៥. សត្តក្ខត្តុបរមកថាវណ្ណនា

៦៤១-៦៤៥. អស្សាតិ ឥមស្ស សត្តក្ខត្តុបរមស្ស. តេនាហ ‘‘សត្តក្ខត្តុបរមភាវេ ច និយាមំ ឥច្ឆសី’’តិ. យេន អានន្តរិយកម្មេន. អន្តរាតិ សត្ត ភវេ អនិព្ពត្តេត្វា តេសំ អន្តរេយេវ. កេចីតិ អភយគិរិវាសិនោ. អបរេតិ បទការា. តស្សាតិ យោ សត្តក្ខត្តុបរមោតិ វា, កោលំកោលោតិ វា, ឯកពីជីតិ វា ភគវតា ញាណេន បរិច្ឆិន្ទិត្វា ព្យាកតោ, តស្ស យថាវុត្តបរិច្ឆេទា អន្តរា ឧបរិមគ្គាធិគមោ នត្ថិ អវិតថទេសនត្តា. យថាបរិច្ឆេទមេវ តស្ស អភិសមយោ, ស្វាយំ វិភាគោ តេសំយេវ បុគ្គលានំ ឥន្ទ្រិយបរោបរិយត្តេន វេទិតព្ពោ ភវនិយាមេន តាទិសស្ស កស្សចិ អភាវតោ. យស្មា កស្សចិ មុទុកានិបិ ឥន្ទ្រិយានិ បច្ចយវិសេសេន តិក្ខភាវំ អាបជ្ជេយ្យុំ, តស្មា តាទិសំ សន្ធាយ ‘‘ភព្ពោតិ វុច្ចតិ, ន សោ អភព្ពោ នាមា’’តិ ច វុត្តំ. យស្មា បន ភគវា ន តាទិសំ ‘‘សត្តក្ខត្តុបរមោ’’តិអាទិនា និយមេត្វា ព្យាករោតិ, តស្មា អាហ ‘‘ន បន អន្តរា អភិសមេតុំ ភព្ពតា វុត្តា’’តិ. អយញ្ច នយោ ឯកន្តេន ឥច្ឆិតព្ពោ. អញ្ញថា បុគ្គលស្ស សង្ករោ សិយាតិ ទស្សេន្តោ ‘‘យទិ ចា’’តិអាទិមាហ.

សត្តក្ខត្តុបរមកថាវណ្ណនា និដ្ឋិតា.

ទ្វាទសមវគ្គវណ្ណនា និដ្ឋិតា.