៦១. ទ្វេឧបសម្បទាបេក្ខាទិវត្ថុ

១២៣. តេន ខោ បន សមយេន អាយស្មតោ មហាកស្សបស្ស ទ្វេ ឧបសម្បទាបេក្ខា ហោន្តិ. តេ វិវទន្តិ – អហំ បឋមំ ឧបសម្បជ្ជិស្សាមិ, អហំ បឋមំ ឧបសម្បជ្ជិស្សាមីតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ទ្វេ ឯកានុស្សាវនេ កាតុន្តិ.

តេន ខោ បន សមយេន សម្ពហុលានំ ថេរានំ ឧបសម្បទាបេក្ខា ហោន្តិ. តេ វិវទន្តិ – អហំ បឋមំ ឧបសម្បជ្ជិស្សាមិ, អហំ បឋមំ ឧបសម្បជ្ជិស្សាមីតិ. ថេរា ឯវមាហំសុ – ‘‘ហន្ទ, មយំ, អាវុសោ, សព្ពេវ ឯកានុស្សាវនេ ករោមា’’តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ទ្វេ តយោ ឯកានុស្សាវនេ កាតុំ, តញ្ច ខោ ឯកេន ឧបជ្ឈាយេន, ន ត្វេវ នានុបជ្ឈាយេនាតិ.