៩. ចក្ខុនារូបំបស្សតីតិកថាវណ្ណនា

៨២៦-៨២៧. ‘‘ចក្ខុនា រូបំ ទិស្វា’’តិ ឥមិនា ចក្ខុវិញ្ញាណេន បដិជាននស្ស អគ្គហណេ អរុចិំ សូចេន្តោ អាហ ‘‘មនោវិញ្ញាណបដិជាននំ កិរ សន្ធាយា’’តិ. តេនេវាហ ‘‘មនោវិញ្ញាណបដិជាននំ បនា’’តិអាទិ. តស្មាតិ មនោវិញ្ញាណបដិជាននស្សេវ អធិប្បេតត្តាតិ អត្ថោ. ឯវំ សន្តេតិ យទិ រូបេន រូបំ បដិវិជានាតិ, រូបំ បដិវិជានន្តម្បិ មនោវិញ្ញាណំ រូបវិជាននំ ហោតិ, ន រូបទស្សនន្តិ អាហ ‘‘មនោវិញ្ញាណបដិជាននំ បន រូបទស្សនំ កថំ ហោតី’’តិ.

ចក្ខុនារូបំបស្សតីតិកថាវណ្ណនា និដ្ឋិតា.

អដ្ឋារសមវគ្គវណ្ណនា និដ្ឋិតា.