៤. ញាណកថាវណ្ណនា

៦១៤-៦១៥. ‘‘អន្ធកា’’តិ វុត្តា បុព្ពសេលិយអបរសេលិយរាជគិរិកសិទ្ធត្ថិកាបិ យេភុយ្យេន មហាសង្ឃិកា ឯវាតិ វុត្តំ ‘‘បុព្ពេ…បេ… ភវេយ្យុ’’ន្តិ. តត្ថ អញ្ញេតិ វចនំ ទ្វិន្នំ កថានំ ឧជុវិបច្ចនីកភាវតោ. បុរិមកានញ្ហិ ចក្ខុវិញ្ញាណាទិសមង្គី ‘‘ញាណី’’តិ វុច្ចតិ, ឥមេសំ សោ ឯវ ‘‘ញាណី’’តិ ន វត្តព្ពោតិ វុត្តោ. រាគវិគមោ រាគស្ស សមុច្ឆិន្ទនំ, តថា អញ្ញាណវិគមោ. យថា សមុច្ឆិន្នាវិជ្ជោ ‘‘ញាណី’’តិ, បដិបក្ខតោ ‘‘អញ្ញាណី’’តិ, ឯវំ អសមុច្ឆិន្នាវិជ្ជោ ‘‘អញ្ញាណី’’តិ, បដិបក្ខតោ ‘‘ញាណី’’តិ វុត្តោ. អញ្ញាណស្ស វិគតត្តា សោ ‘‘ញាណី’’តិ វត្តព្ពតំ អាបជ្ជតិ, ន បន សតតំ សមិតំ ញាណស្ស បវត្តនតោតិ អធិប្បាយោ.

ញាណកថាវណ្ណនា និដ្ឋិតា.