៩. យថាកម្មូបគតញាណកថាវណ្ណនា

៣៧៧. ទិព្ពចក្ខុបាទកត្តា ‘‘យថាកម្មូបគតញាណស្ស ឧបនិស្សយេ ទិព្ពចក្ខុម្ហី’’តិ វុត្តំ, ន យថាកម្មូបគតជាននកិច្ចកេ ទិព្ពចក្ខុម្ហិ តស្ស តំកិច្ចកតាភាវតោ. យតោ យំ អនញ្ញំ, តម្បិ តតោ អនញ្ញមេវាតិ អាហ ‘‘ឥមិនា…បេ… ភវិតព្ព’’ន្តិ. តត្ថ អត្ថន្តរភាវំ និវារេតីតិ ទិព្ពចក្ខុញាណស្ស បក្ខិកត្តា យថាកម្មូបគតញាណស្ស តតោ អត្ថន្តរភាវំ និវារេតិ. តស្ស ហិ តំ បរិភណ្ឌញាណំ. ទិព្ពចក្ខុស្ស យថាកម្មូបគតញាណតោ អត្ថន្តរភាវំ ន និវារេតិ អតប្បក្ខិកត្តាតិ អធិប្បាយោ. ទិព្ពចក្ខុស្ស យថាកម្មូបគតញាណកិច្ចតា បរវាទិនា ឥច្ឆិតា, ន យថាកម្មូបគតញាណស្ស ទិព្ពចក្ខុកិច្ចតាតិ តមត្ថំ ‘‘យថាកម្មូបគតញាណមេវ ទិព្ពចក្ខុ’’ន្តិ ឯត្ថ យោជេត្វា ទស្សេន្តោ ‘‘ឯវ-សទ្ទោ ចា’’តិអាទិមាហ.

យថាកម្មូបគតញាណកថាវណ្ណនា និដ្ឋិតា.