២. អាវាសិកវត្តកថា

៣៥៨. តេន ខោ បន សមយេន អាវាសិកា ភិក្ខូ អាគន្តុកេ ភិក្ខូ ទិស្វា នេវ អាសនំ បញ្ញបេន្តិ, ន បាទោទកំ បាទបីឋំ បាទកថលិកំ ឧបនិក្ខិបន្តិ, ន បច្ចុគ្គន្ត្វា បត្តចីវរំ បដិគ្គណ្ហន្តិ, ន បានីយេន បុច្ឆន្តិ [ន បានីយេន បុច្ឆន្តិ, ន បរិភោជនីយេន បុច្ឆន្តិ (ស្យា. កំ.)], ន វុឌ្ឍតរេបិ អាគន្តុកេ ភិក្ខូ អភិវាទេន្តិ, ន សេនាសនំ បញ្ញបេន្តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាវាសិកា ភិក្ខូ អាគន្តុកេ ភិក្ខូ ទិស្វា នេវ អាសនំ បញ្ញបេស្សន្តិ, ន បាទោទកំ បាទបីឋំ បាទកថលិកំ ឧបនិក្ខិបិស្សន្តិ, ន បច្ចុគ្គន្ត្វា បត្តចីវរំ បដិគ្គហិស្សន្តិ, ន បានីយេន បុច្ឆិស្សន្តិ, វុឌ្ឍតរេបិ អាគន្តុកេ ភិក្ខូ ន អភិវាទេស្សន្តិ, ន សេនាសនំ បញ្ញបេស្សន្តី’’តិ! អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… សច្ចំ កិរំ, ភិក្ខវេ…បេ… សច្ចំ ភគវាតិ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ –

៣៥៩. ‘‘តេន ហិ, ភិក្ខវេ, អាវាសិកានំ ភិក្ខូនំ វត្តំ បញ្ញបេស្សាមិ យថា អាវាសិកេហិ ភិក្ខូហិ សម្មា វត្តិតព្ពំ. អាវាសិកេន, ភិក្ខវេ, ភិក្ខុនា អាគន្តុកំ ភិក្ខុំ វុឌ្ឍតរំ ទិស្វា អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, បច្ចុគ្គន្ត្វា បត្តចីវរំ បដិគ្គហេតព្ពំ, បានីយេន បុច្ឆិតព្ពោ [បានីយេន បុច្ឆិតព្ពោ, បរិភោជនីយេន បុច្ឆិតព្ពោ (ស្យា.)]. សចេ ឧស្សហតិ, ឧបាហនា បុញ្ឆិតព្ពា. ឧបាហនា បុញ្ឆន្តេន បឋមំ សុក្ខេន ចោឡកេន បុញ្ឆិតព្ពា, បច្ឆា អល្លេន. ឧបាហនាបុញ្ឆនចោឡកំ ធោវិត្វា [ធោវិត្វា បីឡេត្វា (ស្យា.)] ឯកមន្តំ វិស្សជ្ជេតព្ពំ.

‘‘អាគន្តុកោ ភិក្ខុ វុឌ្ឍតរោ អភិវាទេតព្ពោ. សេនាសនំ បញ្ញបេតព្ពំ – ‘ឯតំ តេ សេនាសនំ បាបុណាតី’តិ. អជ្ឈាវុដ្ឋំ វា អនជ្ឈាវុដ្ឋំ វា អាចិក្ខិតព្ពំ. គោចរោ អាចិក្ខិតព្ពោ. អគោចរោ អាចិក្ខិតព្ពោ. សេក្ខសម្មតានិ កុលានិ អាចិក្ខិតព្ពានិ. វច្ចដ្ឋានំ អាចិក្ខិតព្ពំ. បស្សាវដ្ឋានំ អាចិក្ខិតព្ពំ. បានីយំ អាចិក្ខិតព្ពំ. បរិភោជនីយំ អាចិក្ខិតព្ពំ. កត្តរទណ្ឌោ អាចិក្ខិតព្ពោ. សង្ឃស្ស កតិកសណ្ឋានំ អាចិក្ខិតព្ពំ – ‘ឥមំ កាលំ បវិសិតព្ពំ, ឥមំ កាលំ និក្ខមិតព្ព’ន្តិ.

‘‘សចេ នវកោ ហោតិ, និសិន្នកេនេវ អាចិក្ខិតព្ពំ – ‘អត្រ បត្តំ និក្ខិបាហិ, អត្រ ចីវរំ និក្ខិបាហិ, ឥទំ អាសនំ និសីទាហី’តិ. បានីយំ អាចិក្ខិតព្ពំ. បរិភោជនីយំ អាចិក្ខិតព្ពំ. ឧបាហនាបុញ្ឆនចោឡកំ អាចិក្ខិតព្ពំ. អាគន្តុកោ ភិក្ខុ នវកោ អភិវាទាបេតព្ពោ. សេនាសនំ អាចិក្ខិតព្ពំ – ‘ឯតំ តេ សេនាសនំ បាបុណាតី’តិ. អជ្ឈាវុដ្ឋំ វា អនជ្ឈាវុដ្ឋំ វា អាចិក្ខិតព្ពំ. គោចរោ អាចិក្ខិតព្ពោ. អគោចរោ អាចិក្ខិតព្ពោ. សេក្ខសម្មតានិ កុលានិ អាចិក្ខិតព្ពានិ. វច្ចដ្ឋានំ អាចិក្ខិតព្ពំ. បស្សាវដ្ឋានំ អាចិក្ខិតព្ពំ. បានីយំ អាចិក្ខិតព្ពំ. បរិភោជនីយំ អាចិក្ខិតព្ពំ. កត្តរទណ្ឌោ អាចិក្ខិតព្ពោ. សង្ឃស្ស កតិកសណ្ឋានំ អាចិក្ខិតព្ពំ – ‘ឥមំ កាលំ បវិសិតព្ពំ, ឥមំ កាលំ និក្ខមិតព្ព’ន្តិ. ឥទំ ខោ, ភិក្ខវេ, អាវាសិកានំ ភិក្ខូនំ វត្តំ យថា អាវាសិកេហិ ភិក្ខូហិ សម្មា វត្តិតព្ព’’ន្តិ.