ.

វត្ថុ និទានំ អាបត្តិ, នយា បេយ្យាលមេវ ច;

ទុក្ករំ តំ អសេសេតុំ, នយតោ តំ វិជានថាតិ.

ពោធិ រាជាយតនញ្ច, អជបាលោ សហម្បតិ;

ព្រហ្មា អាឡារោ ឧទកោ, ភិក្ខុ ច ឧបកោ ឥសិ.

កោណ្ឌញ្ញោ វប្បោ ភទ្ទិយោ, មហានាមោ ច អស្សជិ;

យសោ ចត្តារោ បញ្ញាស, សព្ពេ បេសេសិ សោ ទិសា.

វត្ថុ មារេហិ តិំសា ច, ឧរុវេលំ តយោ ជដី;

អគ្យាគារំ មហារាជា, សក្កោ ព្រហ្មា ច កេវលា.

បំសុកូលំ បោក្ខរណី, សិលា ច កកុធោ សិលា;

ជម្ពុ អម្ពោ ច អាមលោ, បារិបុប្ផញ្ច អាហរិ.

ផាលិយន្តុ ឧជ្ជលន្តុ, វិជ្ឈាយន្តុ ច កស្សប;

និមុជ្ជន្តិ មុខី មេឃោ, គយា លដ្ឋិ ច មាគធោ.

ឧបតិស្សោ កោលិតោ ច, អភិញ្ញាតា ច បព្ពជុំ;

ទុន្និវត្ថា បណាមនា, កិសោ លូខោ ច ព្រាហ្មណោ.

អនាចារំ អាចរតិ, ឧទរំ មាណវោ គណោ;

វស្សំ ពាលេហិ បក្កន្តោ, ទស វស្សានិ និស្សយោ.

ន វត្តន្តិ បណាមេតុំ, ពាលា បស្សទ្ធិ បញ្ច ឆ;

យោ សោ អញ្ញោ ច នគ្គោ ច, អច្ឆិន្នជដិលសាកិយោ.

មគធេសុ បញ្ចាពាធា, ឯកោ រាជា [ភដោ ចោរោ (ស្យា.)] ច អង្គុលិ;

មាគធោ ច អនុញ្ញាសិ, ការា លិខិ កសាហតោ.

លក្ខណា ឥណា ទាសោ ច, ភណ្ឌុកោ ឧបាលិ អហិ;

សទ្ធំ កុលំ កណ្ដកោ ច, អាហុន្ទរិកមេវ ច.

វត្ថុម្ហិ ទារកោ សិក្ខា, វិហរន្តិ ច កិំ នុ ខោ;

សព្ពំ មុខំ ឧបជ្ឈាយេ, អបលាឡន កណ្ដកោ.

បណ្ឌកោ ថេយ្យបក្កន្តោ, អហិ ច មាតរី បិតា;

អរហន្តភិក្ខុនីភេទា, រុហិរេន ច ព្យញ្ជនំ.

អនុបជ្ឈាយសង្ឃេន, គណបណ្ឌកបត្តកោ;

អចីវរំ តទុភយំ, យាចិតេនបិ យេ តយោ.

ហត្ថា បាទា ហត្ថបាទា, កណ្ណា នាសា តទូភយំ;

អង្គុលិអឡកណ្ឌរំ, ផណំ ខុជ្ជញ្ច វាមនំ.

គលគណ្ឌី លក្ខណា ចេវ, កសា លិខិតសីបទី;

បាបបរិសទូសី ច, កាណំ កុណិ តថេវ ច.

ខញ្ជំ បក្ខហតញ្ចេវ, សច្ឆិន្នឥរិយាបថំ;

ជរាន្ធមូគពធិរំ, អន្ធមូគញ្ច យំ តហិំ.

អន្ធពធិរំ យំ វុត្តំ, មូគពធិរមេវ ច;

អន្ធមូគពធិរញ្ច, អលជ្ជីនញ្ច និស្សយំ.

វត្ថព្ពញ្ច តថាទ្ធានំ, យាចមានេន លក្ខណា [បេក្ខនា (សព្ពត្ថ)];

អាគច្ឆតុ វិវទន្តិ, ឯកុបជ្ឈាយេន កស្សបោ.

ទិស្សន្តិ ឧបសម្បន្នា, អាពាធេហិ ច បីឡិតា;

អននុសិដ្ឋា វិត្ថេន្តិ, តត្ថេវ អនុសាសនា.

សង្ឃេបិ ច អថោ ពាលា, អសម្មតា ច ឯកតោ;

ឧល្លុម្បតុបសម្បទា, និស្សយោ ឯកកោ តយោតិ.

ឥមម្ហិ ខន្ធកេ វត្ថូនិ ឯកសតញ្ច ទ្វាសត្តតិ.

មហាខន្ធកោ និដ្ឋិតោ.