៣. សមុច្ចយក្ខន្ធកំ

សុក្កវិស្សដ្ឋិកថាវណ្ណនា

៩៧. សមុច្ចយក្ខន្ធកេ វុត្តនយេន វត្តំ សមាទាតព្ពន្តិ បារិវាសិកក្ខន្ធកវណ្ណនាយំ វុត្តនយេន ទ្វីហិ បទេហិ ឯកេន វា សមាទាតព្ពំ. វេទិយាមីតិ ចិត្តេន សម្បដិច្ឆិត្វា សុខំ អនុភវាមិ, ន តប្បច្ចយា អហំ ទុក្ខិតោតិ អធិប្បាយោ. វុត្តនយេនេវ សង្ឃមជ្ឈេ និក្ខិបិតព្ពន្តិ បារិវាសិកក្ខន្ធកេ វុត្តនយេន ‘‘មានត្តំ និក្ខិបាមិ, វត្តំ និក្ខិបាមី’’តិ ឥមេហិ ទ្វីហិ ឯកេន វា និក្ខិបិតព្ពំ. តស្ស អារោចេត្វា និក្ខិបិតព្ពន្តិ អនារោចនេន វត្តភេទទុក្កដបរិមោចនត្ថំ វុត្តំ. ទ្វេ លេឌ្ឌុបាតេ អតិក្កមិត្វាតិ ភិក្ខូនំ សជ្ឈាយនសទ្ទសវនូបចារវិជហនត្ថំ វុត្តំ, មហាមគ្គតោ ឱក្កម្មាតិ មគ្គប្បដិបន្នភិក្ខូនំ ឧបចារវិជហនត្ថំ, គុម្ពេន វា វតិយា វា បដិច្ឆន្នដ្ឋានេតិ ទស្សនូបចារវិជហនត្ថំ. អនិក្ខិត្តវត្តេន អន្តោឧបចារគតានំ សព្ពេសម្បិ អារោចេតព្ពត្តា ‘‘អយំ និក្ខិត្តវត្តស្ស បរិហារោ’’តិ វុត្តំ. តត្ថ និក្ខិត្តវត្តស្សាតិ វត្តំ និក្ខិបិត្វា បរិវសន្តស្សាតិ អត្ថោ. អយំ បនេត្ថ ថេរស្ស អធិប្បាយោ – វត្តំ និក្ខិបិត្វា បរិវសន្តស្ស ឧបចារគតានំ សព្ពេសំ អារោចនកិច្ចំ នត្ថិ, ទិដ្ឋរូបានំ សុតសទ្ទានំ អារោចេតព្ពំ, អទិដ្ឋអសុតានម្បិ អន្តោទ្វាទសហត្ថគតានំ អារោចេតព្ពំ. ឥទំ វត្តំ និក្ខិបិត្វា បរិវសន្តស្ស លក្ខណន្តិ.

បរិវាសកថាវណ្ណនា

១០២. ‘‘សតិយេវ អន្តរាយេ អន្តរាយិកសញ្ញី ឆាទេតិ, អច្ឆន្នា ហោតិ. អន្តរាយិកស្ស បន អនន្តរាយិកសញ្ញាយ ឆាទយតោ អច្ឆន្នាវា’’តិបិ បាឋោ. អវេរីតិ ហិតកាមោ. ឧទ្ធស្តេ អរុណេតិ ឧដ្ឋិតេ អរុណេ. សុទ្ធស្ស សន្តិកេតិ សភាគសង្ឃាទិសេសំ អនាបន្នស្ស សន្តិកេ. វត្ថុន្តិ អសុចិមោចនាទិវីតិក្កមំ.

សុក្កវិស្សដ្ឋីតិ វត្ថុ ចេវ គោត្តញ្ចាតិ សុក្កវិស្សដ្ឋីតិ ឥទំ អសុចិមោចនលក្ខណស្ស វីតិក្កមស្ស បកាសនតោ វត្ថុ ចេវ ហោតិ, សជាតិយសាធារណវិជាតិយវិនិវត្តសភាវាយ សុក្កវិស្សដ្ឋិយា ឯវ បកាសនតោ គោត្តញ្ច ហោតីតិ អត្ថោ. គំ តាយតីតិ ហិ គោត្តំ. សង្ឃាទិសេសោតិ នាមញ្ចេវ អាបត្តិ ចាតិ សង្ឃាទិសេសោតិ តេន តេន វីតិក្កមេន អាបន្នស្ស អាបត្តិនិកាយស្ស នាមប្បកាសនតោ នាមញ្ចេវ ហោតិ អាបត្តិសភាគត្តា អាបត្តិ ច.

