៥. តថតាកថាវណ្ណនា

៨៤១-៨៤៣. រូបាទីនំ សភាវតាតិ ឯតេន រូបាទយោ ឯវ សភាវតាតិ ឥមមត្ថំ បដិក្ខិបតិ. យតោ តំ បរវាទី រូបាទីសុ អបរិយាបន្នំ ឥច្ឆតិ. តេនាហ ‘‘ភាវំ ហេស តថតាតិ វទតិ, ន ភាវយោគ’’ន្តិ. តត្ថ ភាវន្តិ ធម្មមត្តំ, បកតីតិ អត្ថោ ‘‘ជាតិធម្ម’’ន្តិអាទីសុ វិយ. រូបាទីនញ្ហិ រុប្បនាទិបកតិ តថា អសង្ខតាតិ ច បរវាទិនោ លទ្ធិ. តេន វុត្តំ ‘‘ន ភាវយោគ’’ន្តិ. យេន ហិ ភាវោ សភាវធម្មោ យុជ្ជតិ, ឯកីភាវមេវ គច្ឆតិ, តំ រុប្បនាទិលក្ខណំ ភាវយោគោ. តំ បន រូបាទិតោ អនញ្ញំ, តតោ ឯវ សង្ខតំ, អវិបរីតដ្ឋេន បន ‘‘តថ’’ន្តិ វុច្ចតិ.

តថតាកថាវណ្ណនា និដ្ឋិតា.