២៨. អង្គុលិមាលចោរវត្ថុ

៩១. តេន ខោ បន សមយេន ចោរោ អង្គុលិមាលោ ភិក្ខូសុ បព្ពជិតោ ហោតិ. មនុស្សា បស្សិត្វា ឧព្ពិជ្ជន្តិបិ, ឧត្តសន្តិបិ, បលាយន្តិបិ, អញ្ញេនបិ គច្ឆន្តិ, អញ្ញេនបិ មុខំ ករោន្តិ, ទ្វារម្បិ ថកេន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា ធជពន្ធំ ចោរំ បព្ពាជេស្សន្តី’’តិ. អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… ន, ភិក្ខវេ, ធជពន្ធោ ចោរោ បព្ពាជេតព្ពោ. យោ បព្ពាជេយ្យ, អាបត្តិ ទុក្កដស្សាតិ.

អង្គុលិមាលចោរវត្ថុ និដ្ឋិតំ.