១០. ជីវិតិន្ទ្រិយកថាវណ្ណនា

៥៤០. អន្តំ គហេត្វា វទតីតិ ‘‘អត្ថិ អរូបធម្មានំ អាយុ ឋិតិ យបនា យាបនា ឥរិយនា វត្តនា បាលនា, អត្ថិ អរូបជីវិតិន្ទ្រិយ’’ន្តិ តស្មិំ បញ្ហេ ‘‘អត្ថិ អរូបជីវិតិន្ទ្រិយ’’ន្តិ ឥមំ អន្តំ បរិយោសានំ គហេត្វា វទតិ. វត្តុំ យុត្តោ សមុទាយស្ស ឥច្ឆន្តោ តទវយវស្ស ឥច្ឆតីតិ. ន ហិ អវយវេហិ វិនា សមុទាយោ នាម អត្ថិ.

៥៤១. តមេវាតិ អរូបំ ចិត្តវិប្បយុត្តមេវ.

៥៤២. តទាបីតិ សមាបជ្ជនវុដ្ឋានកាលេបិ.

៥៤៤-៥៤៥. សោ យុត្តោ ទ្វិន្នំ រូបារូបជីវិតិន្ទ្រិយានំ សកសមយេ ឥច្ឆិតត្តា.

ជីវិតិន្ទ្រិយកថាវណ្ណនា និដ្ឋិតា.