២. អន្ធការវគ្គវណ្ណនា

៨៤១. អន្ធការវគ្គស្ស បឋមេ ទានេ វា បូជាយ វាតិ ទាននិមិត្តំ វា បូជានិមិត្តំ វា. មន្តេតីតិ កថេតិ. រត្តន្ធការតា, បុរិសស្ស ហត្ថបាសេ ឋានំ វា សល្លបនំ វា, សហាយាភាវោ, រហោបេក្ខតាតិ ឥមានិ បនេត្ថ ចត្តារិ អង្គានិ.

៨៤២-៨៤៦. ទុតិយតតិយចតុត្ថានិ ឧត្តានត្ថានេវ.

៨៥៦-៨៥៧. បញ្ចមេ អនោវស្សកំ អតិក្កាមេន្តិយាតិ ឆន្នស្ស អន្តោ និសីទិត្វា បក្កមន្តិំ សន្ធាយ វុត្តំ. ‘‘ឧបចារោ ទ្វាទសហត្ថោ’’តិ វទន្តិ. បល្លង្កស្ស អនោកាសេតិ ឩរុពទ្ធាសនស្ស អនោកាសេ អប្បហោន្តេ. បុរេភត្តតា, អន្តរឃរេ និសជ្ជា, អាសនស្ស បល្លង្កោកាសតា, អញ្ញត្រ អនុញ្ញាតការណា អនាបុច្ឆនំ, វុត្តបរិច្ឆេទាតិក្កមោតិ ឥមានិ បនេត្ថ បញ្ច អង្គានិ.

៨៥៩-៨៦៤. ឆដ្ឋសត្តមាទីនិ ឧត្តានត្ថានេវ.

អន្ធការវគ្គវណ្ណនា និដ្ឋិតា.