១. អបារសុត្តវណ្ណនា

៨១៣. ឆន្ទំ និស្សាយ បវត្តោ សមាធីតិ កត្តុកម្យតាឆន្ទំ អធិបតិំ កត្វា បដិលទ្ធសមាធិ ឆន្ធសមាធិ. បធានសង្ខារាតិ ចតុកិច្ចសាធកស្ស សម្មប្បធានវីរិយស្សេតំ អធិវចនំ. តេហីតិ ឆន្ទសមាធិបធានសង្ខារេហិ. ឥទ្ធិយា បាទន្តិ និប្ផត្តិបរិយាយេន ឥជ្ឈនដ្ឋេន, ឥជ្ឈន្តិ ឯតាយ សទ្ធា ឥទ្ធា វុទ្ធា ឧក្កំសគតា ហោន្តីតិ ឥមិនា វា បរិយាយេន ‘‘ឥទ្ធី’’តិ សង្ខាតានំ ឧបចារជ្ឈានាទិកុសលចិត្តសម្បយុត្តានំ ឆន្ទសមាធិបធានសង្ខារានំ អធិដ្ឋានដ្ឋេន បាទភូតំ, សេសចិត្តចេតសិករាសិន្តិ អត្ថោ. សា ឯវ ច យថាវុត្តឥទ្ធិ យស្មា ហេដ្ឋិមា ហេដ្ឋិមា ឧបរិមាយ ឧបរិមាយ បាទភូតា, តស្មា វុត្តំ ‘‘ឥទ្ធិភូតំ វា បាទន្តិ ឥទ្ធិបាទ’’ន្តិ. សេសេសូតិ វីរិយសមាធិអាទីសុ. តត្ថ ហិ វីរិយំ ចិត្តំ វីមំសំ អធិបតិំ កត្វា បដិលទ្ធសមាធិ វីមំសាសមាធីតិ អត្ថោ វេទិតព្ពោ. ឥធាតិ ឥមស្មិំ ឥទ្ធិបាទសំយុត្តេ. ឯកបរិច្ឆេទោវ អត្ថនិទ្ទេសោ.