៦៦. អាបត្តិយា អទស្សនេ ឧក្ខិត្តកវត្ថូនិ

១៣០. តេន ខោ បន សមយេន អញ្ញតរោ ភិក្ខុ អាបត្តិយា អទស្សនេ ឧក្ខិត្តកោ វិព្ភមិ. សោ បុន បច្ចាគន្ត្វា ភិក្ខូ ឧបសម្បទំ យាចិ. ភគវតោ ឯតមត្ថំ អារោចេសុំ.

ឥធ បន, ភិក្ខវេ, ភិក្ខុ អាបត្តិយា អទស្សនេ ឧក្ខិត្តកោ វិព្ភមតិ. សោ បុន បច្ចាគន្ត្វា ភិក្ខូ ឧបសម្បទំ យាចតិ. សោ ឯវមស្ស វចនីយោ – ‘‘បស្សិស្សសិ តំ អាបត្តិ’’ន្តិ? សចាហំ បស្សិស្សាមីតិ, បព្ពាជេតព្ពោ. សចាហំ ន បស្សិស្សាមីតិ, ន បព្ពាជេតព្ពោ. បព្ពាជេត្វា វត្តព្ពោ – ‘‘បស្សិស្សសិ តំ អាបត្តិ’’ន្តិ? សចាហំ បស្សិស្សាមីតិ, ឧបសម្បាទេតព្ពោ. សចាហំ ន បស្សិស្សាមីតិ, ន ឧបសម្បាទេតព្ពោ. ឧបសម្បាទេត្វា វត្តព្ពោ – ‘‘បស្សិស្សសិ តំ អាបត្តិ’’ន្តិ? សចាហំ បស្សិស្សាមីតិ, ឱសារេតព្ពោ. សចាហំ ន បស្សិស្សាមីតិ, ន ឱសារេតព្ពោ. ឱសារេត្វា វត្តព្ពោ – ‘‘បស្សសិ [បស្សាហិ (សី.)] តំ អាបត្តិ’’ន្តិ? សចេ បស្សតិ, ឥច្ចេតំ កុសលំ. នោ ចេ បស្សតិ, លព្ភមានាយ សាមគ្គិយា បុន ឧក្ខិបិតព្ពោ. អលព្ភមានាយ សាមគ្គិយា អនាបត្តិ សម្ភោគេ សំវាសេ.

ឥធ បន, ភិក្ខវេ, ភិក្ខុ អាបត្តិយា អប្បដិកម្មេ ឧក្ខិត្តកោ វិព្ភមតិ. សោ បុន បច្ចាគន្ត្វា ភិក្ខូ ឧបសម្បទំ យាចតិ. សោ ឯវមស្ស វចនីយោ – ‘‘បដិករិស្សសិ តំ អាបត្តិ’’ន្តិ? សចាហំ បដិករិស្សាមីតិ, បព្ពាជេតព្ពោ. សចាហំ ន បដិករិស្សាមីតិ, ន បព្ពាជេតព្ពោ. បព្ពាជេត្វា វត្តព្ពោ – ‘‘បដិករិស្សសិ តំ អាបត្តិ’’ន្តិ? សចាហំ បដិករិស្សាមីតិ, ឧបសម្បាទេតព្ពោ. សចាហំ ន បដិករិស្សាមីតិ, ន ឧបសម្បាទេតព្ពោ. ឧបសម្បាទេត្វា វត្តព្ពោ – ‘‘បដិករិស្សសិ តំ អាបត្តិ’’ន្តិ? សចាហំ បដិករិស្សាមីតិ, ឱសារេតព្ពោ. សចាហំ ន បដិករិស្សាមីតិ, ន ឱសារេតព្ពោ. ឱសារេត្វា វត្តព្ពោ – ‘‘បដិករោហិ តំ អាបត្តិ’’ន្តិ. សចេ បដិករោតិ, ឥច្ចេតំ កុសលំ. នោ ចេ បដិករោតិ លព្ភមានាយ សាមគ្គិយា បុន ឧក្ខិបិតព្ពោ. អលព្ភមានាយ សាមគ្គិយា អនាបត្តិ សម្ភោគេ សំវាសេ.

ឥធ បន, ភិក្ខវេ, ភិក្ខុ បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ វិព្ភមតិ. សោ បុន បច្ចាគន្ត្វា ភិក្ខូ ឧបសម្បទំ យាចតិ. សោ ឯវមស្ស វចនីយោ – ‘‘បដិនិស្សជ្ជិស្សសិ តំ បាបិកំ ទិដ្ឋិ’’ន្តិ? សចាហំ បដិនិស្សជ្ជិស្សាមីតិ, បព្ពាជេតព្ពោ. សចាហំ ន បដិនិស្សជ្ជិស្សាមីតិ, ន បព្ពាជេតព្ពោ. បព្ពាជេត្វា វត្តព្ពោ – ‘‘បដិនិស្សជ្ជិស្សសិ តំ បាបិកំ ទិដ្ឋិ’’ន្តិ? សចាហំ បដិនិស្សជ្ជិស្សាមីតិ, ឧបសម្បាទេតព្ពោ. សចាហំ ន បដិនិស្សជ្ជិស្សាមីតិ, ន ឧបសម្បាទេតព្ពោ. ឧបសម្បាទេត្វា វត្តព្ពោ – ‘‘បដិនិស្សជ្ជិស្សសិ តំ បាបិកំ ទិដ្ឋិ’’ន្តិ? សចាហំ បដិនិស្សជ្ជិស្សាមីតិ, ឱសារេតព្ពោ. សចាហំ ន បដិនិស្សជ្ជិស្សាមីតិ, ន ឱសារេតព្ពោ. ឱសារេត្វា វត្តព្ពោ – ‘‘បដិនិស្សជ្ជេហិ តំ បាបិកំ ទិដ្ឋិ’’ន្តិ. សចេ បដិនិស្សជ្ជតិ, ឥច្ចេតំ កុសលំ. នោ ចេ បដិនិស្សជ្ជតិ, លព្ភមានាយ សាមគ្គិយា បុន ឧក្ខិបិតព្ពោ. អលព្ភមានាយ សាមគ្គិយា អនាបត្តិ សម្ភោគេ សំវាសេតិ.

មហាខន្ធកោ បឋមោ.