ឧបាលិបញ្ចកវណ្ណនា

៤២០-៤២១. ឱមទ្ទការកោតិ ឱមទ្ទិត្វា អភិភវិត្វា ការកោ. ឧបត្ថម្ភោ ន ទាតព្ពោតិ សាមគ្គិវិនាសាយ អនុពលំ ន ទាតព្ពំ. ទិដ្ឋាវិកម្មម្បិ កត្វាតិ ‘‘ន មេតំ ខមតី’’តិ ទិដ្ឋិំ អាវិ កត្វាបិ.

វោហារវគ្គវណ្ណនា

៤២៤. កាយប្បយោគេន អាបជ្ជិតព្ពា កាយប្បយោគា. វចីបយោគេន អាបជ្ជិតព្ពា វចីបយោគា. នវសុ ឋានេសូតិ ឱសារណាទីសុ នវសុ ឋានេសុ. ទ្វីសុ ឋានេសូតិ ញត្តិទុតិយញត្តិចតុត្ថកម្មេសុ. តស្មាតិ យស្មា មហាអដ្ឋកថាយំ វុត្តនយេន ឧភតោវិភង្គា អសង្គហិតា, តស្មា. យំ កុរុន្ទិយំ វុត្តំ, តំ គហេតព្ពន្តិ សម្ពន្ធោ.

ទិដ្ឋាវិកម្មវគ្គវណ្ណនា

៤២៥. ‘‘ចតូហិ បញ្ចហី’’តិ វចនតោ ទ្វីហិ វា តីហិ វា ឯកតោ ទេសេតុំ វដ្ដតិ, តតោ បរំ ន វដ្ដតិ. មាឡកសីមាយាតិ ខណ្ឌសីមាយ. អវិប្បវាសសីមាយាតិ មហាសីមាយ.

មុសាវាទវគ្គវណ្ណនា

៤៤៤. បរិយាយេន ជានន្តស្ស វុត្តមុសាវាទោតិ យស្ស កស្សចិ ជានន្តស្ស បរិយាយេន វុត្តមុសាវាទោតិ អត្ថោ.

៤៤៦. អនុយោគោ ន ទាតព្ពោតិ តេន វុត្តំ អនាទិយិត្វា តុណ្ហី ភវិតព្ពន្តិ អត្ថោ.

ភិក្ខុនោវាទវគ្គវណ្ណនា

៤៥៤. ឯកូនវីសតិភេទាយាតិ មគ្គបច្ចវេក្ខណាទិវសេន ឯកូនវីសតិភេទាយ.

អធិករណវូបសមវគ្គវណ្ណនា

៤៥៨. បញ្ចហិ ការណេហីតិ ឥទំ អត្ថនិប្ផាទនកានិ តេសំ បុព្ពភាគានិ ច ការណភាវសាមញ្ញេន ឯកជ្ឈំ គហេត្វា វុត្តំ, ន បន សព្ពេសំ បញ្ចន្នំ សមានយោគក្ខេមត្តា. អនុស្សាវនេនាតិ ភេទស្ស អនុរូបសាវនេន. យថា ភេទោ ហោតិ, ឯវំ ភិន្ទិតព្ពានំ ភិក្ខូនំ អត្តនោ វចនស្ស សាវនេន វិញ្ញាបនេនាតិ អត្ថោ. តេនាហ ‘‘ននុ តុម្ហេ’’តិអាទិ. កណ្ណមូលេ វចីភេទំ កត្វាតិ ឯតេន បាកដំ កត្វា ភេទករវត្ថុទីបនំ វោហរណំ. តត្ថ អត្តនា វិនិច្ឆិតមត្តំ រហស្សវសេន វិញ្ញាបនំ អនុស្សាវនន្តិ ទស្សេតិ. កម្មមេវ ឧទ្ទេសោ វា បមាណន្តិ តេហិ សង្ឃភេទសិទ្ធិតោ បមាណំ, ឥតរេ បន តេសំ សម្ភារភូតា. តេនាហ ‘‘វោហារា’’តិអាទិ. តត្ថាតិ វោហរណេ.

កថិនត្ថារវគ្គវណ្ណនា

៤៦៧. អន្តរា វុត្តការណេនាតិ ‘‘តញ្ហិ វន្ទន្តស្ស មញ្ចបាទាទីសុបិ នលាដំ បដិហញ្ញេយ្យា’’តិអាទិនា វុត្តការណេន.