២. បារិវាសិកក្ខន្ធកំ

បារិវាសិកវត្តកថាវណ្ណនា

៧៥. បារិវាសិកក្ខន្ធកេ នវកតរំ បារិវាសិកន្តិ អត្តនោ នវកតរំ បារិវាសិកំ. បារិវាសិកស្ស ហិ អត្តនោ នវកតរំ បារិវាសិកំ ឋបេត្វា អញ្ញេ មូលាយបដិកស្សនារហមានត្តារហមានត្តចារិកអព្ភានារហាបិ បកតត្តដ្ឋានេយេវ តិដ្ឋន្តិ. តេនាហ ‘‘អន្តមសោ មូលាយបអកស្សនារហាទីនម្បី’’តិ. បាទេ ឃំសេន្តិ ឯតេនាតិ បាទឃំសនំ, សក្ខរកថលាទិ. ‘‘អនុជានាមិ, ភិក្ខវេ, តិស្សោ បាទឃំសនិយោ សក្ខរំ កថលំ សមុទ្ទផេណក’’ន្តិ (ចូឡវ. ២៦៩) ហិ វុត្តំ. សទ្ធិវិហារិកាទីនម្បិ សាទិយន្តស្សាតិ សទ្ធិវិហារិកានម្បិ អភិវាទនាទិំ សាទិយន្តស្ស. ‘‘មា មំ គាមប្បវេសនំ អាបុច្ឆថា’’តិ វុត្តេ អនាបុច្ឆាបិ គាមំ បវិសិតុំ វដ្ដតិ. យោ យោ វុឌ្ឍោតិ បារិវាសិកេសុ ភិក្ខូសុ យោ យោ វុឌ្ឍោ. នវកតរស្ស សាទិតុន្តិ បារិវាសិកនវកតរស្ស អភិវាទនាទិំ សាទិតុំ.

តត្ថេវាតិ សង្ឃនវកដ្ឋានេយេវ. អត្តនោ បាឡិយា បវារេតព្ពន្តិ អត្តនោ វស្សគ្គេន បត្តបាឡិយា បវារេតព្ពំ, ន បន សព្ពេសុ បវារិតេសូតិ អត្ថោ. យទិ បន ន គណ្ហាតិ ន វិស្សជ្ជេតីតិ យទិ បុរិមទិវសេ អត្តនោ ន គណ្ហាតិ គហេត្វា ច ន វិស្សជ្ជេតិ. ចតុស្សាលភត្តន្តិ ភោជនសាលាយំ បដិបាដិយា ទិយ្យមានភត្តំ. ហត្ថបាសេ ឋិតេនាតិ ទាយកស្ស ហត្ថបាសេ ឋិតេន.

៧៦. អញ្ញោ សាមណេរោ ន គហេតព្ពោតិ ឧបជ្ឈាយេន ហុត្វា អញ្ញោ សាមណេរោ ន គហេតព្ពោ. ឧបជ្ឈំ ទត្វា គហិតសាមណេរាបីតិ បកតត្តកាលេ ឧបជ្ឈំ ទត្វា គហិតសាមណេរាបិ. លទ្ធសម្មុតិកេន អាណត្តោបិ គរុធម្មេហិ អញ្ញេហិ វា ឱវទិតុំ លភតីតិ អាហ ‘‘បដិពលស្ស វា ភិក្ខុស្ស ភារោ កាតព្ពោ’’តិ. អាគតា ភិក្ខុនិយោ វត្តព្ពាតិ សម្ពន្ធោ. សវចនីយន្តិ សទោសំ. ជេដ្ឋកដ្ឋានំ ន កាតព្ពន្តិ បធានដ្ឋានំ ន កាតព្ពំ. កិំ តន្តិ អាហ ‘‘បាតិមោក្ខុទ្ទេសកេន វា’’តិអាទិ.

រជេហិ ហតា ឧបហតា ភូមិ ឯតិស្សាតិ រជោហតភូមិ, រជោកិណ្ណភូមីតិ អត្ថោ. បច្ចយន្តិ វស្សាវាសិកលាភំ សន្ធាយ វុត្តំ. ឯកបស្សេ ឋត្វាតិ បាឡិំ វិហាយ ភិក្ខូនំ បច្ឆតោ ឋត្វា. សេនាសនំ ន លភតីតិ សេយ្យាបរិយន្តភាគិតាយ វស្សគ្គេន គណ្ហិតុំ ន លភតិ. អស្សាតិ ភវេយ្យ. ‘‘អាគន្តុកេន អារោចេតព្ពំ, អាគន្តុកស្ស អារោចេតព្ព’’ន្តិ អវិសេសេន វុត្តត្តា សចេ ទ្វេ បារិវាសិកា គតដ្ឋានេ អញ្ញមញ្ញំ បស្សន្តិ, ឧភោហិបិ អញ្ញមញ្ញស្ស អារោចេតព្ពំ. យថា ពហិ ទិស្វា អារោចិតស្ស ភិក្ខុនោ វិហារំ អាគតេ បុន អារោចនកិច្ចំ នត្ថិ, ឯវំ អញ្ញំ វិហារំ គតេនបិ តត្ថ បុព្ពេ អារោចិតស្ស បុន អារោចនកិច្ចំ នត្ថីតិ វទន្តិ.

៨១. អវិសេសេនាតិ បារិវាសិកស្ស ឧក្ខិត្តកស្ស ច អវិសេសេន. ឱពទ្ធន្តិ បលិពុទ្ធំ.

៨៣. សហវាសោតិ វុត្តប្បការេ ឆន្នេ បកតត្តេន ភិក្ខុនា សទ្ធិំ សយនមេវ អធិប្បេតំ, ន សេសឥរិយាបថកប្បនំ. សេសមេត្ថ សុវិញ្ញេយ្យមេវ.

បារិវាសិកក្ខន្ធកវណ្ណនា និដ្ឋិតា.