៣. រូបំសារម្មណន្តិកថាវណ្ណនា

៥៥២-៥៥៣. ‘‘តទប្បតិដ្ឋំ អនារម្មណ’’ន្តិអាទីសុ បច្ចយត្ថោ អារម្មណ-សទ្ទោ. ‘‘រូបាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ’’តិអាទីសុ ឱលុព្ភដ្ឋោតិ អាហ ‘‘បច្ចយដ្ឋោ ឱលុព្ភដ្ឋោ’’តិ. ឯវំ វិភាគេ វិជ្ជមានេតិ តត្ថ បច្ចយាយត្តវុត្តិតា បច្ចយដ្ឋោ, ទណ្ឌរជ្ជុអាទិ វិយ ទុព្ពលស្ស ចិត្តចេតសិកានំ អាលម្ពិតព្ពតាយ ឧបត្ថម្ភនដ្ឋោ ឱលុព្ភដ្ឋោ. វិសេសាភាវំ បច្ចយភាវសាមញ្ញេន កប្បេត្វា វា.

រូបំសារម្មណន្តិកថាវណ្ណនា និដ្ឋិតា.