១. អនុលោមបច្ចនីកវណ្ណនា

១២. មជ្ឈិមជាតិកាលេតិ បច្ចុប្បន្នត្តភាវកាលេ. អត្តភាវោ ហិ ឥធ ‘‘ជាតី’’តិ អធិប្បេតោ. តតោ អតីតោ បុរិមជាតិកាលោ, អនាគតោ បច្ឆិមជាតិកាលោ. ឥមេសុ តីសូតិ សព្ពត្ថ, សព្ពទា, សព្ពេសូតិ ឥមេសុ តីសុ នយេសុ. បាឋស្ស សំខិត្តតា សុវិញ្ញេយ្យាតិ តំ ឋបេត្វា អត្ថស្ស សទិសតំ វិភាវេន្តោ ‘‘ឥធាបិ ហិ…បេ… យោជេតព្ព’’ន្តិ អាហ. ឯត្ថាបិ ‘‘ន កេនចិ សភាវេន បុគ្គលោ ឧបលព្ភតី’’តិ អយមត្ថោ វុត្តោ ហោតិ. ន ហិ កេនចិ សភាវេន ឧបលព្ភមានស្ស សកលេកទេសវិនិមុត្តោ បវត្តិកាលោ នាម អត្ថីតិ.