៥. វចីភេទកថាវណ្ណនា

៣២៦. សោតិ បឋមមគ្គដ្ឋោ. តស្មាតិ យស្មា ‘‘វិរជំ វីតមលំ ធម្មចក្ខុំ ឧទបាទិ ‘យំ កិញ្ចិ សមុទយធម្មំ, សព្ពំ តំ និរោធធម្ម’’’ន្តិ សុត្តស្ស អត្ថំ អញ្ញថា គហេត្វា ឧទយព្ពយានុបស្សនានិស្សន្ទេន មគ្គក្ខណេបិ ទុក្ខន្តិ វិបស្សនា ឧបដ្ឋាតិ, តស្មា ‘‘សោ ទុក្ខមិច្ចេវ វាចំ ភាសតី’’តិ វទន្តិ.

៣២៨. ឥច្ឆិតេតិ បរវាទិនា សម្បដិច្ឆិតេ. អារោបិតេតិ យុត្តិនិទ្ធារណេន តស្មិំ អត្ថេ បតិដ្ឋាបិតេ យុជ្ជតិ, វចីសមុដ្ឋាបនក្ខណតោ បន បច្ឆា តំ សទ្ទំ សុណាតីតិ ឥច្ឆិតេ ន យុជ្ជតិ សោតវិញ្ញាណស្ស បច្ចុប្បន្នារម្មណត្តាតិ អធិប្បាយោ. យស្មា បន អត្តនា និច្ឆារិតំ សទ្ទំ អត្តនាបិ សុណាតិ, តស្មា សោតវិញ្ញាណំ ‘‘យេន តំ សទ្ទំ សុណាតី’’តិ អដ្ឋកថាយំ វុត្តន្តិ ទដ្ឋព្ពំ.

៣៣២. លោកុត្តរមគ្គក្ខណេតិ បឋមជ្ឈានិកស្ស បឋមមគ្គស្ស ខណេ. អភិភូសុត្តាហរណេ អធិប្បាយោ វត្តព្ពោតិ ឯតេន តទាហរណស្ស អសម្ពន្ធតំ ទស្សេតិ. តេនាហ ‘‘តស្មា អសាធក’’ន្តិ.

វចីភេទកថាវណ្ណនា និដ្ឋិតា.