៦០. គោត្តេន អនុស្សាវនានុជាននា

១២២. តេន ខោ បន សមយេន អាយស្មតោ មហាកស្សបស្ស ឧបសម្បទាបេក្ខោ ហោតិ. អថ ខោ អាយស្មា មហាកស្សបោ អាយស្មតោ អានន្ទស្ស សន្តិកេ ទូតំ បាហេសិ – អាគច្ឆតុ អានន្ទោ ឥមំ អនុស្សាវេស្សតូតិ [អនុស្សាវេស្សតីតិ (ស្យា.)]. អាយស្មា អានន្ទោ ឯវមាហ – ‘‘នាហំ ឧស្សហាមិ ថេរស្ស នាមំ គហេតុំ, គរុ មេ ថេរោ’’តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, គោត្តេនបិ អនុស្សាវេតុន្តិ.