តទនុរូបំ កម្មវាចំ កត្វា មានត្តំ ទាតព្ពន្តិ –

‘‘សុណាតុ មេ, ភន្តេ, សង្ឃោ, អយំ ឥត្ថន្នាមោ ភិក្ខុ ឯកំ អាបត្តិំ អាបជ្ជិ សញ្ចេតនិកំ សុក្កវិស្សដ្ឋិំ ឯកាហបដិច្ឆន្នំ, សោ សង្ឃំ ឯកិស្សា អាបត្តិយា សញ្ចេតនិកាយ សុក្កវិស្សដ្ឋិយា ឯកាហបដិច្ឆន្នាយ ឯកាហបរិវាសំ យាចិ. សង្ឃោ ឥត្ថន្នាមស្ស ភិក្ខុនោ ឯកិស្សា អាបត្តិយា សញ្ចេតនិកាយ សុក្កវិស្សដ្ឋិយា ឯកាហបដិច្ឆន្នាយ ឯកាហបរិវាសំ អទាសិ. សោ បរិវុត្ថបរិវាសោ. អយំ ឥត្ថន្នាមោ ភិក្ខុ ឯកំ អាបត្តិំ អាបជ្ជិ សញ្ចេតនិកំ សុក្កវិស្សដ្ឋិំ អប្បដិច្ឆន្នំ, សោ សង្ឃំ តាសំ អាបត្តីនំ សញ្ចេតនិកានំ សុក្កវិស្សដ្ឋីនំ បដិច្ឆន្នាយ ច អប្បដិច្ឆន្នាយ ច ឆារត្តំ មានត្តំ យាចតិ. យទិ សង្ឃស្ស បត្តកល្លំ, សង្ឃោ ឥត្ថន្នាមស្ស ភិក្ខុនោ ទ្វិន្នំ អាបត្តីនំ សញ្ចេតនិកានំ សុក្កវិស្សដ្ឋីនំ បដិច្ឆន្នាយ ច អប្បដិច្ឆន្នាយ ច ឆារត្តំ មានត្តំ ទទេយ្យ, ឯសា ញត្តិ.

សុណាតុ មេ, ភន្តេ…បេ… សោ បរិវុត្ថបរិវាសោ. អយំ ឥត្ថន្នាមោ ភិក្ខុ ឯកំ អាបត្តិំ អាបជ្ជិ សញ្ចេតនិកំ សុក្កវិស្សដ្ឋិំ អប្បដិច្ឆន្នំ, សោ សង្ឃំ តាសំ…បេ… យាចតិ. សង្ឃោ ឥត្ថន្នាមស្ស ភិក្ខុនោ ទ្វិន្នំ អាបត្តីនំ សញ្ចេតនិកានំ សុក្កវិស្សដ្ឋីនំ បដិច្ឆន្នាយ ច អប្បដិច្ឆន្នាយ ច ឆារត្តំ មានត្តំ ទេតិ. យស្សាយស្មតោ ខមតិ ឥត្ថន្នាមស្ស ភិក្ខុនោ ទ្វិន្នំ អាបត្តីនំ សញ្ចេតនិកានំ សុក្កវិស្សដ្ឋីនំ បដិច្ឆន្នាយ ច អប្បដិច្ឆន្នាយ ច ឆារត្តំ មានត្តស្ស ទានំ, សោ តុណ្ហស្ស. យស្ស នក្ខមតិ, សោ ភាសេយ្យ.

ទុតិយម្បិ ឯតមត្ថំ វទាមិ…បេ… តតិយម្បិ ឯតមត្ថំ វទាមិ…បេ…

ទិន្នំ សង្ឃេន ឥត្ថន្នាមស្ស ភិក្ខុនោ ទ្វិន្នំ អាបត្តីនំ សញ្ចេតនិកានំ សុក្កវិស្សដ្ឋីនំ បដិច្ឆន្នាយ ច អប្បដិច្ឆន្នាយ ច ឆារត្តំ មានត្តំ, ខមតិ សង្ឃស្ស, តស្មា តុណ្ហី. ឯវមេតំ ធារយាមីតិ –

ឯវំ កម្មវាចំ កត្វា មានត្តំ ទាតព្ពំ. ចិណ្ណមានត្តស្ស ច ឥមិនាវ នយេន កម្មវាចំ យោជេត្វា អព្ភានំ កាតព្ពំ.

