១១. និរោធកថាវណ្ណនា

៣៥៣. យេសំ ទ្វិន្នន្តិ យេសំ ទ្វិន្នំ ទុក្ខសច្ចានំ. ទ្វីហិ និរោធេហីតិ អប្បដិសង្ខាបដិសង្ខាសង្ខាតេហិ ទ្វីហិ និរោធេហិ. តត្ថ ទុក្ខាទីនំ បដិសង្ខាតិ បដិសង្ខា, បញ្ញាវិសេសោ. តេន វត្តព្ពោ និរោធោ បដិសង្ខានិរោធោ. យោ សាសវេហិ ធម្មេហិ វិសំយោគោតិ វុច្ចតិ, យោ បច្ចយវេកល្លេន ធម្មានំ ឧប្បាទស្ស អច្ចន្តវិពន្ធភូតោ និរោធោ, សោ បដិសង្ខាយ នវត្តព្ពតោ អប្បដិសង្ខានិរោធោ នាមាតិ បរវាទិនោ លទ្ធិ. បដិសង្ខាយ វិនា និរុទ្ធាតិ បច្ចយវេកល្លេន អនុប្បត្តិំ សន្ធាយ វុត្តំ. តេនាហ ‘‘ន ឧប្បជ្ជិត្វា ភង្គា’’តិ. អនុប្បាទោបិ ហិ និរោធោតិ វុច្ចតិ យតោ ‘‘ឥមស្សុប្បាទា ឥទំ ឧប្បជ្ជតី’’តិ លក្ខណុទ្ទេសស្ស បដិលោមេ ‘‘ឥមស្ស និរោធា ឥទំ និរុជ្ឈតី’’តិ ទស្សិតោ. តេនាតិ បដិសង្ខាយ និរោធស្ស ខណិកនិរោធស្ស ច ឥធ នាធិប្បេតត្តា.

និរោធកថាវណ្ណនា និដ្ឋិតា.

ទុតិយវគ្គវណ្ណនា និដ្ឋិតា.