២៧. រាជភដវត្ថុ

៩០. តេន ខោ បន សមយេន រញ្ញោ មាគធស្ស សេនិយស្ស ពិម្ពិសារស្ស បច្ចន្តោ កុបិតោ ហោតិ. អថ ខោ រាជា មាគធោ សេនិយោ ពិម្ពិសារោ សេនានាយកេ មហាមត្តេ អាណាបេសិ – ‘‘គច្ឆថ, ភណេ, បច្ចន្តំ ឧច្ចិនថា’’តិ. ‘‘ឯវំ, ទេវា’’តិ ខោ សេនានាយកា មហាមត្តា រញ្ញោ មាគធស្ស សេនិយស្ស ពិម្ពិសារស្ស បច្ចស្សោសុំ. អថ ខោ អភិញ្ញាតានំ អភិញ្ញាតានំ យោធានំ ឯតទហោសិ – ‘‘មយំ ខោ យុទ្ធាភិនន្ទិនោ គច្ឆន្តា បាបញ្ច ករោម, ពហុញ្ច អបុញ្ញំ បសវាម. កេន នុ ខោ មយំ ឧបាយេន បាបា ច វិរមេយ្យាម កល្យាណញ្ច ករេយ្យាមា’’តិ? អថ ខោ តេសំ យោធានំ ឯតទហោសិ – ‘‘ឥមេ ខោ សមណា សក្យបុត្តិយា ធម្មចារិនោ សមចារិនោ ព្រហ្មចារិនោ សច្ចវាទិនោ សីលវន្តោ កល្យាណធម្មា. សចេ ខោ មយំ សមណេសុ សក្យបុត្តិយេសុ បព្ពជេយ្យាម, ឯវំ មយំ បាបា ច វិរមេយ្យាម កល្យាណញ្ច ករេយ្យាមា’’តិ. អថ ខោ តេ យោធា ភិក្ខូ ឧបសង្កមិត្វា បព្ពជ្ជំ យាចិំសុ. តេ ភិក្ខូ បព្ពាជេសុំ, ឧបសម្បាទេសុំ. សេនានាយកា មហាមត្តា រាជភដេ បុច្ឆិំសុ – ‘‘កិំ នុ ខោ, ភណេ, ឥត្ថន្នាមោ ច ឥត្ថន្នាមោ ច យោធា ន ទិស្សន្តី’’តិ? ‘‘ឥត្ថន្នាមោ ច ឥត្ថន្នាមោ ច, សាមិ, យោធា ភិក្ខូសុ បព្ពជិតា’’តិ. សេនានាយកា មហាមត្តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា រាជភដំ បព្ពាជេស្សន្តី’’តិ. សេនានាយកា មហាមត្តា រញ្ញោ មាគធស្ស សេនិយស្ស ពិម្ពិសារស្ស ឯតមត្ថំ អារោចេសុំ. អថ ខោ រាជា មាគធោ សេនិយោ ពិម្ពិសារោ វោហារិកេ មហាមត្តេ បុច្ឆិ – ‘‘យោ, ភណេ, រាជភដំ បព្ពាជេតិ, កិំ សោ បសវតី’’តិ? ‘‘ឧបជ្ឈាយស្ស, ទេវ, សីសំ ឆេតព្ពំ, អនុស្សាវកស្ស [អនុសាវកស្ស (ក.)] ជិវ្ហា ឧទ្ធរិតព្ពា, គណស្ស ឧបឌ្ឍផាសុកា ភញ្ជិតព្ពា’’តិ. អថ ខោ រាជា មាគធោ សេនិយោ ពិម្ពិសារោ យេន ភគវា តេនុបសង្កមិ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ រាជា មាគធោ សេនិយោ ពិម្ពិសារោ ភគវន្តំ ឯតទវោច – ‘‘សន្តិ, ភន្តេ, រាជានោ អស្សទ្ធា អប្បសន្នា. តេ អប្បមត្តកេនបិ ភិក្ខូ វិហេឋេយ្យុំ. សាធុ, ភន្តេ, អយ្យា រាជភដំ ន បព្ពាជេយ្យុ’’ន្តិ. អថ ខោ ភគវា រាជានំ មាគធំ សេនិយំ ពិម្ពិសារំ ធម្មិយា កថាយ សន្ទស្សេសិ សមាទបេសិ សមុត្តេជេសិ សម្បហំសេសិ. អថ ខោ រាជា មាគធោ សេនិយោ ពិម្ពិសារោ ភគវតា ធម្មិយា កថាយ សន្ទស្សិតោ សមាទបិតោ សមុត្តេជិតោ សម្បហំសិតោ ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, រាជភដោ បព្ពាជេតព្ពោ. យោ បព្ពាជេយ្យ, អាបត្តិ ទុក្កដស្សា’’តិ.

រាជភដវត្ថុ និដ្ឋិតំ.