៦. អវិជ្ជាវគ្គវណ្ណនា

៥៣-៦២. ចតូសុ សច្ចេសុ អញ្ញាណំ តប្បដិច្ឆាទកសម្មោហោ. អវិន្ទិយំ វិន្ទតិ, វិន្ទិយំ ន វិន្ទតីតិ កត្វា វិជ្ជាយ បដិបក្ខោវ អវិជ្ជា. វិជ្ជាយ ឧប្បន្នាយ អនវសេសតោ អវិជ្ជា បហីយតិ, តំ ទស្សេន្តោ ‘‘វិជ្ជាតិ អរហត្តមគ្គវិជ្ជា’’តិ អាហ. ន កេវលំ អនិច្ចានុបស្សនាវសេនេវ មគ្គវុដ្ឋានំ, អថ ខោ ឥតរានុបស្សនាវសេនបីតិ ទស្សេន្តោ ‘‘ទុក្ខា…បេ… បហីយតិយេវា’’តិ អាហ. សព្ពត្ថាតិ ឧបរិសុត្តន្តេ សន្ធាយាហ. តតោ អបរេបិ តំអត្ថលក្ខណវសេន កថិតសុត្តន្តេបិ. តានិបិ ហិ តថា ពុជ្ឈនកបុគ្គលានមជ្ឈាសយេន វុត្តានីតិ.

អវិជ្ជាវគ្គវណ្ណនា និដ្ឋិតា.