អញ្ញស្មិន្តិ សុទ្ធន្តបរិវាសវសេន អាបត្តិវុដ្ឋានតោ អញ្ញស្មិំ. ទសសតំ អាបត្តិយោ រត្តិសតំ ឆាទយិត្វាតិ យោជេតព្ពំ.

បរិវាសកថាវណ្ណនា និដ្ឋិតា.

អត្តនោ សីមំ សោធេត្វា វិហារសីមាយាតិ វិហារេ ពទ្ធសីមមេវ សន្ធាយ វុត្តំ. វិហារូបចារតោបិ ទ្វេ លេឌ្ឌុបាតា អតិក្កមិតព្ពាតិ ភិក្ខុវិហារំ សន្ធាយ វទតិ គាមូបចារាតិក្កមេនេវ ភិក្ខុនីវិហារូបចារាតិក្កមស្ស សិទ្ធត្តា. វិហារស្ស ចាតិ ភិក្ខុវិហារស្ស. គាមស្សាតិ ន វុត្តន្តិ គាមស្ស ឧបចារំ មុញ្ចិតុំ វដ្ដតីតិ ន វុត្តំ, តស្មា គាមូបចារេបិ វដ្ដតីតិ អធិប្បាយោ.

តត្ថេវ ឋានំ បច្ចាសីសន្តីតិ ភិក្ខូនំ ឋានំ បច្ចាសីសន្តិ. បរិវាសវត្តាទីនន្តិ បរិវាសនិស្សយបដិប្បស្សទ្ធិអាទីនំ. យុត្តតរំ ទិស្សតីតិ ឥមិនា អនិក្ខិត្តវត្តភិក្ខុនា វិយ ភិក្ខុនិយាបិ អន្តោឧបចារសីមគតានំយេវ អារោចេតព្ពំ, ន គាមេ ឋិតានម្បិ គន្ត្វា អារោចេតព្ពន្តិ ទីបេតិ. តស្មិំ គាមេតិ យស្មិំ គាមេ ភិក្ខុនុបស្សយោ ហោតិ, តស្មិំ គាមេ. ពហិ ឧបចារសីមាយ ឋត្វាតិ ឧបចារសីមតោ ពហិ ឋត្វា. សម្មន្និត្វា ទាតព្ពាតិ ឯត្ថ សម្មន្និត្វា ទិន្នាយ សហវាសេបិ រត្តិច្ឆេទោ ន ហោតិ.

បដិច្ឆន្នបរិវាសកថាវណ្ណនា

១០៨. វិសុំ មានត្តំ ចរិតព្ពន្តិ មូលាយបដិកស្សនំ អកត្វា វិសុំ កម្មវាចាយ មានត្តំ គហេត្វា ចរិតព្ពំ.

សុក្កវិស្សដ្ឋិកថាវណ្ណនា និដ្ឋិតា.

អគ្ឃសមោធានបរិវាសកថាវណ្ណនា

១៣៤. ឯកាបត្តិមូលកន្តិ ‘‘ឯកា អាបត្តិ ឯកាហប្បដិច្ឆន្នា, ឯកា អាបត្តិ ទ្វីហប្បដិច្ឆន្នា’’តិអាទិនា វុត្តនយំ សន្ធាយ វទតិ. អាបត្តិវឌ្ឍនកន្តិ ‘‘ឯកា អាបត្តិ ឯកាហប្បដិច្ឆន្នា, ទ្វេ អាបត្តិយោ ទ្វីហប្បដិច្ឆន្នា’’តិអាទិនា វុត្តំ អាបត្តិវឌ្ឍនកនយំ សន្ធាយ.

ទ្វេភិក្ខុវារឯកាទសកាទិកថាវណ្ណនា

១៨១. ថុល្លច្ចយាទីហិ មិស្សកន្តិ ឯកវត្ថុម្ហិ បុព្ពភាគេ អាបន្នថុល្លច្ចយទុក្កដេហិ មិស្សកំ. មក្ខធម្មោ នាម ឆាទេតុកាមតា.

១៨២. សម្ពហុលា សង្ឃាទិសេសា អាបត្តិយោ អាបជ្ជតិ បរិមាណម្បីតិអាទិ ជាតិវសេនេកវចនំ, ភាវនបុំសកនិទ្ទេសោ វា. សេសមេត្ថ បាឡិតោ អដ្ឋកថាតោ ច សុវិញ្ញេយ្យមេវ.

សមុច្ចយក្ខន្ធកវណ្ណនា និដ្ឋិតា.